“Inizjattivi biex in-numru ta’ nisa self-employed jiżdied” – Segretarju Parlamentari Edwin Vassallo
“In-numru ta’ self-employed nisa huwa mistenni li jiżdied. Permezz ta’ deċiżjoni li ttieħdet fl-aħħar budget, saret simplifikazzjoni ta’ proċedura, u issa, permezz ta’ dan il-bdil, nisa li jaħdmu fin-negozju tal-familja flimkien ma’ żwieġhom, jistgħu jirreġistraw l-impjieg tagħhom flimkien ma’ żwieġhom.” Is-Segretarju Parlamentari għan-Negozji Żgħar u s-Self Employed, Edwin Vassallo qal dan waqt laqgħa ma’ numru ta’ nisa li jixtiequ jifħu n-negozju tagħhom.
“Id-deċiżjoni tal-Gvern kif imħabbra fl-aħħar budget, tagħmel possibbli li aktar nisa jirreġistraw lilhom infushom li qegħdin jaħdmu. Għaldaqstant, b’din il-proċedura n-negozju ser ikun tnaqqis fil-ħlas ta’ l-income tax, kif ukoll, il-mara li tirreġistra l-impjieg tagħha ikollha s-sehem tagħha f’dak in-negozju mħares.”
L-Onor. Vassallo semma’ wkoll li l-ETC għandha numru ta’ skemi ta’ taħriġ li wkoll huma immirati biex jgħinu aktar nisa jiftħu n-negozju tagħhom. Is-Segretarju Parlamentari Edwin Vassallo awgura li dawn l-iskemi, kif ukoll inizjattivi oħra meħuda mill-Gvern, jistgħu jgħinu biex aktar nisa jkunu self-employed. Fil-fatt, in-numru ta’ nisa self-employed għadu baxx ħafna - 11.9% mis-self employed kollha. “Jiena ċert li bl-għajnuna li qiegħda titwassal, aktar nisa ser isibuha aktar faċli li jibdew jaħdmu għal rashom, u jiena ċert li n-numru ta’ nisa self-employed ser ikompli jiżdied.”
Is-Segretarju Parlamentari temm billi spjega kif fil-ġejjieni, permezz ta’ inizjattivi bħal din u oħrajn, il-Gvern ser ikun qiegħed jaħdem biex jiffaċilita d-daħla fis-settur tal-kummerċ għan-nisa.
Other Press Releases:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959