Left arrow Go Back

kompli jittejjeb it-trasport pubbliku bi skeda - Imnedija rotot express

PR0611
Date Icon 27/04/2007

Min nhar l-Erbgħa 2 ta’ Mejju ser jibdew jitħaddmu żewġ rotot ta’ transport pubbliku bi skeda li għandhom l-għan li jwasslu l-passiġġieri mill-Mosta u ż-Żurrieq sal-Belt u lura fl-iqsar żmien possibbli. In-noll ta’ dawn iż-żewġ rotot ġodda li ser jitħaddmu fir-rush hours ta’ filgħodu u filgħaxija ser ikun ta’ 20 ċenteżmu - jiġifieri l-istess bħal dak tar-rotot normali. 

Waqt li kien qed iħabbar it-tnedija ta’ dawn ir-rotot, il-Ministru Mugliett stqarr li din l-inizjattiva bejn l-Awtorità Dwar it-Trasport ta’ Malta (ADT), l-Assoċazzjoni tat-Trasport Pubbliku (ATP) u l-Gvern qed tittieħed sabiex tingħata alternattiva ta’ trasport valida lil min jaħdem fil-Belt Valletta u ma jridx jibqa’ jidħol ix-xogħol bil-vettura tiegħu wara li tiġi fis-seħħ is-sistema t’ aċċess kontrollat għall-vetturi fil-Belt. Ir-rotot il-ġodda ser ikunu qed jitħaddmu mit-Tnejn sal-Ġimgħa, eskluż il-Festi Pubbliċi. 

“Is-suċċess tar-rotot ġodda li daħħalna fl-aħħar sentejn - bħal ma huma dawk ta’ l-Università, ir-rotta ċirkolari tal-Belt, u l-park and ride - huma xhieda li l-Maltin ma jaħsibhiex biex jużaw it-trasport pubbliku meta dan joffri servizz li jaqdi sew il-bżonnijiet tagħhom. Aktar minn hekk, iż-żieda qawwija ta’ 11% fin-numru ta’ passiġġieri li jużaw is-servizz bi skeda li rajna fl-ewwel tliet xhur ta’ din is-sena juru biċ-ċar li aktar u aktar nies qed isibu li s-servizz bi skeda huwa alternattiva konvenjenti, rħisa u effiċjenti għall-użu tal-karozza privata.”  

“Jien konvint li dawn ir-rotot il-ġodda ser ikomplu jiġbdu aktar persuni lejn it-trasport pubbliku,” qal il-Ministru. 

Hu kompla jispjega li ż-żewġ rotot express ser jibdew jitħaddmu bi skeda ta’ 12-il vjaġġ kuljum bħala prova għall-ewwel ftit ġimgħat. Il-ħsieb huwa li l-iskedi tar-rotta 153 minn u lejn il-Mosta u 132 minn u lejn iż-Żurrieq jiġu riveduti hekk kif tiżdied id-domanda għalihom. Teżisti wkoll il-possibilità li jiddaħħlu rotot simili minn lokalitajiet oħra fil-jiem li ġejjin. 

Il-Ministru Mugliett qal li dawn ir-rotot express ser jevitaw il-qalba ta’ l-irħula u fejn jista’ jkun jevitaw ukoll żoni fejn jiltaqa’ ħafna traffiku. Dan minbarra li dawn ir-rotot mhux ser ikunu qed jieqfu fuq bus-stops li jkun hemm matul ir-rotta tagħhom, ħlief f’punti strateġiċi bħal ma huma it-Technopark fil-każ tal-Mosta, il-Furjana u l-Belt.  

Hu qal li dawn ir-rotot ġodda ser jiġbdu lejn it-trasport pubbliku nies li m’humhiex imdorrijin jużawh u għalhekk ser tkun qed issir emfażi partikolari fuq il-kwalità ta’ dan is-servizz biex ikun komdu, u aktar environment-friendly. Il-vetturi li ser jintużaw għal dan is-servizz ser ikunu kollha tat-tip super-lowfloor. Ir-rotot ġodda ser ikunu branded bil-kliem express fuq quddiem u wara tal-karozzi tal-linja. Hemm ukoll il-ħsieb li fejn hu possibbli jiddaħħlu xi prijoritajiet għall-karozzi tal-linja li jkunu qed jaħdmu dawn ir-rotot. 

Ir-rotot inizjali ntgħażlu peress li studju reċenti wera li l-Mosta u ż-Żurrieq huma fost dawk il-lokalitajiet li għandhom l-ogħla persentaġġi ta’ abitanti li jaħdmu fil-Belt Valletta. Minn simulazzjonijiet ta’ rotot express li saru minn u lejn diversi lokalitajiet f’Malta ħareġ ukoll li f’dawn iż-żewġ rotot kien hemm l-aktar tnaqqis fil-ħin tat-traġitt minn u lejn il-Belt, meta dawn jitqabblu mar-rotot regolari. It-tnaqqis fil-ħin kien ivarja bejn ħames minuti u kwarta. 

Il-Gvern u l-ADT huma kommessi li josservaw mill-viċin l-effett li ser ikollha d-dħul is-sistema ta’ aċċess kontrollat tal-vetturi fil-Belt Valletta fuq is-sitwazzjoni tat-trasport minn u lejn il-Belt u ser ikunu qed jieħdu l-miżuri meħtieġa skond il-bżonn. 

Fid-dawl ta’ dan, il-Gvern laħaq qbil ma’ l-ATP sabiex numru ta’ karozzi tal-linja jinżammu standby biex dawn jgħamlu tajjeb f’każ li jkun hemm żieda fid-domanda fuq ir-rotot normali minn u lejn il-Belt minn dakinhar li tidħol fis-seħħ is-sistema ġdida. Fil-fatt min-nhar l-Erbgħa li ġej il-frekwenza tar-rotot normali ser tkun tista’ tiżdied malajr grazzi għal dawn il-karozzi tal-linja standby. 

Il-Ministru għall-Iżvilupp Urban u Toroq irringrazzja lill-Assoċazzjoni tat-Trasport Pubbliku għall-koperazzjoni li wriet biex dawn is-servizzi ġodda setgħu jitniedew. Hu qal li dan il-ftehim jawgura tajjeb għat-titjib tat-trasport pubbliku bi skeda, speċjalment fid-dawl tar-riforma tas-servizz. 

L-iskedi u dettalji oħra tar-rotot 153 u 132 ser ikunu qed jiġu reklamati b’qawwa fil-ġurnali u fuq ir-radju fil-jiem li ġejjin. 

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

More Press Releases Right arrow