Left arrow Go Back

Xogħlijiet fil-bini ġdid tal-Faċilita’ għall-Istudji Turistiċi f’Għawdex miexi b’ritmu mgħaġġel

PR0624
Date Icon 02/05/2007

Ix-xogħlijiet fuq il-bini mill-ġdid tal-Faċilita’ għall-Istudji Turistiċi fil-Qala, Għawdex, qegħdin fl-istadji finali tagħhom filwaqt li ħafna mix-xogħlijiet ta’ tikħil u tibjid diġa’ saru. L-Onor. Giovanna Debono, Ministru għal Għawdex, għamlet żjara fuq il-post waqt li kien għaddej ix-xogħol aktar kmieni llum. 

Dan il-proġett kien wieħed mill-proġetti infrastrutturali għal Għawdex li ġew identifikati mill-Ministeru għal Għawdex biex jibbenefikaw mill-Programm Strutturali Malta 2004-2006. Fil-fatt, 75% ta’ investiment totali li jlaħħaq €1.3m qed jiġu ffinanzjati mill-Fond Ewropew għal Żvilupp Reġjonali (ERDF). 

Il-Ministru Debono żaret il-bini l-ġdid ta’ din il-faċilita’ li qiegħed fuq sular wieħed u li jinkorpora l-elementi kollha ta’ lukanda flimkien ma’ faċilitajiet ta’ taħriġ li huma meħtieġa f’istituzzjoni edukattiva ta’ dan it-tip. Id-daħla prinċipali twassal fil-post li ser ikun mgħammar bħala reception area, li minnu wieħed ikun jista’ jgħaddi wkoll għall-klassijiet spazjużi u l-uffiċini amministrattivi ta’ dan iċ-ċentru. Fuq naħa waħda ta’ bitħa ċentrali nbnew għaxart ikmamar tas-sodda kollha kompluti bil-kmamar tal-banju filwaqt li faċċata tagħhom wieħed isib ir-restaurant u l-bar. Mir-restaurant, wieħed jista’ jgħaddi għall-kċina ewlenija kif ukoll għall-kċina oħra li ser tintuża waqt it-taħriġ. Din ta’ l-aħħar ser tkun mgħammra b’apparat modern u fiha ser ikunu jistgħu jaħdmu b’mod individwali numru ta’ studenti flimkien ma’ l-għalliem tagħhom. Hemm ukoll spazji għal stores, kif ukoll cold room. Il-proġett ħaseb ukoll għal żewġ ġibjuni ta’ l-ilma, substation ta’ l-elettriku, laundry kif ukoll lift u faċilitajiet għal persuni bi bżonnijiet speċjali. 

Dan il-proġett kien jinvolvi t-twaqqiegħ tal-bini li kien ilu jintuża bħala l-Istitut ta’ l-Istudji Turistiċi mill-1989. Il-pjanta oriġinali tal-bini l-ġdid ġiet emendata biex tinżamm l-istruttura ta’ l-entratura li kien hemm qabel. F’nofs Marzu ta’ l-2006 ingħata bidu għall-ewwel fażi tax-xogħol li kien jinkludi t-twaqqiegħ tal-bini l-qadim, tħammil u bini ta’ pedamenti ġodda kif ukoll il-bini mill-ġdid ta’ dan l-istitut. Il-bini issa jinsab lest ħlief għal xi xogħlijiet żgħar marbuta mal-konnessjoni ta’ l-entratura l-qadima mal-kumplament tal-bini l-ġdid.  

It-tieni fażi, li wkoll tinsab fi stadju avvanzat, tinkludi l-istallazzjoni ta’ servizzi mekkaniċi u elettriku. Bħalissa għaddej xogħol ta’ tikħil, tibjid u tqegħid ta’ madum. Sadanittant inħarġu l-offerti konnessi mal-provvediment ta’ għamara u ħtiġijiet oħra bħala parti minn dan il-proġett. 

L-aħħar fażi tittratta x-xiri u l-istallazzjoni ta’ apparat tal-kċina flimkien ma’ apparat teknoloġiku ieħor. L-offerti relatati max-xiri u l-istallazjoni ta’ l-apparat tal-kċina għadhom kif ġew ippubblikati l-ġimgħa l-oħra. 

Matul iż-żjara tagħha ta’ dalgħodu, il-Ministru Giovanna Debono qalet li l-Ministeru għal Għawdex jagħraf l-importanza tat-turiżmu bħala industrija vitali għall-iżvilupp ta’ l-ekonomija fil-gżira ta’ Għawdex, u ħadem id f’id ma’ dawk kollha kkonċernati f’dan il-qasam biex jgħin u jtejjeb il-potenzjal li Għawdex għandu bħala destinazzjoni distinta ta’ kwalita’. L-għan ewlieni tat-twaqqif ta’ dan iċ-ċentru ġdid, li huwa l-ewwel wieħed tax-xorta tiegħu f’Għawdex, huwa li jipprovdi l-infrastruttura neċessarja u faċilitajiet mill-aqwa għat-taħriġ fis-servizzi turistiċi f’Għawdex, kemm għal dawk li diġa’ jaħdmu f’dan is-settur kif ukoll għal oħrajn li bi ħsiebhom jaqbdu karriera f’dan il-qasam. Dan il-proġett żgur ser iservi biex itejjeb il-kwalita’ ta’ servizz li jingħata lit-turisti fl-istabilimenti turistiċi Għawdxin, u hekk joffri esperjenzi isbaħ u aħjar lit-turisti li jqattgħu l-btajjel fil-gżira ta’ Għawdex. 

Il-Ministru Debono tkellmet ukoll dwar żviluppi sinjifikanti li Għawdex ra fil-qasam turistiku f’dawn l-aħħar snin speċjalment fis-settur domestiku fejn kien hemm żidiet sostanzjali sena wara l-oħra. Il-Ministeru għal Għawdex nieda pjan ta’ ħidma biex itejjeb il-prodott turistiku li joffri Għawdex, b’investiment fl-infrastruttura ta’ Għawdex, fl-attrazzjonijiet turistiċi u r-reklamar ta’ Għawdex bħala destinazzjoni distinta matul is-sena kollha. Il-Ministru Debono semmiet kif l-organizzazzjoni ta’ ‘Lejlet Lapsi Notte Gozitana’ li ser tittella’ mill-Ministeru għal Għawdex u l-Ministeru tat-Turiżmu u Kultura, ser isservi bħala attrazzjoni miżjuda biex aktar turisti interni u barranin iżuru lil Għawdex matul dan ix-xahar. Dan l-avveniment flimkien ma’ attivitajiet oħra li ser ikunu organizzati matul ix-xhur anqas popolari u li ser jibbenefikaw mill-Gozo Attractions Incentives Scheme imħabbra mill-Gvern aktar kmieni din is-sena, ser iservu biex itejbu l-prodott li Għawdex joffri lil dawk kollha li jżuruh.

Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAL-PRIM MINISTRU  Il-Prim Ministru Robert Abela jinawgura investiment ta’ €50 miljun f’San Ġiljan

PR261960

STQARRIJA MILL-UFFIĊĊJU TAL-PRIM MINISTRU Il-Prim Ministru Robert Abela ji...

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

More Press Releases Right arrow