Attenzjoni partikolari lill-binjiet ta’ valur arkitettoniku u storiku ta’ pajjiżna
Lista twila ta’ xogħlijiet ta’ restawr mwettqa fl-aħħar snin u xogħlijiet ipprogrammati din is-sena li b’kollox ilaħħqu għal 25 kappella jew knisja madwar il-pajjiz kollu
It-Taqsima tar-Restawr fi ħdan il-Ministeru għar-Riżorsi u l-Infrastruttura qed twettaq proġett ieħor ta' restawr, dak tal-Knisja ta’ Sant’Ubaldeska f’Raħal Ġdid. Meta kien qed iżur ix-xogħlijiet, il-Ministru għar-Riżorsi u l-Infrastruttura, l-Onor. Ninu Zammit tenna li dan ix-xogħol hu “ornament” ieħor f’vetrina ta’ xogħlijiet ta’ restawr li saru fix-xhur u s-snin li għaddew, xogħol delikat u specjalizzat li qed isarraf f’konservazzjoni tal-wirt storiku ta’ pajjiżna.
Il-knisja ta’ Sta. Ubaldesca kienet il-Knisja Parrokjali ta’ Raħal Ġdid għal bosta snin sakemm inbniet il-knisja ta’ Kristu Re fis-seklu l-ieħor. Din il-knisja kienet limitata biss għal parti ta’ wara nkluż is-sagristija u l-ġenb ta’ l-altar maġġur. Meta l-popolazzjoni ta’ Raħal Ġdid bdiet tikber, inħass il-bżonn li din titkabbar. Għalhekk fl-aħħar tas-seklu 19, il-knisja tkabbret billi ttawwlu l-assi prinċipali għal kif insibuha llum.
Il-faċċati tal-knisja l-antika kienu fi stat ħazin ħafna, bi kwantita’ ta’ ġebel li beda jiddeterjora u jitmermer speċjalment fil-faċċati tal-knisja. Għalhekk inħasset il-ħtiega li jitneħħa l-periklu u tiġi restawrata l-eqdem parti tal-knisja. Ix-xogħol tar-restawr li qed isir jikkonsisti fil-konsolidazzjoni tal-ġebel permezz ta’ injezzjoni u tikħil b’materjal magħmul apposta. Fil-faċċati qed jiġu wkoll imkaħħla l-fili li kienu miftuħa sabiex titnaqqas il-ħsara.
Il-Ministru Ninu Zammit spjega li x-xogħlijiet ta’ restawr jinkludu wkoll tindif tal-faċċati minn skorċa sewda, u ħmieg biologiku. Issewwa wkoll id-deffun tal-bejt li partijiet minnu kienu spiċċaw kompletament b’konsegwenza li ammont kbir ta’ ilma kien qed jidħol ġewwa. Barra minn hekk qed jitneħħa wkoll ammont kbir ta’ kisi oħxon bis-siment fil-parti taz-zokklatura tal-binja sabiex jerġa’ jingħata nifs lill-ġebla.
Għalkemm x-xogħlijiet ta’ restawr għaddejjin fuq il-parti l-kbira tal-knisja, qed isir studju fuq l-istruttura sabiex tiġi determinata l-kawża ta’ konsenturi eżistenti kemm fuq il-faċċata l-ġdida tal-binja u anke tul l-assi prinċipali tat-troll tal-knisja.
Ix-xogħlijiet fuq din il-knisja bdew f’Marzu li għadda u mistennija jiġu konklużi fis-sajf ta’ din is-sena.
Fl-aħħarnett il-Ministru, filwaqt li rringrazzja lill-Kappillan tal-parroċċa ta’ Raħal Ġdid Dun Vincenz Cachia għall-koperazzjoni tiegħu, tenna li dawn il-knejjes u l-kappelli li kull raħal jew lokalita’ hu mżewwaq bihom, huma ġojjell kemm fl-arkitettura kif ukoll fl-istorja tal-wirt storiku ta’ pajjiżna. Hu għalhekk opportun li dawn il-binjiet ta’ valur jiġu kkonservati, rijabilitati u restawrati u dan qed isir grazzi għax-xogħlijiet intensivi u speċjalizzati li qed iwettqu l-ħaddiema tal-Ministeru.
Other Press Releases:
PR261960
STQARRIJA MILL-UFFIĊĊJU TAL-PRIM MINISTRU Il-Prim Ministru Robert Abela ji...
PR261959en