Left arrow Go Back

IL-GVERN IĦABBAR RIFORMA FIS-SERVIZZ TAT-TAXIS

pr0119
Date Icon 28/01/2006

Il-Ministeru għall-Iżvilupp Urban u Toroq u l-Awtorità dwar it-Trasport ta’ Malta, fil-ġimgħat li ġejjin ser ikunu qed jimplimentaw riforma fil-qasam tat-trasport bit-taxis f’Malta u Għawdex. 

Din ir-riforma hija intiża biex is-servizz isir jappella aktar għall-użu mill-pubbliku bl-introduzzjoni ta’ miżuri li jtejjbu l-imġieba u d-dixxiplina tax-xufiera, kif ukoll miżuri oħra biex il-ħlas tan-nollijiet ikunu kontrollati aħjar permezz ta’ l-installazzjoni ta’ taxi-meter fuq kull vettura. 

Din ir-riforma qed tiddaħħal wara sena u nofs ta’ negozjati bejn il-Gvern, l-Awtorità u White Taxis Licensed Amalgamated (WTLA) li tirrappreżenta l-maġġoranza tas-sidien u xufiera tat-taxis. L-istess negozjati kienu wasslu għal titjib ieħor fis-servizz, fosthom organizzazzjoni aħjar fiż-żona madwar it-Terminal tal-Passiġġieri tal-Cruise Liners, l-introduzzjoni ta’ taxi booths fl-Ajruport Internazzjonali ta’ Malta u fit-Terminal tal-Passiġġieri tal-Cruise Liners, u titjib fl-infurzar mill-ADT bl-istallazzjoni ta’ CCTV cameras fl-inħawi fejn joperaw it-taxis.  

Ir-riforma li ġiet approvata mill-Kabinett tal-Ministri aktar kmieni din il-ġimgħa, tinkludi miżura biex jiġi ntrodott kodiċi ta’ kondotta għas-sidien u xufiera. L-għan ta’ dan l-eżerċizzju huwa li tiddaħħal għodda biex imġieba ħażina mix-xufier jew għoti ta’ servizz ħażin ikunu jistgħu jiġu ndirizzati mingħajr telf ta’ żmien, u każijiet ta’ ksur tar-regolamenti tinħarġilhom multa li jew tiġi mħallsa mmedjatament jew tiġi kkontestata quddiem tribunal indipendenti. Fl-istess ħin, l-Awtorità ser taġġorna d-database tas-sewwieqa bl-introduzzjoni ta’ tags ġodda li ser iġorru barcode u ritratt, li jingħataw biss jekk is-sewwieq u s-sid tat-taxi jiffirmaw il-kodiċi ta’ kondotta. Ser isir ukoll tibdil fir-regolamenti biex tiżdied l-uniformità fid-daqs u l-għamla tal-vetturi li jintużaw bħala taxis filwaqt li ser isir obbligatorju l-ilbies ta’ uniformi u tags mis-sewwieqa. Dan il-proċess ser jitlesta sal-31 ta’ Marzu 2006.  

Il-kodiċi ta’ kondotta jinkludi wkoll dispożizzjoni biex it-tag tiġi irtirata f’każ ta’ reati serji bħal reżistenza mix-xufier, vjolenza, serq fuq il-passiġġieri u sewqan taħt l-influenza ta’ sustanzi pprojbiti. 

Miżura oħra li ser tiddaħħal f’din ir-riforma hija d-dħul mill-ġdid tat-taxi meters. Kull taxi ser tkun mgħammra b’dawn il-meters sal-1 ta’ Mejju meta l-użu tagħhom isir obbligatorju. Id-dħul ta’ dawn it-taxi meters kien possibbli wara li l-Awtorità dwar it-Trasport diġa` approvat ta’ l-anqas mudell wieħed li jista’ jintuża.  

Ir-riforma taħseb ukoll biex tintroduci mezzi ta’ taħriġ u ċertifikazzjoni għal operaturi fis-servizzi ta’ trasport. Fl-aħħar ġimgħat, l-Awtorità dwar it-Trasport u l-Awtorità tat-Turiżmu laħqu ftehim biex jorganizzaw seminars ta’ taħriġ għal operaturi f’dan il-qasam. Is-seminars ser isiru anke b’għajnuna finanzjarja mill-Unjoni Ewropea. 

L-ewwel fażi ta’ dan it-taħriġ tiġi fi tmiemha din is-sena u matulha ser issir iċ-ċertifikazzjoni ta’ 264 operatur fit-trasport pubbliku, li jinkludu wkoll bosta sewwieqa tat-taxis. Dan il-proċess ser ikompli sakemm l-operaturi kollha f’dan il-qasam jingħataw it-taħriġ meħtieġ.  

Il-Gvern huwa konvint li b’rieda tajba mill-partijiet konċernati kollha, is-servizz tat-taxis f’pajjiżna jista’ jsir wieħed mill-assi ta’ pajjiżna, wkoll fejn jidħol it-turiżmu. Din ir-riforma, għalhekk, għandha l-għan li telimina il-perċezzjoni ħażina li għandu l-pubbliku dwar dan is-settur. Fl-istess ħin, dawn il-miżuri - b’mod speċjali l-introduzzjoni tat-taxi meters - għandhom iqarrbu lill-pubbliku ġenerali biex jibda jagħmel aktar użu minn dan is-servizz.  

Share this Press Release Icon socials Icon socials Icon socials Icon socials

Other Press Releases:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

More Press Releases Right arrow