Left arrow Go Back

Festival Kulturali f’Għawdex f’Marzu

PR0193
Date Icon 14/02/2007

Bil-għan li jissaħħaħ it-turiżmu kulturali għal Għawdex f’wieħed mill-istaġuni l-inqas popolari, il-Kunsill Lokali ta’ l-Għarb b’kollaborazzjoni tal-Ministeru għal Għawdex ser jorganizza festival kulturali mifrux fuq tlett ijiem f’Marzu. Dan ġie mħabbar dalgħodu waqt konferenza ta’ l-aħbarijiet mill-Onor. Giovanna Debono, Ministru għal Għawdex u minn David Apap, Sindku ta’ l-Għarb. 

Seħer il-Punent huwa l-isem ta’ festival kulturali bil-għan li jqanqal interess dwar il-karatteristiċi partikulari tar-raħal pittoresk ta’ l-Għarb. Il-pjazza tar-raħal ser tkun il-punt fokali ta’ dan il-festival fejn ser jittellgħu diversi kunċerti u attivitajiet oħra popolari. Postijiet ta’ interess madwar ir-raħal, fosthom knejjes, kappelli fil-kampanja, mużewijiet u siti storiċi kif ukoll Wied il-Mielaħ, huma nklużi fil-programm ta’ attivitajiet b’tours speċjali organizzati f’dawn l-inħawi. Il-baned lokali u gruppi mużikali, flimkien ma’ personalitajiet lokali, logħob tan-nar u ikel u mużika tipiċi ser ikunu fost l-ingredjenti li mistennija jiġbdu għadd ta’ nies lejn dan ir-raħal Għawdxi. Ma tonqosx l-infiorata li llum qiegħda ssir parti essenzjali mill-mod ta’ ċelebrazzjoni ta’ dan ir-raħal. 

Il-Ministru Debono qalet li Għawdex qiegħed bil-mod il-mod jikseb reputazzjoni għal attivitajiet kulturali li jittellgħu u li jattiraw turiżmu intern u barrani lejn il-gżira, fosthom l-opri liriċi li jinżammu kull sena miż-żewġ teatri ewlenin tal-belt Victoria fil-ħarifa, u l-jiem tal-Karnival fix-xitwa. Hija qalet li l-attivitajiet kulturali organizzati f’Għawdex jistgħu jkunu niċċa turistika oħra li tattira iktar viżitaturi jagħżlu lil Għawdex fl-istaġuni l-inqas popolari, u attivitajiet bħal Seħer il-Punent jistgħu jħallu mpatt dirett fuq l-istaġjonalita’ tal-gżira bħala destinazzjoni turistika.  

Dwar l-istaġjonalita’, il-Ministru Debono fakkret li fid-diskors tal-Budget li għadda l-Prim Ministru ħabbar tnaqqis ta’ 25% fil-ħlas tal-liċenzja għall-istabilimenti tal-catering li joperaw minn Għawdex, filwaqt li l-kumpanija Gozo Channel u stabbilimenti turistiċi oħra f’Għawdex nedew skemi li jippromwovu l-ivvjaġġar b’xejn lejn Għawdex. Il-Ministru Debono fakkret fit-tnedija ta’ magazine l-ġimgħa li għaddiet li jippromwovi btajjel f’Għawdex fost is-suq domestiku filwaqt li qalet li fil-jiem li ġejjin il-Gvern ser ikun qiegħed iħabbar iktar inizjattivi bil-għan li jippromwovi iktar it-turiżmu intern lejn Għawdex fi żmenijiet partikolari tas-sena. 

Il-festival kulturali Seħer il-Punent ser jinżamm fl-Għarb bejn il-Ġimgħa u l-Ħadd, 16 u 18 ta’ Marzu 2007.

DOI - 14.02.2007

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

More Press Releases Right arrow