SKOLA SEKONDARJA ĠDIDA F’GĦAWDEX - INVESTIMENT TA’ LM3 MILJUN
Il-kumpless edukattiv li preżentament huwa okkupat mill-unika skola junior lyceum u sekondarja tas-subien f’Għawdex, miċ-Ċentru ta’ l-Eżamijiet ta’ Għawdex u mis-Sala Ninu Cremona se jiġi żviluppat mill-ġdid permezz ta’ proġett infrastrutturali ta’ bini ta’ faċilitajiet edukattivi moderni. Il-proġett, b’investiment ta’ madwar Lm3miljun qed jitwettaq mill-Fondazzjoni għall-Iskejjel t’Għada (FTS) u għandu jkun implimentat fi żmien tlett snin, suġġett għall-approvazzjoni tal-permessi neċessarji mill-Awtorita’ Maltija ta’ l-Ambjent u l-Ippjanar (MEPA).
Dan qalitu dalgħodu l-Onor. Giovanna Debono, Ministru għal Għawdex, waqt konferenza ta’ l-aħbarijiet li saret flimkien mal-Ministru ta’ l-Edukazzjoni Louis Galea, fejn tħabbru l-pjanijiet tal-Gvern għal proġetti kapitali ta’ bini u modernizzar ta’ l-iskejjel tal-Gvern f’Għawdex. Il-Ministeru ta’ l-Edukazzjoni ser iwettaq il-pjan permezz tal-Fondazzjoni għall-Iskejjel t’Għada (FTS). Għall-konferenza ta’ l-aħbarijiet attendew ukoll is-Sur Frank Gatt, Kordinatur tal-Kulleġġ t’Għawdex, is-Sur Ray Fenech u s-Sur Charles Farrugia, Chairman u General Manager ta’ l-FTS rispettivament, is-Sur Joseph Micallef, Segretarju Permanenti fil-Ministeru għal Għawdex, u s-Sinjura Joyce Dimech, Direttur Customer Services (Ministeru għal Għawdex).
Il-Ministru Louis Galea irringrazzja lill-Ministru Giovanna Debono u lill-awtoritajiet ta’ l-edukazzjoni f’Għawdex għall-entużjażmu u l-impenn tagħhom fl-implimentazzjoni ta’ l-istrateġija mħabbra fid-dokument Biex Uliedna Jirnexxu Lkoll, li ġie msaħħaħ bil-framework legali mill-Parlament Malti f’Lulju li għadda. “Jiena konvint li l-istudenti kollha fl-iskejjel tal-Gvern, issa bħala parti mill-Kulleġġ t’Għawdex, se jibbenefikaw minn qabża kbira ‘l quddiem fil-kwalita’ tas-servizzi edukattivi mogħtija. Il-ġenituri u l-għalliema ser ikollhom sodisfazzjon ikbar minħabba t-titjib fil-kwalita’ ta’ l-edukazzjoni għal uliedhom u l-istudenti tagħhom. Aħna ser nikkumplimentaw dan kollu billi niżguraw li l-iskejjel tal-Gvern jipprovdu ambjent fiżiku sabiħ, attraenti u effettiv kif ukoll jipprovdu l-għodda edukattivi kollha neċessarji għal skejjel smart ta’ għada”.
Il-Ministru Debono qalet li l-Ministeru għal Għawdex ilu jwettaq xogħlijiet infrastrutturali biex itejjeb l-ambjent fiżiku fl-iskejjel t’Għawdex fuq bażi kontinwa u dan bħala parti minn programm ta’ xogħlijiet li l-Ministeru għal Għawdex kien fassal fl-1999 wara li sar stock-take tal-bżonnijiet individwali ta’ l-iskejjel. Il-Ministru Debono qalet li waqt diskussjonijiet regolari mal-Ministeru ta’ l-Edukazzjoni u mal-Fondazzjoni għall-Iskejjel t’Għada, ittieħdet id-deċiżjoni li jsir proġett kapitali kbir fil-kumpless tal-liċeo Ninu Cremona minħabba n-natura estensiva ta’ xogħlijiet ta’ tisbiħ u modernizzar li kienu meħtieġa f’din l-iskola biex tipprovdi ambjent modern li jistimola t-tagħlim. Kien għalhekk li ġie deċiż li tinbena skola ġdida minflok tiġi modernizzata l-iskola eżistenti. Dan se jkun l-ewwel proġett li se jitwettaq fil-campus eżistenti ta’ l-iskejjel sekondarji u post-sekondarji t’Għawdex. Iktar proġetti għall-immodernizzar ta’ l-iskola sekondarja tal-Bniet u tas-Sixth Form t’Għawdex jingħataw bidu hekk kif jasal fi tmiemu l-proġett tal-bini ta’ l-iskola tas-subien. FTS se tidħol għal iktar proġetti ta’ modernizzar ta’ skejjel oħra primarji f’Għawdex fuq firxa ta’ snin.
Il-Ministru Debono qalet li l-kobor ta’ dan il-proġett huwa l-ewwel wieħed tat-tip tiegħu għall-edukazzjoni f’Għawdex. L-iskola l-ġdida se tkun mibnija fuq erba’ sulari ‘l fuq mil-livell tat-triq u tinkorpora fiha 45 klassi, 9 laboratorji tax-Xjenzi, 6 workshops tat-Teknoloġija, 4 laboratorji tal-computers, art rooms, klassijiet għall-Home Economics, klassi għan-Needlework, klassijiet għall-Graphical Communications, Resource rooms u faċilitajiet edukattivi moderni fosthom kmamar għall-guidance, Librerija u spazji miftuħa li jistgħu jiġu wtilizzati għall-ħtiġijiet ta’ l-iskola u tal-komunita.
L-iskola ser tkun tista’ takkomoda sa massimu ta’ 1,000 student u se tinkludi inizjattivi li jutilizzaw sorsi ta’ enerġija naturali fosthom permezz ta’ sun pipes biex jiddawlu l-kuriduri, kif ukoll sistema ta’ enerġija solari li tiġi installata fuq il-bejt ta’ l-iskola. L-iskola ser ikollha footprint ta’ madwar 3,300m2b’total ta’ spazju ta’ madwar 13,000m2.
L-iskola l-ġdida ser ikollha wkoll parkeġġ ta’ żewġ sulari mibnija taħt l-art li jakkomoda madwar 700 karozza. Dan il-parkeġġ se jilqa’ għad-domanda ta’ spazju tat-tlett skejjel fil-viċin kif ukoll għad-domanda mill-pubbliku.
Il-proġett se jinkludi wkoll grawnd tal-futboll 7-a-side kif ukoll athletics’ track ta’ 200m li se tintuża mill-iskola waqt il-ħinijiet ta’ l-iskola imma wkoll mill-komunita’ waqt ħinijiet oħra. B’hekk din il-faċilita’ tkun qed tikkumplimenta l-faċilitajiet sportivi l-oħra li joffri l-Kumpless Sportiv t’Għawdex.
Id-daħla ta’ l-iskola l-ġdida ser tkun mit-triq li bħalissa sservi bħala triq sekondarja għall-iskola. B’hekk l-iskola l-ġdida tkun eqreb tal-Kumpless Sportiv t’Għawdex. Ser tinħoloq triq ġdida li tgħaqqad lil Triq Fortunato Mizzi ma’ Triq l-Ewropa sabiex isservi bħala post fejn fih jidħlu l-coachesli jipprovdu trasport lit-tliet skejjel biex hekk ikunu jistgħu jtellgħu u jniżżlu l-istudenti ‘l ġewwa mill-bibien ta’ l-iskola. B’hekk jiżdiedu l-miżuri ta’ sigurta lill-istudenti u tiġi eliminata darba għal dejjem l-inkonvenjenza li tinħoloq ta’ kuljum fit-toroq residenzjali tal-madwar minħabba n-numru ta’ coachesli jkunu qed jipprovdu t-trasport lill-istudenti.
Il-Ministru Debono qalet li dan il-proġett iżomm fuq quddiem nett l-interessi ta’ l-istudenti għaliex ser jipprovdilhom faċilitajiet state-of-the-art li jħarsu lejn kwalita’, sigurta’, ambjent tajjeb u standards ta’ kumdita’. Il-Ministru Debono qalet li l-kumpless edukattiv il-ġdid ser iżid l-ispazji disponibbli għall-istudenti, bid-daqs tal-klassijiet li se jkun darba u nofs ikbar minn dawk eżistenti u bid-daqs tal-laboratorji tal-computers ikun darbtejn dawk tal-lum. L-iskola l-ġdida ser ikollha iktar laboratorji tax-xjenzi filwaqt li se jiżdied l-ispazju għal servizzi edukattivi moderni bħall-korsijiet tat-teknoloġija, u iktar spazji rikreattivi. Il-ħtiġijiet tas-sigurta ser jingħataw prijorita’ b’mod partikolari bil-ħolqien tat-triq għall-użu mit-trasport ta’ l-iskola, filwaqt li ħtiġijiet ta’ aċċessibilita’ jibqgħu ewlenin.
Il-Ministru Debono rreferiet b’mod partikolari għat-tqassim ta’ l-implimentazzjoni tal-proġett, li se jkun maqsum fi tlett fażijiet biex jimminimizza kemm jista’ jkun l-inkonvenjent għall-istudenti u l-għalliema. L-impatt fuq l-iskola fil-fatt ser ikun ftit li xejn għaliex l-ewwel fażi ser tkun tikkonsisti fil-bini ta’ parti mill-iskola fi spazju li llum mhux qed jintuża għall-iskola sekondarja. Dan ifisser li s-sena akkademika timxi kif ippjanata mingħajr ma l-iskola jkollha l-ħtieġa li ssib post alternattiv. Hekk kif jintemm ix-xogħol fuq l-ewwel blokk, il-klassijiet ikunu jistgħu jidħlu fil-parti l-ġdida filwaqt li jibda x-xogħol fuq it-twaqqiegħ ta’ l-iskola eżistenti u l-bini tat-tieni u t-tielet fażijiet.
L-Onor. Giovanna Debono qalet li dan il-proġett ser ikun proġett ieħor sinjifikanti għal Għawdex hekk kif il-Gvern qiegħed għal darb’oħra juri l-impenn tiegħu lejn il-qasam ta’ l-edukazzjoni li huwa wieħed mill-pilastri ewlenin tal-ħidma tal-Gvern, flimkien ma’ l-ekonomija u l-ambjent. Il-proġett ser jikkumplimenta opportunitajiet edukattivi oħrajn li qed jiġu ntrodotti f’Għawdex kif ukoll proġetti oħra b’kofinanzjament ta’ l-Unjoni Ewropea fosthom il-proġett ta’ estensjoni għaċ-Ċentru Għawdxi ta’ l-Arti u l-Artiġjanat Wistin Camilleri f’Għajnsielem u t-twaqqif ta’ Faċilita’ għat-Taħriġ fl-Industrija Turistika fil-Qala. Dawn iċ-ċentri l-ġodda jiffurmaw parti mill-pjan tal-Gvern li jkompli jinvesti b’mod strateġiku f’Għawdex f’dawk l-oqsma li l-iktar jistgħu jħallu riżultati pożittivi għall-komunita’ u għall-ekonomija tal-gżira.
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958