Left arrow Go Back

Il-Ministru DOLORES Cristina tiftaħ ġnien f’Marsaxlokk

PR0425
Date Icon 24/03/2007

Nhar is-Sibt 24 ta’ Marzu, l-Onor. Dolores Cristina, Ministru għall-Familja u Solidarjetà Soċjali, inawgurat ġnien fil-lokalità ta’ Marsaxlokk li sar bi sħubija bejn il-Gvern Ċentrali u l-Kunsill Lokali tal-post. Il-ġnien ingħata l-isem ta’ “Ġnien il-Familja”.

Fid-diskors tagħha l-Ministru Cristina tkellmet dwar l-investiment li għamel u qed ikompli jagħmel il-Gvern sabiex il-poplu Malti u Għawdxi flimkien ma’ eluf ta’ viżitaturi li l-pajjiż tagħna jilqa’ matul is-sena, ikompli jgawdi mit-tisbiħ tal-komunitajiet tagħna. Permezz ta’ dan il-proġett wieħed jista’ japprezza l-impenn sħiħ li ttieħed sabiex tinbena soċjetà li tħares l-ambjent li nsibu madwarna u li trawwem lil uliedna li l-preservazzjoni ta’ l-ambjent hija parti sostanzjali fil-ħajja ta’ kull wieħed u waħda minna.

Dan it-twettiq tal-proġett li jinawgura Ġnien il-Familja f’Marsaxlokk, b’investiment ta’ Lm60,000 (€139,762) huwa sinjal ċar tal-ġid li jitfassal meta żewġ entitajiet importanti bħalma huma l-Gvern Ċentrali u l-Amministrazzjoni Lokali jingħaqdu flimkien għall-progress tal-komunità. Il-ftuħ ta’ ġonna ġodda madwar Malta u Għawdex huwa frott ta’ l-impenn li l-Gvern Malti jħaddan fil-viżjoni wiesa’, li kull individwu irrispettivament ta’ l-età, jgawdi mill-ħolqien ta’ spazji rikreattivi. Barra minn hekk dawn l-ispazji komuni jservu wkoll sabiex ġenerazzjonijiet differenti jkunu jistgħu jiltaqgħu u jirrikrejaw ruħhom.

Il-ġnien qed jingħata l-isem “Ġnien il-Familja” biex jissimboliżża l-post fundamentali li l-familja tħaddan f’pajjiżna. Il-familja hija l-pedament tas-soċjetà Maltija u għaldaqstant insibuha fil-qalba tal-pjanijiet kollha li jittieħdu u fl-azzjonijiet kollha li jitwettqu f’Malta u Għawdex. Huwa proprju għalhekk li jeżisti l-Ministeru għall-Familja sabiex jiġu mħarsa bl-iktar mod effettiv il-bżonnijiet tal-familji Maltin u Għawdxin kollha. Huwa minħabba dan il-fatt ukoll li l-Gvern Malti jagħraf l-importanza tal-Kunsilli Lokali, li permezz tad-devoluzzjoni mill-Gvern Ċentrali għal amministrazzjoni fuq bażi lokali, in-nies tal-komunità jkunu moqdija mill-aħjar mod possibbli.

Il-Ministru Cristina fakkret ukoll li x-xogħlijiet ta’ natura differenti li qed isiru fl-ibliet u rħula Maltin u Għawdxin qegħdin iwasslu sabiex b’mod ħolistiku ntejbu l-kundizzjonijiet tal-familji kollha. Il-Ministru tenniet li l-lokalità ta’ Marsaxlokk li hija magħrufa bħala raħal tas-sajd u tas-sajjieda, mhux biss lokalment iżda anke barra minn xtutna, tiġbed numru ta’ turisti lejha. Dan il-villaġġ magħruf għaċ-ċokon tiegħu li sal-lum il ġurnata jilqa’ madwar 3,062 abitant, qiegħed illum jiftaħ iżjed l-orizzonti tiegħu u aktar nies qegħdin jinġibdu lejn il-ġmiel li joffri.

Il-Ministru Cristina temmet billi rringrazzjat lill-Kunsill Lokali ta’ Marsaxlokk u lid-Dipartiment tal-Bini u Tiswija tad-Djar li tant ħadmu sabiex dan il-proġett jiġi fi tmiemu b’suċċess, filwaqt li awgurat li l-kollaborazzjoni bejn il-Gvern u l-amministrazzjonijiet lokali tkompli bis-sħiħ lejn triq li twassal għal servizz dejjem aħjar b’riżq in-nies tal-lokalità.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

More Press Releases Right arrow