Wirja ta’ Frott u Ħxejjex – Siggiewi
Is-Segretarju Parlamentari responsabli ghall-Biedja u Sajd, Dr Francis Agius, il-bieraħ inawgura wirja ta’ ħxejjex u frott frisk organizzata mill-Kunsill Lokali tas-Siġġiewi. Meta kien qed jindirizza lill-bdiewa presenti, Dr Agius fakkar kif il-Gvern qed ikompli jinvesti f’dan is-settur u fakkar fil-ħidma li saret matul is-sena li għaddiet.
Dr Agius fakkar kif fil-Pitkalija sar investiment ta’ 1.4 miljun euro. Dan l-investiment kien marbut mar-ristrutturar tal-pitkalija taħt il-Ħames Protokoll Taljan biex jitwaqqaf ċentru tal-grading station. L-Istituto Agronomico del Mediterraneo ta’ Bari (IAMB) organizza taħriġ kemm dak prattiku u wkoll dak tekniku. Impjegati mill-Ministeru u membri minn għaqdiet tal-bdiewa segwew taħrig f’Bari l-Italja dwar l-operat tal-pitkalija li għandha grading station ukoll. Fuq pjan li fassal il-Ministeru għal din ir-riforma fil-pitkalija ġew identifikati diversi prioritajiet li fuqhom qed niggwidaw il-bdiewa tagħna bil-għan li l-grading tal-prodott jiddaħħal gradwalment sabiex kulħadd jaddotta ruħu għas-sistema ta’ grading tal-prodott fuq ir-razzett.
Suċċess fil-producers’ organizations
Dr Agius kompla jispjega kif illum fil-biedja tagħna daħħalna l-kunċett gdid ta’ producers’ organization (PO’s) jew l-għaqdiet tal-produtturi. Dan huwa ukoll prodott tar-ristrutturar li qed issir fil-biedja Maltija.. F’dawn l-għaqdiet tal-produtturi nsibu 824 membru. Dawn l-għaqdiet tal-produtturi fasslu operational program li l-ispiża tagħhom ser tiġi tiswa LM275,00. Billi issa aħna membri ta’ l-Unjoni Ewropea, l-istess Unjoni Ewropea ser tħallas LM137,500, nofs l-ispiża totali.
L-Industrija taż-Żebbuġ.
Is-settur taż-żebbuġ, qal Dr Agius, bħala pajjiż Mediterranju ġie identifikat minn dan il-Gvern bħala settur li l-bdiewa tagħna jistgħu jiddiversifikaw fih. Twaqqaf ir-reġistru taż-żebbuġ fejn ġew identifikati 1200 tomna jew (140 ettaru). In-numru uffiċjali rikonoxxut ta’ għassara li jipproduċu ż-żejt taż-żebbuġa hu ta’ 3 f’Malta u wieħed f’Għawdex. Il-produzzjoni fl-2004 kienet ta’ 10 tunnellati ta’ żejt u din is-sena din telgħet għal 120 tunnellata; 40 minnhom f’Għawdex.
Is-settur tad-dwieli jikber minn 710 ettaru għal 840 ettaru.
Is-settur tad-Dwieli qed jiffjorixxi u qed naraw ukoll investiment qawwi minn naħa ta’ dawn il-kumpaniji Maltin, qal Dr Agius. Tajjeb li wieħed isemmi li l-Gvern huwa impenjat li anke hawn jagħti l-għajnuna kollha tiegħu ħalli b’hekk inkomplu nwettqu l-politika tagħna li nikkompetu u li nippromwovu l-inbid tagħna.
Fis-sena 2001 kellna 345 ettaru jew inkella cirka 3000 tomna ta’ dwieli. Fl-2004 dawn telgħu għal 710 ettari jew 6300 tomna ta’ dwieli. Fl-2005 il-figura telgħet għal 840 ettaru li huma ċirka 7500 tomna ta’ dwieli. Dan ifisser żieda ta’ iktar minn 1200 tomna f’sena. Dan ifisser li l-bdiewa għandhom fiduċja f’dan is-settur tant li qed jimpenjaw ruħhom biex iħawlu d-dwieli u anke li l-bidwi qed jitgħallem jiddiversifika ir-raba’ tiegħu. Fl-Għammieri nxtara l-apparat tal-microvinification u sar laboratorju għall-inbejjed li minnu ser jibbenefikaw l-għassara.
Matul is-sena li għaddiet b’kollox għasarna 60,000 hectolitres ta’ inbid. Diġa’ tfasslet il-liġi Nazzjonali ta’ l-inbid li tkopri inbid ta’ kwalita’ prodott f’reġjun determinat dik li hija mgħarufa bhala id-DOK (Denominazzjoni ta’ oriġini kontrollata). Ma’ din il-liġi ser ikun kopert ukoll ILT (Inbid ta’ Lokalita’ Tradizzjonali). It-tfassil ta’ din il-liġi bħalissa jinsab għand l-għassara ħalli jkunu jistgħu jagħtu l-kummenti tagħhom. Il-Gvern qed jippjana illi mill-programm ta’ l-Unjoni Ewropea Interreg arcimed ikun jista’ jibbenefika madwar 3 miljun euro biex tinbena l-enoteka fil-Buskett. Grupp ta’ esperti Taljani qegħdin jgħinu lill-Ministeru biex wara li jitfassal il-ftehim dan il-grupp ikun jista’ jmexxi x-xogħlijiet skond il-programm miftiehem.
Dr Agius għalaq il-messagg tieghu billi rringrazzja il-bdiewa talli qed jikkoperaw biex ikompli b’dan ir-ristrutturar li qieghed isir f’dan il-qasam. “Grazzi ukoll lilkom il-konsumaturi talli tixtru l-prodott frisk lokali u b’hekk tkunu qed tgħinu il-bdiewa tagħna”, temm jghid Dr Agius.
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958