Left arrow Go Back

STQARRIJA KONĠUNTA MILL-MINISTERU TAL-ĠUSTIZZJA U L-INTERN U L-MINISTERU GĦALL-INVESTIMENT, INDUSTRIJA U TEKNOLOĠIJA TA’ L-INFORMAZZJONI - MAGĦLUQ IŻ-ŻMIEN GĦALL-OFFERTI GĦAL TIGNÉ DEVELOPMENT COMPANY LIMITED

pr0531
Date Icon 06/04/2006

Id-Diviżjoni tal-Propjetà tal-Gvern illum ħabbret il-lista ta’ l-offerti li waslula għax-xiri ta’ Tigné Development Company Limited li hi s-sussidjarja ta’ l-Air Malta li topera l-Crowne Plaza Hotel f’tas-Sliema. Iż-żmien biex isiru l-offerti għalaq fl-10 ta’ dal-għodu. 

Id-Diviżjoni tal-Propjetà tal-Gvern irċeviet seba’ offerti kif ġej: 

1.      Imperial Point Company Limited (Lm23,300,000);

2.      Fort Cambridge Company Limited (Lm23,000,000);

3.      NYSIR Malta Limited (Lm22,100,000);

4.      Hili Property Development Limited (Lm13,010,100);

5.      Schembri & Sons Limited (Lm12,800,000);

6.      Cambridge Construction Limited (Lm11,530,000);

7.      Cambridge Pace Limited (Lm11,100,000). 

Minbarra l-kriterju finanzjarju, l-offerenti indikaw ukoll l-intenzjonijiet tagħhom rigward l-obbligu li tat is-sejħa għall-offerti li jinżammu l-persuni impjegati ta’ Tigné Development Company Limited li llum jaħdmu mal-Crowne Plaza Hotel. 

Fuq il-bażi ta’ l-offerti rċevuti, it-Taqsima issa ser taghmel ir-rakkomandazzjonijiet taghha lill-Gvern. 

L-iżvilupp tas-sit fejn illum tinsab il-Crowne Plaza Hotel irid isir skond il-“Fort Cambridge Development Brief” ippubblikat mill-Awtorità dwar l-Ambjent u l-Ippjanar f’Jannar 2006.  

(http://www.mepa.org.mt/Planning/factbk/Briefs/Fort_Cambridge/Fort_Cambridge_DB.pdf) 

Il-bejgħ ta’ din il-kumpanija u l-propjetà tagħha sar bħala parti mill-programm ta’ ristrutturar finanzjarju u l-patt ażjendali ta’ l-Air Malta. Il-ħsieb tar-ristrutturar kien li jiffoka l-attività tal-linja ta’ l-ajru fuq l-attivitajiet ċentrali għaliha: il-ġarr tal-passiġġieri bl-ajru minn post għall-ieħor.  

L-Air Malta tradizzjonalment kienet attiva fis-settur ta’ l-ospitalità minħabba li fiż-żmien meta sar dan l-iżvilupp kien hawn nuqqas ta’ provvista ta’ stabbilimenti turistiċi. Illum l-ospitalità turistika hi pprovduta f’livelli eċċellenti u f’ambjent kompetittiv mis-settur privat u m’għad baqa’ ebda lok għall-Gvern jew kumpaniji propjetà tiegħu li joperaw f’dan is-settur b’kompetizzjoni ma’ investimenti privati.

Il-bejgħ ta’ din is-sussidjarja ta’ l-Air Malta ser jissarraf f’kontribut għat-titjib tal-finanzi tal-linja ta’ l-ajru u ta’ l-istabbilità finanzjarja tagħha.  

Matul l-aħħar snin Crowne Plaza Hotel kienet qed titlef madwar Lm300,000 fis-sena. 

S’issa l-Air Malta kellha tkopri hi t-telf li kienet qed tagħmel il-Crowne Plaza Hotel li sal-bejgħ tagħha kien jammonta għal madwar Lm4 miljun. L-Air Malta issa ser tirkupra dan l-infieq kif ukoll il-valur tal-propjetà tagħha bħala lukanda. Wara li jitnaqqsu l-ispejjeż tal-proċess tal-bejgħ tal-propjetà u djun pendenti oħra, l-Air Malta qed tistenna li tirċievi ftit anqas minn Lm11 miljun minn dan il-bejgħ bil-Gvern jieħu l-bqija ta’ l-ammont rikavat. 

L-iżvilupp tas-sit ta’ Fort Cambridge u s-sit fejn illum hemm il-Crowne Plaza Hotel se jtejjeb l-ambjent urban ta’ l-inħawi u l-ħarsien tal-wirt storiku fis-sit waqt li jikkumplimenta l-iżviluppi l-oħra li qed iseħħu f’din iż-żona tas-Sliema.

Share this Press Release Icon socials Icon socials Icon socials Icon socials

Other Press Releases:

STQARRIJA MILL-MINISTERU GĦALL-INKLUŻJONI U L-VOLONTARJAT U MILL-MINISTERU GĦALL-POLITIKA SOĊJALI U L-FAMILJA  Malta tlaqqa’ esperti Ewropej dwar l-inklużjoni tat-tfal b’diżabilità u s-sostenn lill-familji tagħhom

PR261956

STQARRIJA MILL-MINISTERU GĦALL-INKLUŻJONI U L-VOLONTARJAT U MILL-MINISTERU ...

PRESS RELEASE BY THE MINISTRY FOR HOME AFFAIRS AND SECURITY  Europe’s security is directly linked to that of the Mediterranean – Minister Glenn Bedingfield

PR261955en

PRESS RELEASE BY THE MINISTRY FOR HOME AFFAIRS AND SECURITY Europe’s secur...

More Press Releases Right arrow