JIDĦOL FL-AĦĦAR FAŻI X-XOGĦOL TA’ RESTAWR FIL-KAPPELLA TAL- MADONNA TAD-DULURI
L-attrezzament kif jixraq lis-sezzjoni tar-restawr qed iħalli l-frott mixtieq. Ix-xogħol studjat, delikat u speċjaliżżat li qed isir f’din il-kappella juri bl-aktar mod ċar kif il-professjonisti, wara li studjaw bir-reqqa l-problema, fasslu l-interventi sabiex ħaddiema speċjalizzati setgħu jwettqu x-xogħlijiet meħtieġa. Dan qalu l-Ministru Ninu Zammit meta kien qed iżur l-aħħar fażi ta’ xogħlijiet li qed isiru fuq ġewwa tal-Kappella tad-Duluri fil-Pieta’.
Ix-xogħol seta’ jinbeda wara li f’April ta’ l-2001 kien sar studju fuq perjodu ta’ sena u nofs fuq l-ammont ta’ umdita` li jżommu l-ħitan ta’ din il-kappella u kif dan l-ammont ta’ umdita` jinbidel matul is-sena. Kontemporanjament ma’ dawn l-istudji, bdew jitneħħew kisjiet ħoxnin ta’ siment, qatran, jablo u kif ukoll passati ta’ tikħil li kienu saru matul iż-żmien bħala interventi sabiex iwaqqfu l-umdita’ fil-ġebla u tfarfir kontinwu bħala konsegwenza naturali ta’ din l-istess umdita`. Dawn l-interventi kienu għamlu ħafna aktar ħsara fuq il-ġebla peress li għalqu l-pori kollha tal-ġebla u għaldaqstant d-deterjorazzjoni seħħet b’mod aktar mgħaġġla.
Il-Ministru spjega li sar ukoll ħafna xogħol ieħor biex jiġi evitat l-ammont ta’ ilma li daħal mill-ħitan tal-kappella. Dan ix-xogħol kien jinkludi water proofing fuq il-bejt kollu tal-kappella u tal-kunvent, tħaffir ta’ trinka fuq wara tal-kappella sabiex l-ilma mill-ġnien li jinstab fuq in-naħa ta’ wara ma’ jkunx jista jmiss mal-ħajt, kif ukoll tħaffru ħafna test holes sabiex jiġi vverifikat jekk hemmx xi ġwiebi magħluqa fil-viċinanzi. Biex jiġi assigurat li ma jippenetrax ilma tax-xita ġol-kappella, tħaffer kanal ta’ madwar sitt piedi fond mad-dawra tal-kappella kollha, liema kanal intradam biż-żrar wara li tpoġġiet xibka speċjali magħrufa bħala geotextile .
L-istudji kkonkludew li, minħabba l-ammont sostanzjali ta’ l-umdita` fil-ħitan hu wieħed għoli, l-unika soluzzjoni biex tiġi kkonservata l-kappella kienet l-applikazzjoni ta’ macro porous plaster li bdiet tiġi applikata fil-bidu ta’ din is-sena. Din it-tahlita tikkonsisti f’tikħila li tiġi applikata f’kisja ħoxna magħrufa bħala sacrificial layer. Dan it-tip ta’ proċess wassal ukoll biex jiġu skoperti u mikxufa features arkitettoniċi li issa ġew restawrati.
Xogħlijiet ta’ din in-natura jirrikjedu dedikazzjoni u speċjalizazzjoni. Xogħol simili sar fuq diversi statwi fl-irħula ta’ pajjiżna bħalma huma l-istatwi ta’ Santa Marija u tal-Madonna ta’ Lourdes fil-Qrendi, ta’ San Gużepp f’Hal-Lija, xogħol li sar fuq il-gallarija tal-Palazz tal-President fil-Belt u xogħol li ntemm riċentament fuq l-istatwa ta’ San Lawrenz fil-Birgu.
Il-Ministru Ninu Zammit temm jgħid li x-xogħol kollu ta’ restawr fil-kappella tal-Madonna tad-Duluri, inkluż il-pagi tal-ħaddiema, ser jiġi jiswa madwar Lm22,000. Minn din is-somma Lm10,000 qed ikunu ffinanzjati mill-Kurja ta’ l-Arcisqof bħala ħlas fuq il-materjal. Ix-xogħol hu mistenni li jitlesta sa’ l-aħħar ta’ Settembru 2006.
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958