Left arrow Go Back

Programm ta’ l-Unjoni Ewropea dwar l-artiġjanat –  EUR 295,000 investiti fis-settur ta’ l-artiġjanat

pr0183
Date Icon 08/02/2006

“Għal darb’oħra qegħdin nagħmlu sejħa pubblika għal min jixtieq jieħu sehem fi programm ta’ l-Unjoni Ewropea u li jaħdem fis-settur tal-manifattura taċ-ċeramika.  Is-Segretarjat Parlamentari għan-Negozji Żgħar u s-Self Employed applika biex jieħu sehem fil-programm ta’ l-Interreg, u issa ser inkunu qegħdin naħdmu biex artiġjana Maltin jipparteċipaw f’dan il-proġett.”  Dan qalu s-Segretarju Parlamentari għan-Negozji Żgħar u s-Self Employed, Edwin Vassallo waqt konferenza ta’ l-aħbarijiet fejn saret din is-sejħa pubblika.   

Is-Segretarjat ser ikun qiegħed jipparteċipa f’dan il-Programm flimkien mal-lokalitajiet ta’ Sciacca u Burgio fi Sqallija, mas-Socjeta` Maltija għall-Arti, Manifattura u Kummerċ, mal-Maltese Italian Chamber of Commerce, mal-Confartigianato u mas-CNA.  Il-lokalitajiet ta’ Sciacca u Burgio fi Sqallija, huma famużi għall-manifattura taċ-ċeramika u artiġjana Maltin ser ikollhom l-opportunita` li jaqsmu esperjenzi ma’ artiġjana minn dawn il-lokalitajiet.  Il-parteċipazzjoni f’dan il-programm min-naħa tas-Segretarjat saret ukoll b’kollaborazzjoni ma’ l-Impetus Europe Consulting Group.   

Is-Segretarju Parlamentari Vassallo kompla billi jgħid li “l-parteċipazzjoni f’dan il-programm huwa pass ieħor fl-impenn tagħna li naċċertaw li 300 imprenditur Malti jipparteċipaw fi programmi ta’ l-Unjoni Ewropea.  Fil-fatt, permezz ta’ dan il-programm ser ikun hemm 50 imprenditur li ser jipparteċipaw fi proġett ta’ l-Unjoni Ewropea.  Dan il-programm għandu ħafna vantaġġi għal dawk kollha li jaħdmu fis-settur taċ-ċeramika u fil-fatt qiegħed isir investiment totali ta’ EUR 295,930 f’dan il-proġett, li jissarfu f’opportunitajiet għal artiġjana Maltin u Taljani.  70% minn dan l-ammont huma fondi ta’ l-Unjoni Ewropea, filwaqt li t-30% l-oħra ser isiru permezz ta’ kontribuzzjonijiet, kemm fi flus u kontribuzzjonijiet oħra, minn dawk li qegħdin jipparteċipaw fil-proġett. 

L-objettivi ta’ dan il-proġett huma ħafna, u fost l-oħrajn ser ikun hemm:

§          Feasibility Study b’kollaborazzjoni ma’ l-Italja u pajjiżi oħra fil-Mediterran

§          Studju, diżinn u ħolqien ta’ prodotti Mediterranji taċ-ċeramika u ċ-ċaqquf

§          Vjaġġi apposta u reklamar ta’ artiġjanat f’Malta u Sqallija

§          Żvilupp ta’ web-site dwar l-artiġjanat

§          Lista ta’ ċeramisti Maltin

§          Borża ta’ studju fi Sqallija għal studenti tal-kulleġġ ta’ l-MCAST ta’ l-Art and Design

§          25 ċeramist jkunu jistgħu jattendu symposium dwar din is-sengħa fi Sqallija

§          20 aġenzija tal-vjaġġi ser jikkollaboraw ma’ sħab Sqallin dwar skambji turistiċi bejn iż-żewġ pajjiżi

§          Ħames rappreżentanti ta’ skejjel ser ikunu jistgħu jitgħallmu aktar dwar il-prodotti artiġjanali u dwar ċeramika fl-Italja. 

Hemm numru ta’ benefiċji li ser tieħu Malta bil-parteċipazzjoni f’dan il-programm.  Fost dawn hemm:

§             Promozzjoni aħjar taċ-ċeramika u ċ-ċaqquf f’Malta

§             Lista ta’ ċeramisti Maltin

§             Studju tal-faċilitajiet turistiċi rrelatati ma’ l-industrija ta’ l-artiġjanat

§             Kollaborazzjoni aħjar ma’ artiġjana Sqallin li huma sħab f’dan il-proġett.

§             Identifikazzjoni ta’ kollaborazzjoni fil-ġejjieni bejn iż-żewġ pajjiżi fl-industrija ta’ l-artiġjanat. 

L-Onor. Edwin Vassallo kompla billi qal li “l-impenn tal-Gvern huwa li jara li negozji żgħar iħarsu lejn is-swieq f’pajjiżi oħra ta’ l-Unjoni Ewropea, għaliex f’dawk is-swieq hemm possibiltajiet fejn inkabbru n-negozji tagħna.  Fil-qasam tal-manifattura taċ-ċeramika rridu nħarsu lejn manifattura li twassal għall-produzzjoni ta’ prodotti b’valur miżjud.  Jekk ikollna dawn il-prodotti ta’ kwalita` għolja biss, inkunu kapaċi nilqgħu għall-isfida li jiffaċċja l-artiġjanat Malti minn prodotti importati, partikolarment miċ-Ċina. 

“Attenzjoni partikolari ser tingħata lil negozji li għandhom il-konvenju f’Ta’ Qali, għaliex hemmhekk il-Gvern ukoll huwa mpenjat li jara li dawk is-sidien jirritornaw għall-manifattura b’valur miżjud, manifattura ta’ kwalita`, oriġinalita` u ġenwinita`.  Dan il-programm huwa maħsub li jlaqqa’ flimkien artiġjana li jispeċjalizzaw fil-manifattura ta’ ċeramika minn reġjuni differenti u qiegħed jinħadem bi sħab bejn Malta u Sqallija.” 

Fi tmiem il-konferenza ta’ l-aħbarijiet, is-Segretarju Parlamentari spjega li “d-deċiżjoni li dan il-programm jiġi mniedi ġo kulleġġ ta’ l-MCAST huwa għaliex attenzjoni partikolari ser tingħata lil ex-studenti ta’ dan il-kulleġġ li diġa’ tħarrġu fil-manifattura ta’ dawn il-prodotti, u lil studenti li bħalissa qegħdin jitgħallmu t-teknika tal-produzzjoni taċ-ċeramika.”

Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAL-PRIM MINISTRU  “Meta nsaħħu l-MCAST inkunu qed ninvestu fil-kapaċità tal-pajjiż li jimxi ’l quddiem” – Il-Prim Ministru Robert Abela

PR261951

STQARRIJA MILL-UFFIĊĊJU TAL-PRIM MINISTRU “Meta nsaħħu l-MCAST inkunu qed ...

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

More Press Releases Right arrow