JIGGRADWAW L-EWWEL STUDENTI FIL-HIGHER NATIONAL DIPLOMA MILL-MCAST
“Issa li għaddew l-ewwel ħames snin formattivi mill-fondazzjoni ta’ l-MCAST, il-Gvern beda x-xogħol biex jgħaddi l-Kulleġġ mit-tieni fażi ta’ progress u tkabbir tiegħu”. Dan ħabbru l-Ministru Galea meta ndirizza l-istudenti u l-ġenituri waqt iċ-ċerimonja tal-gradwazzjoni ta’ l-MCAST li saret fil-kumpless sportiv tal-Kottonera. Fiċ-ċerimonja tkellmu wkoll is-sur Frank Edwards, il-prinċipal ta’ l-MCAST, is-sur Victor Scicluna, il-president tal-Bord tal-Gvernaturi u Matthew Falzon Barthet, student mill-Istitut ta’ l-Arti u d-Disinn, MCAST.
F’din l-okkażjoni gradwaw 573 student/a, 436 minnhom fit-tielet livell u 137 fir-raba’ livell (Higher National Diploma or equivalent). Din hija l-ewwel darba fl-MCAST li qed jigradwaw studenti fil-Higher National Diploma. Bħalissa l-MCAST jilqa’ fih 4,000 student/a.
Il-Ministru Louis Galea fisser li l-miri ta’ din il-fażi ta’ żvilupp ta’ l-MCAST huma:
§ Kwalità aktar għolja tal-korsijiet u taħriġ;
§ Numru akbar ta’ studenti fl-MCAST;
§ Ftehim biex l-istudju u taħriġ fl-MCAST jgħodd bħala kwalifiki u parti mill-korsijiet fl-Università u istituzzjonijiet terzjarji;
§ Riforma fl-iskema ta’ apprendistat biex it-taħriġ prattiku fuq ix-xogħol jitjieb fil-kwalità u fir-rilevanza;
§ Programm obligatorju ta’ żvilupp ta’ karattru u personalità għal kull student/a;
§ Aktar skambji ta’ studenti u esperjenzi barra minn Malta;
§ Żvilupp professjonali kontinwu u effettiv ta’ kull minn jaħdem fl-MCAST;
§ Organizzazzjoni aktar b’saħħitha u dinamika għall-edukazzjoni u t-taħriġ tal-ħaddiema adulti.
Il-Ministru Galea tkellem dwar l-investiment qawwi li l-Gvern għamel fl-MCAST sa mit-twaqqif tiegħu. Fil-fatt, l-ispiża rikorrenti f’dan il-Kulleġġ żdiedet minn Lm63,000 fis-sena 2000 għal Lm4.2 miljuni din is-sena, filwaqt li l-Gvern investa is-somma medja ta’ Lm800,000 kull sena f’infiq kapitali mis-sena 2000 ‘l hawn. B’kollox ġew investiti kważi 23 miljun lira fl-MCAST li llum jinkludi disa’ istituti. Il-popolazzjoni ta’ l-istudenti aktar minn irdoppjat f’dawn l-aħħar sitt snin biex b’hekk minn ftit aktar minn 1500 fl-2000 illum hemm 4000 student jattendu xi kors matul il-ġurnata. Madwar 3,500 student ieħor jattendu xi wieħed mill-korsijiet ta’ filgħaxija.
Il-Ministru Galea kompla jgħid li l-MCAST gawda ħafna mis-sħubija ta’ Malta fl-Unjoni Ewropea permezz ta’ fondi mill-Unjoni taħt il-Fond għall-Iżvilupp Reġjonali Ewropej (ERDF) u l-Fond Soċjali Ewropew (ESF) li b’kollox ilaħħqu mal-1.3 miljun lira. Dawn il-fondi intużaw biex seta’ jinxtara aparat ġdid għall-istudju ta’ l-inġinerija mekkanika, apparat ġdid u software għal-librerija tal-Kulleġġ. Permezz tal-flus mill-Fondi Soċjali Ewropej setgħu isiru korsijiet għal 600 mara li reġgħu lura għat-tagħlim bl-iskop li jerġgħu jirritornaw għad-dinja tax-xogħol wara snin ta’ waqfien. L-MCAST gawda wkoll minn fondi taħt programmi oħra ta’ l-Unjoni Ewropea fosthom Leonardo u Comenius. Il-Ministru Galea ħabbar li l-MCAST beda x-xogħol biex ifassal proġett ta’ tkabbir u immodernizzar li ser jiswa’ miljuni ta’ liri li jitwettaq bejn l-2007 u l-2013 bil-fondi li l-gvern ġab mill-Unjoni Ewropea.
Fost suċċessi oħra fl-istorja qasira imma mimlija tal-MCAST il-Minstru Galea semma l-iżvilupp b’suċċess tal-programmi li jwasslu għall-Higher National Diploma, Librerija u Ċentru tar-riżorsi ġdid, l-għoti tal-Premju Edexcel bħala Ċentru Internazzjonali għall-Eċċellenza lill-Kulleġġ, bini ta’ blokk ammininistrattiv ġdid u l-introduzzjoni ta’ korsijiet ġodda fil-farmaċewtika u l-manutenzjoni ta’ l-ajruplani. Huwa qal ukoll li matul din is-sena għandu jitlesta Canteen ġdid għall-istudenti, u jintemm l-iżvilupp tal-blokk ġdid li se jkun jinkludi Dar l-Istudent.
Il-Ministru Galea irringrazzja lis-sur Victor Scicluna u l-membri tal-Bord tal-Gvernaturi ta’ l-MCAST kif ukoll lis-sur Frank Edwards li qed imexxi l-Kulleġġ. Dr. Louis Galea fakkar li s-sur Scicluna, membru prominenti tas-settur privat, kien inkarigat bħala l-ewwel President ta’ l-MCAST sa mit-twaqqif tiegħu. “L-MCAST, studenti u staff, kienu xxurtjati li kellhom lis-sur Scicluna bħala President fit-twelid tal-Kulleġġ. Jiena mhux biss ammirajt l-imħabba u l-impenn li wrew is-sur Scicluna u sħabu f’din l-ewwel fażi ta’ l-MCAST, iżda l-Gvern hu rikonoxxenti għas-sehem indispensabbli tagħhom fl-iżvilupp ta’ din l-istituzzjoni hekk importanti għal pajjiżna.” Il-Ministru Galea irringrazzja wkoll l-uffiċjali għolja, id-Diretturi, id-Deputati Diretturi u għalliema ta’ l-Istituti, kif ukoll lill-ħaddiema kollha ta’ l-MCAST.
Other Press Releases:
PR261950en
PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...
PR261950