Left arrow Go Back

“DISINJI TA’ STUDENTI TA’ L-ARKITETTURA LI JISTGĦU JKUNU SORS TA’ INNOVAZZJONI GĦALL-IPPJANAR TA’ INDUSTRIAL PARKS ĠODDA” – IS-SEGRETARJU PARLAMENTARI EDWIN VASSALLO

PR0331
Date Icon 06/03/2007

“Progetti bħal dan, li juru ideat differenti għall-ħolqien ta’ villaġġ ta’ l-artiġjanat, ma humiex bilfors biss eżerċizzju mogħti lill-istudenti.  Fil-viċin ser joħorġu permessi għal zoni industrijali privati, u għaldaqstant hemm il-possibilita’ li jiġu mibnija villaġġi ta’ l-artiġjanat simili għal dawk ta’ Ta’ Qali u ta’ Ta’ Dbieġi li jkunu f’idejn il-privat.  Disinji bħalma huma dawn ta’ l-istudenti jistgħu jkunu l-bażi ta’ proġettar ta’ villaġġi innovattivi li jitħaddmu mis-settur privat.”  Is-Segretarju Parlamentari għan-Negozji Żgħar u s-Self Employed, Edwin Vassallo kien qiegħed jitkellem fil-ftuħ ta’ wirja ta’ disinji u mudelli bbażati fuq il-proġett tal-Villaġġ ta’ l-Artiġjanat ta’ Ta’ Qali. 

Għall-ftuħ ta’ din il-wirja kien hemm preżenti wkoll il-Professur Denis De Lucca, il-Kap tad-Dipartiment ta’ l-Arkitettura, Dr. Vince Buhagiar, ko-ordinatur tad-disinn, u numru ta’ studenti.  L-Onor. Vassallo qal li “din l-inizjattiva tad-Dipartiment ta’ l-Arkitettura għandha tmur lil hinn minn sempliċi eżerċizzju akkademiku u permezz tagħha l-istudenti qegħdin jitgħallmu mhux biss dwar id-diżinn ta’ villaġġ artiġjanali, izda wkoll elementi li huma parti integrali mill-imprenditorija.  L-edukazzjoni fl-imprenditorija ma tfissirx bil-fors lezzjonijiet żejda fuq is-suġġett, iżda permezz ta’ ezerċizzju bħalma kien dan, l-istudenti kellhom jaħsbu fuq aspetti differenti ta’ l-ippjanar ta’ żona.  Permezz ta’ dan l-eżerċizzju akkademiku, l-istudenti kellhom ikunu kreattivi u innovattivi biex ma joħolqux kollha l-istess proġett, u dawn it-tip ta’ innovazzjoni u kreattivita’ għandhom ikunu wkoll parti integrali minn kull negozju.  L-istudenti għandhom jużaw din il-kreattivita’ u l-innovazzjoni mhux biss għal eżerċizzji akkademiċi, iżda wkoll meta jibdew jaħdmu, biex ikunu jistgħu jagħtu l-aħjar servizz lill-klijenti tagħhom.” 

Studenta li ħadet ħsieb l-organizazzjoni tal-wirja spjegat kif il-proġett ġie mogħti lill-istudenti f’Ottubru tas-sena l-oħra u pparteċipaw fih 51 student b’kollox.  Fl-ewwel xahar, l-istudenti ħadmu flimkien biex ifasslu “design brief”.  Dan ikkonsista f’riċerka dwar il-proġett, l-iżjed dwar l-ispazju u l-ħidma tiegħu.  Wara, bdew jaħdmu individwalment u ġew imfassla 51 proġett indiviwali. 

Dr. Buhagiar, li huwa l-kordinatur tad-disinn fit-tielet sena spjega li l-idea tal-proġett li ngħatat lill-istudenti kienet dik li drawwiet u artġjanat tradizjonali jintwerew bħala parti integrali mill-kultura Maltija.  Aspett interessanti ta’ dan il-proġett kien kif ġew mħallta binjiet man-natura ta’ din iż-żona, li kienet mitjar militari, filwaqt li l-istudenti setgħu jużaw materjali għall-bini innovattivi.  Dr. Buhagiar qal ukoll li ingħatat prijorita’ lill-problemi tas-sit, li huwa pjanura, fejn il-kunċett tal-proġett sħiħ ġie qabel id-disinn tal-binjiet individwali. 

Il-Professur Denis De Lucca, Kap tad-Dipartiment ta’ l-Arkitettura faħħar ix-xogħol ta’ l-istudenti li tellgħu din il-wirja tal-proġetti tat-tielet sena dwar id-disinn ta’ mużew ta’ l-artiġjanat interattiv u fil-beraħ f’Ta’ Qali.  Il-Prof. De Lucca spjega li wirjiet bħal dawn dejjem kienu l-aħjar mod biex jitferrxu ideat ġodda dwar l-arkitettura, biex jiġu offruti soluzzjonijiet innovattivi għal problemi li huma site-specific.  Dawn il-problemi jinkludu problemi ta’ spazju, forma u struttura, li dejjem inbidlu skond il-kuntest storiku jew kulturali tal-bniedem.  Għal dan il-għan, din il-wirja hi parti mill-ħidma tad-dipartiment li tesponi lill-istudenti għar-realtajiet li jeżistu barra mill-klassi, biex ikunu ppreparati aħjar għar-relazzjonijiet li jkollhom mal-klijenti tagħhom meta jilħqu bħala periti, u għar-responsabilitajiet tagħhom ambjentali u soċjo-ekonomiċi lejn is-soċjeta. 

Il-Prof. De Lucca temm billi rringrazzja lill-għalliema Dr. Vincent Buhagiar, Perita Audrey Galea u Perit Ruben Borg għall-appoġġ li taw lill-inizjattivi tad-disinn ta’ l-istudenti. 

Is-Segretarju Parlamentari Edwin Vassallo temm billi faħħar din l-inizjattiva u ħeġġeġ lill-istudenti biex ikunu innovattivi fil-proġetti tagħhom u biex dejjem jara l-applikazzjoni ta’ dawn il-proġetti fir-realtajiet tas-suq. 

Il-wirja ser tkun miftuħa għall-pubbliku bejn is-7 u l-20 ta’ Marzu bejn it-0800 u l-1700 fil-Foyer tas-Sala Sir Temi Zammit fl-Universita’ ta’ Malta.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

More Press Releases Right arrow