PARTEĊIPAZZJONI FI PROGRAMM TA’ L-UNJONI EWROPEA TWASSAL GĦAL ŻIEDA TA’ ATTIVITA’ KUMMERĊJALI BEJN ARTIĠJANI U IMPRENDITURI MALTIN U SQALLIN
“Il-parteċipazzjoni f’dan il-programm, magħruf bħala MedPot wasslet biex imprendituri, lukandiera, artiġjana u studenti Maltin jiltaqgħu ma’ oħrajn mill-istess settur fi Sqallija, fil-lokalità ta’ Sciacca. Ir-riżultat ta’ dan il-programm qiegħed jidher fl-immedjat u r-raġuni għal dan hi li dan il-programm, b’differenza minn oħrajn, kien programm iffukat lejn l-iżvilupp ta’ attività turistika li jkollha interess partikolari fuq l-artiġjanat taċ-ċeramika.” Dan qalu s-Segretarju Parlamentari għan-Negozji Żgħar u s-Self Employed, l-Onor. Edwin Vassallo, waqt konferenza ta’ l-aħbarijiet dwar dan il-programm. Il-parteċipazzjoni ta’ artiġjani u imprendituri Maltin fil-programm ta’ l-Unjoni Ewropea MedPot, wasslet biex:
§ Hemm il-possibilità ta’ organizzazzjoni ta’ vjaġġi li jippromwovu turiżmu bejn Malta u Sciacca.
§ Ser tingħata borża ta’ studju għal tliet gimgħat ġo Sqallija wara li jintagħżel l-aħjar disinn għal prodott artiġjanali.
§ Ser jiġi ppubblikat rapport dwar l-artiġjanat taċ-ċeramika u s-servizzi turistiċi relatati.
§ Ser jiġi mmanifatturat prodott artiġjanali magħruf bħala ‘La Mediterranea’ bejn ċeramisti Maltin u Sqallin.
§ Il-lukandiera li qegħdin jieħdu sehem f’dan il-proġett jaqblu li jippromwovu l-prodott ta’ l-artiġjanat fil-lukandi tagħhom.
§ Studenti Maltin mill-Istitut ta’ l-Arti u Disinn ta’ l-MCAST li pparteċipaw ikunu mfaħħra għall-kapaċitajiet kbar li wrew waqt il-laqgħat li kellhom ma’ studenti oħra.
F’dan il-programm ipparteċipaw 44 persuna, bejn artiġjana, imprendituri fil-qasam turistiku, fosthom sidien ta’ lukandi u aġenziji ta’ l-ivjaġġar u studenti taċ-ċeramika mill-Istitut ta’ l-Arti u d-Disinn ta’ l-MCAST. Il-parteċipazzjoni fil-programm MedPot saret permezz ta’ kollaborazzjoni bejn is-Segretarjat Parlamentari għan-Negozji Żgħar u s-Self Employed; il-Comune di Sciacca; il-Confartigianato Sicilia; is-CNA Sicilia; il-Maltese-Italian Chamber of Commerce; is-Soċjetà Maltija għall-Arti, Manifattura u Kummerċ u Interreg IIIA Italia – Malta.
Is-Segretarju Parlamentari Edwin Vassallo esprima s-sodisfazzjon tiegħu għar-riżultati li ħarġu minn dan il-programm u qal li “l-programm ġie mirbuħ minn fost kompetizzjoni kbira bil-ħsieb li jiġu ġġenerati mal-100,000 Ewro fi skambji kummerċjali sas-sena 2007.”
Waqt iż-żjara, il-parteċipanti kellhom l-opportunità li jipparteċipaw f’numru ta’ workshops li kienu interattivi u posittivi ħafna. Għal dawn il-workshops kien hemm preżenti wkoll rappreżentanti mill-MTA u mill-entitajiet Maltin li kkollaboraw fil-programm. Kien hemm ukoll numru ta’ parteċipanti Sqallin li kienu preżenti għall-workshops. L-għan ta’ dawn il-workshops kien li jiġu diskussi l-possibilitajiet ta’ koperazzjoni bejn Malta u Sciacca bil-ħsieb li jiġi ddisinjat pakkett komuni li għandu jattira t-turisti lejn iż-żewġ lokalitajiet. Dan il-pakkett għandu jgħaqqad t-turiżmu maċ-ċeramika. Dan il-kunċett għandu jkompli jippromwovi l-Mediterran bħala post ta’ l-artiġjanat taċ-ċeramika.
Il-parteċipanti nqasmu fi tliet workshops ewlenin, wieħed dwar is-settur tat-turiżmu, wieħed dwar is-settur taċ-ċeramika, u wieħed għall-istudenti. Waqt il-workshop dwar it-turiżmu kien hemm diskussjonijiet dwar il-possibilità li jiġu kkumbinati vjaġġi lejn Malta u Sciacca, kif ukoll ġiet diskussa l-possibilità ta’ rottot ġodda bejn Malta u Sciacca.
Il-workshop għaċ-ċeramisti kien intensiv ħafna, biċ-ċeramisti Maltin u Sqallin jagħtu ideat dwar l-istil u d-dehra ta’ prodott ġdid ta’ promozzjoni għal Malta u Sciacca. Is-suċċess ta’ dan il-workshopjidher fil-fatt li fl-aħħar tiegħu ntlaħaq ftehim dwar kif ser ikun dan il-prodott.
Il-workshop ta’ l-istudenti mar tajjeb ħafna u l-iSqallin faħħru ħafna l-kapaċitajiet ta’ l-istudenti Maltin, li ddisinjaw oġġetti ta’ ċeramika bħala prova għal-linja l-ġdida.
L-artiġjana li jaħdmu fil-villaġġi ta’ l-artiġjanat ta’ Ta’ Qali u Ta’ Dbieġi ngħataw l-ewwel prijorità fl-għażla biex jipparteċipaw f’dan il-programm, filwaqt li l-operaturi fil-qasam turistiku kienu magħzula mill-MHRA. L-istudenti ġew magħżula mill-għalliema tagħhom fl-Istitut ta’ l-MCAST minn fost dawk l-istudenti li qegħdin jistudjaw iċ-ċeramika. Kien hemm interess partikolari f’dan il-programm minn lukandiera Għawdxin.
Dawn il-parteċipanti huma parti mill-94 parteċipant li s’issa ħadu sehem fi programmi ta’ l-Unjoni Ewropea bħala parti mill-inizjattiva tas-Segretarjat għan-Negozji Żgħar u s-Self Employed li aktar negozjanti jipparteċipaw fi programmi ta’ l-Unjoni Ewropea. Is-Segretarju Parlamentari Edwin Vassallo kompla jgħid li “l-lokalità ta’ Sciacca hija magħrufa fi Sqallija għall-artiġjanat taċ-ċeramika u l-istess lokalità qiegħda tagħmel kull sforz sabiex tibni l-kummerċ li jsostni din il-komunità fuq il-Value Added taċ-ċeramika tradizzjonali li għandha.
“L-artiġjanat tradizzjonali taċ-ċeramika f’din il-lokalità, minkejja l-isfidi kollha, ma ċediex l-isforzi tiegħu għall-importazzjoni, anzi, l-artiġjani baqgħu magħrufa għad-disinn u l-istil tal-prodott partikolari tagħhom u ħadd ma rrikorra għall-importazzjoni ta’ kwalità inferjuri li jkun jista’ jinbiegħ bi prezz irħas, bħalma jiġri ċertu drabi f’Malta. Nemmen li din l-esperjenza għandha tgħin biex l-artiġjani tagħna jħarsu aktar lejn il-ħila tagħhom u jagħtu aktar importanza lejn il-manifattura artiġjanali tal-prodott tagħhom.
“Din l-esperjenza għandha twassal ukoll biex l-istudenti jiddisinjaw prodott li ser jiġi mmanifatturat kemm f’Malta u kemm f’Sciacca u li ser ikun jissejjaħ ‘La Mediterranea’. Il-qofol ta’ dan il-progett kien li permezz ta’ l-interess madwar l-artiġjanat taċ-ċeramika, tkun żviluppata attività turistika fil-perijodi tas-sena fejn, kemm f’Sciacca, kemm f’Malta ma jkunx hemm daqshekk turisti jżuru ż-żewġ lokalitajiet (low season).
Wara s-suċċess ta’ din iż-żjara, is-sħab Maltin u ta’ Sciacca qegħdin jaħdmu flimkien biex jitwettaq dak li ġie miftiehem waqt il-workshops. Bħalissa qegħdin isiru laqgħat ma’ awtoritajiet u organizzazzjonijiet varji li jistgħu jgħinu biex iseħħu l-objettivi ta’ dan il-proġett. Intant, rappreżentanti mis-setturi taċ-ċeramika u t-turiżmu jistgħu jikkuntattjaw rappreżentant tal-proġett (keith.psaila@gov.mt) għal aktar informazzjoni.
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958