Left arrow Go Back

IL-GVERN IRID ISAĦĦAĦ U JKABBAR L-UNIVERSITÀ

pr0173
Date Icon 07/02/2006

Il-Gvern appunta l-membri tiegħu fuq il-Kunsill ta’ l-Universita` kif titlob il-liġi dwar l-edukazzjoni.  Skond il-liġi, l-Prim Ministru jaħtar tnax-il membru li jirrappreżentaw l-interess ġenerali tal-pajjiż filwaqt li l-Ministru ta’ l-Edukazzjoni jaħtar ir-rappreżentant tiegħu. Il-Kunsill ta’ l-Università hu magħmul minn rappreżentanti ta’ l-akkademiċi, ta’ l-istudenti, u tal-ħaddiema l-oħra; kif ukoll minn rappreżentanti tal-Gvern. Il-Kunsill hu l-ogħla organu ta’ tmexxija ta’ l-Università. L-ismijiet tal-membri maħtura mill-Gvern jidhru fil-lista meħmuza. 

Il-Ministru ta’ l-Edukazzjoni, Żgħażagħ u Xogħol, Louis Galea  iltaqa` mal-membri tal-Kunsill li ħatar il-Gvern hekk kif qed jidħlu għall-kariga tagħhom. Il-Ministru Louis Galea fisser il-funzjonijiet tal-Kunsill ta’ l-Università kif huma stabbiliti fil-liġi. Huwa spjega li l-politika kostanti tal-Gvern hi r-rispett għall-awtonomija u l-libertà akkademika ta’ l-Università kif imfissra fil-liġi dwar l-edukazzjoni, li dan il-Gvern kien għadda fl-1988. 

Louis Galea spjega li l-Gvern qed jaħdem biex isaħħaħ u jkabbar l-oqsma ta’ l-edukazzjoni ogħla u ta’ l-edukazzjoni vokazzjonali u ta’ taħriġ. “L-Università hi istituzzjoni nazzjonali ta’ l-aqwa importanza. Bis-saħħa tagħha l-poplu Malti u Għawdxi seta` jkollu l-mexxejja tiegħu u l-professjonisti fl-oqsma kollha ekonomiċi, soċjali, kulturali u politiċi. Il-Gvern investa bil-kbir fl-Università biex illum qed taqdi ma’ l-10,000 student, fil-maġġoranza tagħhom nisa.” 

Louis Galea fisser li l-pajjiż jeħtieġ jilħaq livell ogħla ta’ żvilupp paragunabbli ma’ dak ta’ pajjiżi oħra ewropej. In-numru ta’ żgħażagħ u adulti, Maltin u Għawdxin, li jmorru l-Università illum jilħaq it-22%. Il-Gvern qed jaħdem biex ikabbar l-opportunitajiet ta’ edukazzjoni terzjarja bl-iskop li din il-figura titla’ għall-35%. 

Il-Gvern inkariga l-grupp li mexxa is-sur Roderick Chalmers biex jagħmel rakkomandazzjonijiet dwar il-miżuri meħtieġa biex l-Università u l-qasam kollu ta’ edukazzjoni ogħla jkollu bażi finanzjarja tajba, li  kapaċi ssostni sew numru akbar ta’ studenti, kif ukoll kwalità ta’ korsijiet u ċertifikati li jkunu rikonoxxuti fid-dinja kollha. Ir-Rapport Chalmers irrakkomanda wkoll it-twaqqif ta’ Kummissjoni għall-Edukazzjoni Ogħla li għada kif twaqqfet. 

Il-Ministru Galea fisser li l-Gvern qed jaħtar il-membri tiegħu fuq il-Kunsill ta’ l-Università f’mument importanti ħafna fl-istorja ta’ l-edukazzjoni f’Malta. “Il-Gvern qed jaħdem ma’ dawk kollha nvoluti biex iwettaq proċess ta’ riformi u aġġornament tas-sistema kollha edukattiva. Fis-settur ta’ l-edukazzjoni ogħla l-Gvern irid jara żvilupp fit-tliet oqsma: dak ta’ l-Università, ta’ l-MCAST, u tas-settur privat.  

Il-mira hi doppja: biex aktar Maltin u Għawdxin ikollhom l-aqwa opportunitajiet għal studju, taħriġ u riċerka f’dan il-livell, u biex Malta issir ċentru ta’ servizzi edukattivi għall-barranin,” temm jgħid Louis Galea.

Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAL-PRIM MINISTRU  “Meta nsaħħu l-MCAST inkunu qed ninvestu fil-kapaċità tal-pajjiż li jimxi ’l quddiem” – Il-Prim Ministru Robert Abela

PR261951

STQARRIJA MILL-UFFIĊĊJU TAL-PRIM MINISTRU “Meta nsaħħu l-MCAST inkunu qed ...

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

More Press Releases Right arrow