TKOMPLI L-KOLLABORAZZJONI FIL-QASAM TA’ L-EDUKAZZJONI OGĦLA BEJN MALTA U L-LIBJA
Il-grupp ta’ ħidma mwaqqaf bejn Malta u l-Libja għal kollaborazzjoni fi proġetti fil-qasam ta’ l-edukazzjoni ogħla ltaqa’ f’Malta f’dawn il-ġranet biex ikompli jwettaq inizjattivi edukattivi. Il-grupp twaqqaf wara ż-żjara uffiċjali li l-Ministru ta’ l-Edukazzjoni, Żgħażagħ u Xogħol, Dr Louis Galea għamel fil-Libja f’Mejju li għadda.
Id-delegazzjoni Libjana kienet immexxija mis-Sotto Segretarju fil-Ministeru ta’ l-Edukazzjoni Ogħla Libjana, Dr Abdelkabir Al Fakhry. Dan kien akkumpanjat minn Dr Suleiman Khoja, Dr Mohamed Sanusi Ben Amer, Rettur ta’ l-Universita Omar El Mukhtar, u Dr Mohamed Muftah, Rettur ta’ l-Universita ta’ Sebha. L-Ambaxxatur Libjan għal Malta, Dr Saad A.E. Elshmani, attenda wkoll għat-taħditiet.
Id-delegazzjoni Maltija tmexxiet mis-Sur Frans Borg, Segretarju Permanenti fil-Ministeru ta’ l-Edukazzjoni, Żgħażagħ u Xogħol, is-Sinjorina Micheline Sciberras, Direttur ta’ l-Iżvilupp tal-Politika u ta’ l-Implimentazzjoni ta’ Programmi, is-Sur Mario Buttigieg, Direttur UE u Relazzjonijijet Internazzjonali, u s-Sinjura Louise Cutajar Davies, Uffiċjal Edukattiv tar-Relazzjonijiet Internazzjonali.
Il-grupp ta’ ħidma kellu laqgħat mal-Ministru Louis Galea u ma’ uffiċjali għolja ta’ l-Universita’ ta’ Malta u ta’ l-MCAST. Fil-laqgħat ġew diskussi u ppjanati proġetti konkreti fejn iż-żewġ pajjizi se jikkollaboraw fil-qasam ta’ edukazzjoni ogħla. Fost dawn il-proġetti diskussi, ġie deċiż li Malta u l-Libja jaħdmu flimkien fuq proġetti li jikkonċernaw it-trasferimenti ta’ credits f’istituzzjonijiet ta’ edukazzjoni ogħla, u fuq programm ta’ tagħlim u taħriġ fl-Ingliż, l-agrikoltura, l-arkeoloġija, l-lingwa Għarbija, u programmi ewro-mediterranji.
Il-grupp ta’ ħidma fassal programm ta’ ħidma u għandu jerġa’ jiltaqa’ fil-Libja fil-bidu tas-sena d-dieħla. Il-Ministru Louis Galea fil-laqgħa tiegħu mal-grupp ta’ ħidma sostna li ż-żmien huwa tajjeb biex din il-kollaborazzjoni tikber u tagħti frott. “L-edukazzjoni saret iċ-ċentru ta’ kull attivita’ u proċess. L-edukazzjoni hija l-bażi ta’ kull aspett ta’ ħajjitna – l-ambjent, il-paċi, l-ekonomija u anke s-saħħa. Meta ntejjbu l-edukazzjoni, nkuni qegħdin intejjbu l-mod kif ngħixu. Bejn Malta u l-Libja minn dejjem kien hemm rispett kbir, u din il-bażi tipprovdi l-opportunita` biex din il-kollaborazzjoni tkun ta’ ġid għaż-żewġ nazzjonijiet,” temm jgħid il-Ministru Louis Galea.
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958