Left arrow Go Back

Lm65,000 (€151,409) investiment fil-bini ta’ sitt toroq f’Santa Venera

PR0504
Date Icon 05/04/2007

Il-Gvern u l-Awtorità Dwar it-Trasport ta’ Malta qed ikomplu l-ħidma tagħhom biex jitwettaq il-Programm ta’ Bini ta’ Toroq Residenzjali 2006-2008 bil-bini ta’ sitt toroq f’Santa Venera. Ix-xogħol f’dawn it-toroq kien ingħata f’Diċembru li għadda bħala wieħed minn 22 period contract.  

Waqt żjara fuq il-lant tax-xogħol illum wara nofsinhar, il-Ministru għall-Iżvilupp Urban u Toroq, l-Onor. Jesmond Mugliett qal li wħud minn dawn il-kuntratti tlestew u l-maġġoranza tal-bqija bdew resqin lejn it-tlestija. Fil-fatt sal-ġimgħa d-dieħla 7 period contracts ser ikunu tlestew minn kollox, filwaqt li l-oħrajn kollha jinsabu fi stadju ta’ tlestija li jaqbeż is-70%.  

“Peress li l-parti l-kbira minn dawn il-lantijiet ser jingħalqu f’Mejju kif ippjanat, il-Gvern u l-ADT qed iħejju lista ta’ madwar 70 triq oħra li ser jinħarġu fil-grupp ta’ period contracts li jmiss,” qal il-Ministru.

Hu qal li x-xogħol li qed isir f’Santa Venera jinkludi wkoll il-bini mill-ġdid ta’ parti minn triq residenzjali fl-inħawi ta’ l-Istitut Bonnici li teknikament kienet taqa’ taħt ir-responsabilità tal-Kunsill Lokali, u li iżda ddaħħlet fil-programm tal-Gvern minħabba li dawn ma kinitx inbniet sew aktar minn għoxrin sena ilu. Il-valur ta’ dan ix-xogħol jaqbeż il-Lm65,000 (€151,409). 

“Sfortunatament, minflok jikkopera mal-Gvern li kien qiegħed iwettaq xogħol li suppost twettaq mill-Kunsill Lokali, dan ta’ l-aħħar qagħad jinqeda bil-fatt li xi wħud mit-toroq li kienu ser isiru fl-istess period contract ma kienux għadhom ingħataw isem biex joħloq konfużjoni fost ir-residenti,” qal il-Ministru. 

Hu spjega li l-Kunsill Lokali ta’ Santa Venera bagħat serje ta’ ittri fi tlieta mill-ħames toroq li kienu inklużi f’dan il-period contract biex jinfurmahom li t-triq tagħhom ma kinitx ser tinbena għax ma saritx applikazzjoni mill-kuntrattur biex jibda x-xogħol fihom. Dan fil-fatt kien seħħ minħabba li dawn it-toroq ma kellhomx isem meta dawn kienu tkejjlu biex jinħadmu l-istejjem tagħhom mill-periti ta’ l-Awtorità Dwar it-Trasport. 

Il-Ministru għall-Iżvilupp Urban u Toroq żied jgħid li r-residenti ta’ Santa Venera dan l-aħħar gawdew ukoll minn titjib fit-toroq ewlenin li jagħtu lejn din il-lokalità. Dan sar permezz ta’ kuntratt b’valur ta’ Lm20,000 (€46,587) ta’ emergency patching li sar fi Triq il-Kanun u Triq Fleur de Lys.

“S’issa inħarġu ordnijiet ta’ xogħol fi 32 mill-47 raħal illi jidhru fil-Programm ta’ Bini ta’ Toroq Residenzjali li ppubblikajna s-sena l-oħra. L-ammont ta’ xogħol f’toroq residenzjali li sar fl-aħħar sena u tliet xhur juri li l-Gvern qed jaħdem b’mod globali fuq il-Programm tal-Bini ta’ Toroq Residenzjali u m’hu qed iħares lejn wiċċ ħadd fit-twettiq tiegħu. L-impenn tagħna jibqa’ dak li nwettqu kemm jista’ jkun minnu minkejja t-tfixkil u d-diffikultajiet li niltaqgħu magħhom,” temm jgħid il-Ministru Mugliett. 

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

More Press Releases Right arrow