‘Website’ b’differenza għas-settur turistiku Malti
“Is-suċċess fit-turiżmu jiġi jekk il-prodott ikun wieħed tajjeb, jekk il-promozzjoni tkun waħda kontinwa u li tilħaq lil min ikun irid jivjaġġja u jekk ikun hemm il-mezzi biex it-turist jinġieb lejn pajjiżna. Jekk xi waħda minn dawn il-komponenti ma taħdimx tajjeb allura s-suċċess ma jkunx dak li lkoll nixtiequ.”
Dan tennieh il-Ministru għat-Turiżmu u Kultura Francis Zammit Dimech meta nieda is-supercities.eu website waqt konferenza ta’ l-aħbarijiet fiċ-Ċinema ta’ St James Cavalier, il-belt Valletta.
Il-www.supercities.eu hi website ġdida għal marketing ta’ Malta bħala destinazzjoni turistika. Din hi website b’differenza għaliex il-kontenut tagħha ser ikun magħmul kollu minn videos professjonali u mhux minn stampi.
Il-Ministru għat-Turiżmu u Kultura qal li wara l-introduzzjoni tal-low cost carriers in-numru ta’ turisti li żaru pajjiżna fix-xhur tax-xitwa ta’ bejn Novembru u Frar ta’ din is-sena żdiedu b’6 fil-mija fuq l-istess perijodu tas-sena l-oħra u b’6.7 fil-mija fuq l-istess perijodu ta’ sentejn ilu. “Iċ-ċifri li joħorgu mill-Ajruport Internazzjonali ta’ Malta juru li kemm f’Marzu kif ukoll dan ix-xahar komplejna b’dan ir-ritmu tajjeb. L-introduzzjoni tal-low cost carriers għamlet d-differenza fuq in-numru ta’ turisti li żaru pajjiżna u jirriżulta li qed tagħmel differenza anke fl-infiq. L-introduzzjoni ta’ żewġ titjiriet fil-ġimgħa permezz tal-low cost carrier ‘Clickair’ ser tiftħilna suq ġdid u importanti minn Barċellona u għandha tkompli żżid n-numru ta’ turisti li jżuruna,” tenna l-Ministru Zammit Dimech.
Il-Ministru Zammit Dimech qal li filwaqt li l-Gvern irid iżomm bilanċ bejn il-legacy carriers, il-low cost carriers u t-tour operators ser tkompli ssir ħidma biex inkabbru s-sehem tagħna minn turisti li jivvjaġġjaw fuq low cost carriers għaliex din hi r-realtà turistika ta’ żminijietna u għaliex dan hu mezz ta’ vvjaġġar li llum qiegħed jikber.
“Il-prodott li qed noffru wkoll qed jitjieb. Dan qed isir mhux biss billi qed jiżdied in-numru ta’ lukandi ta’ l-ogħla livell, bit-titjib ta’ l-infrastruttura, proġetti ta’ tisbiħ, restawr u riabiltazzjoni iżda anke billi kull ma jmur qed immorru għal turiżmu orjentat lejn attivitajiet ta’ kalibru internazzjonali li saru jimlew il-kalendarju kulturali u artistiku ta’ pajjiżna,” tenna l-Ministru Zammit Dimech.
Il-Ministru għat-Turiżmu u Kultura tkellem ukoll dwar il-promozzjoni ta’ Malta barra l-pajjiż. Hu qal li f’dawn l-aħħar xhur l-Awtorita’ għat-Turiżmu ta’ Malta żiedet il-promozzjoni ta’ pajjiżna l-aktar fis-swieq ewlenin tagħna. Hu qal li l-MTA nediet ukoll il-VisitMalta Portal li għandu jtejjeb bis-sħiħ il-kompetittività tas-settur turistiku f’pajjiżna billi min ikun irid jżur Malta ikun jista’ jibbukkja titjiriet, lukandi u servizzi oħra. Hu qal li dan il-portal għandu wkoll jikkontribwixxi lejn kampanja pubbliċitarja favur pajjiżna billi jservi ta’ shopping mall enormi għal Malta u Għawdex u jippreżenta lit-turist online b’għażliet diversi li għandhom jwassluh biex jippjana u l-vaganza li jkun irid.
“Iż-żieda tat-www.supercities.eu se tagħti kontribut qawwi ieħor għas-settur turistiku billi se tkun xi ħaġa differenti minn websites oħrajn u billi ser tkun bażata fuq videos u mhux stampi,” tenna l-Ministru Zammit Dimech.
Il-Ministru għat-Turiżmu u Kultura qal li s-settur turistiku f’pajjiżna minn dejjem kien immexxi fil-parti l-kbira mis-settur privat u għalhekk kull inizjattiva li jieħu l-privat biex aktar turisti jżuruna kienet ta’ min jirrikmandaha. Hu qal li minn naħa tagħha l-MTA kienet tappoġġja inizjattivi bħal din għaliex kien permezz ta’ kollaborazzjoni bejn l-istakeholders li s-settur turistiku seta’ jkompli jmur ’il quddiem.
Il-Ministru għat-Turiżmu u Kultura feraħ lill-promoturi tal-website għal dan il-proġett filwaqt li awguralhom kull suċċess f’din l-inizjattiva tagħhom.
Other Press Releases:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959