Impenn tal-Gvern favur mentalita’ imprenditorjali fis-soċjeta’ tagħna
“Wara li ġie ffirmat Memorandum of Understanding bejn is-Segretarjat għan-Negozji Żgħar u s-Self Employed u l-MCAST, illum qegħdin inniedu dan il-proġett bi sħubija taħt dan il-qafas. Dan il-proġett ser jagħti l-opportunita lil numru ta’ studenti biex jiksbu esperjenzi li ser jgħinuhom meta jiġu biex jidħlu fid-dinja tax-xogħol.” Is-Segretarju Parlamentari Edwin Vassallo ħabbar dan waqt konferenza ta’ l-aħbarijiet flimkien mal-Prinċipal ta’ l-MCAST, Frank Edwards, u s-Chief Executive Officer ta’ l-ETC, Sue Vella.
Is-Segretarjat Parlamentari għan-Negozji Żgħar u s-Self Employed, flimkien mal-Korporazzjoni ta’ l-Impjiegi u Taħriġ (ETC) u l-MCAST qiegħed jistieden lil studenti ta’ l-MCAST biex jipparteċipaw fi proġett ta’ mobilita’ li ser ikun qiegħed isir bl-għajnuna finanzjarja tal-Programm Leonardo da Vinci. Permezz ta’ dan il-progett, li huwa ffinanzjat mill-Unjoni Ewropea, 51 student fl-apprentistat ma’ l-ETC ser ikunu qegħdin jingħataw l-opportunita’ sabiex jitharrġu aktar fuq is-self employment. Dan il-proġett huwa ffinanzjat kompletament mill-Unjoni Ewropea, u hu mistenni li jiswa mal-EUR 80,000.
L-Onor. Vassallo kompla billi qal li “dan il-proġett ser jagħti iċ-ċans lil studenti Maltin sabiex imorru barra minn Malta għal tlett gimgħat biex jieħdu esperjenza ta’ xogħol f’kumpanija jew industrija differenti. Minbarra li l-istudenti jkunu jistgħu jizviluppaw l-kapaċitajiet tagħhom bħala ħaddiema, dan il-proġett ser ikun qed jagħtihom iċ-ċans li jsiru jafu aktar lilhom innifshom, u jrawmu mentalita’ imprenditorjali b’perspettiva differenti lejn ix-xogħol u lejn is-self employment.
“Biex dan il-progett isehh, ser ikollna l-għajnuna ta’ skejjel, aġenziji u kumpaniji minn disa’ pajjiżi differenti, fosthom l-Italja, l-Awstrija, l-Belġju, l-Irlanda, u l-Ġermanja. Il-postijiet tax-xogħol jistgħu jkunu f’pajjizi differenti skond it-tip ta’ xogħol u vokazzjoni li qegħdin jistudjaw l-istudenti. Din l-esperjenza ssir fi gruppi ta’ mhux inqas minn erba’ apprentisti li jkunu jaħdmu fl-istess qasam. Peress li l-postijiet huma limitati, jista’ jkun li jkun hemm bżonn li jsiru interviews.”
Illum saret sejħa għal studenti ta’ l-MCAST li qegħdin jagħmlu l-istudju tagħhom f’dawk il-vokazzjonijiet bħalma huma ċ-ċeramisti, electricians, hairdressers, mechanics, plumbers, panel beaters, mastrudaxxi, welders, printers, draughtspersons, technicians u oħrajn.
Is-Segretarju Parlamentari qal li “huwa l-impenn tal-Gvern li naraw li l-istudenti tagħna ikunu aktar kompetittivi. Il-Gvern qiegħed jinvesti fit-tul fl-istudenti Maltin sa minn etajiet bikrija. Illum qegħdin inħabbru proġett ieħor li ser ikompli jagħti dimensjoni ta’ imprenditorija lill-korsijiet vokazzjonali li l-istudenti tal-MCAST qegħdin jistudjaw. Dan huwa proġett li għandu jkompli jnissel fl-istudenti tagħna dik il-mentalita’ imprenditorjali li tant għandna bżonn fis-soċjeta’ tagħna. Il-Gvern qiegħed jaħdem b’kollaborazzjoni sħiħa ma’ diversi Ministeri, Dipartimenti u Awtoritajiet oħra f’dan il-qasam sabiex nirnexxu f’din il-missjoni komuni tagħna. Is-Shubija tal-lum, ma’ l-ETC u mal-MCAST hija xhieda ta’ dan. Dan il-progett għandu jgħin sabiex inkomplu nassistu lill-istudenti tagħna sabiex ipoġġu fil-prattika dak li qegħdin jitgħallmu.”
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958