Left arrow Go Back

JITFAKKAR PIJUNIER TAT-TURIŻMU F’PAJJIŻNA

PR1300
Date Icon 27/09/2006

Fi Triq San Pawl, f’tarf Triq Parades, San Pawl il-Baħar, twaqqaf monument f’ġieħ Mose’ Fenech. Il-monument ġie inawgurat minn Francis Zammit Dimech, Ministru għat-Turiżmu u Kultura li fisser lil Mose’ Fenech bħala pijunier fit-turiżmu, bniedem b’viżjoni ċara f’dan il-qasam, li kienet riflessa bil-ftuħ ta’ numru ta’ lukandi f’Malta.

 Mose’ Fenech beda l-ħidma fil-qasam ta’ l-ospitalita’ f’lukanda f’San Pawl il-Baħar u wara fil-kċina ta’ l-Ammiraljat f’Kastilja. Fi żmien il-gwerra, flimkien ma’ oħtu, mexxa l-‘Winter Gardens’ fix-Xemxija. Lejn l-aħħar tas-snin erbgħin beda jibni l-lukanda ‘Côte ‘Or’ li nfetħet fl-1953 b’bar, ristorant u sitt kmamar tas-sodda. Sal-1959 żied 22 kamra oħra. Wara beda l-proġett tal-lukanda Golden Sands li kellha 118-il kamra. Din bdiet topera fl-1964. Din il-lukanda baqgħet tiżviluppa għal 312 il-kamra u sala tal-konferenzi.

  Fil-bidu ta’ l-1969, Mose Fenech xtara l-Paradise Bay Hotel b’34 kamra u fl-1972 beda jibni The New Paradise Bay Hotel b’182 kamra tas-sodda.  Fl-1980 xtara dik li kellha tkun il-President Hotel f’Ta’ Xbiex,  li huwa semma ‘Hotel Les Lapins’ li nfetħet fl-1987.

 Il-Ministru Zammit Dimech qal li Mose’ Fenech kien wieħed minn dawk il-Maltin li kkontribwixxa ħafna biex l-ekonomija ta’ pajjiżna –  li sa l-akkwist ta’ l-Indipendenza kienet tiddependi għal kollox fuq in-nefqa tas-servizzi Militari Ingliżi – tiġi ristrutturata u tinbena mill-ġdid fuq l-oqsma tat-turiżmu u l-industrija.

 Francis Zammit Dimech qal li ma kenitx b’kumbinazzjoni li l-inawgurazzjoni tal-monument lil Mose’ Fenech kien qed jiġi inawgurat fil-Jum Dinji tat-Turiżmu. Hu qal li dan kien qed isir għaliex Mose’ Fenech għex ħajtu għat-turiżmu u kien għalhekk xieraq li anke l-inawgurazzjoni tal-monument tiegħu ikun sinonimu ma’ dan il-Jum.

 Il-Ministru għat-Turiżmu u Kultura qal li sal-1964 ftit kienu l-lukandi f’pajjiżna. Hu qal li bis-saħħa ta’ l-Aid to Industries Act, il-Gvern ta’ dak iż-żmien ta għajnuna biex jinbnew lukandi ġodda u biex jiġu ristrutturati u modernizzati lukandi eżistenti. Il-Ministru Zammit Dimech qal li dan wassal biex in-numru ta’ lukandi f’pajjiżna kiber ħafna, tant li l-magażin Svediz ‘Traktoren’ ta’ Ottubru 1970, f’artiklu illustrat dwar Malta, fisser lil Malta bħala “Il-Gżira tal-100 Lukanda”.

 Il-Ministru Zammit Dimech qal li dawk kienu s-snin li fihom tqiegħdu l-pedamenti tas-settur turistiku li baqa’ jikber biex illum jagħmel kwart ta’ l-ekonomija nazzjonali.

Il-Ministru għat-Turiżmu u Kutura qal li Mose’ Fenech ħadem biex pajjiżna seta’ kiseb suċċess fil-qasam turistiku, iżda fil-ħidma tiegħu ma nesiex lil dawk li kienu fil-bżonn u hu għalhekk li minbarra li kien pijunier tat-turiżmu f’Malta kien ukoll bniedem filantropiku li għen f’dak kollu li kellu x’jaqsam ma’ San Pawl il-Baħar.

 Il-Ministru Zammit Dimech qal li Maltin bħal Mose’ Fenech kien ħaqqhom jitfakkru għaliex kienet bil-ħidma u s-sagrifiċċji tagħhom li pajjiżna seta’ jkompli jiżviluppa s-settur turistiku, wieħed mill-pilastri ewlenin ta’ l-ekonomija.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

More Press Releases Right arrow