Left arrow Go Back

TRADUZZJONI TAL-KTIEB “L-ENEJDE”

pr0046
Date Icon 16/01/2006

Fr. Victor Xuereb SJ. (MA Oxon) ippreżenta l-ktieb tiegħu ”l-Enejde” lill-Ministru ta’ l-Edukazzjoni Louis Galea. Fr. Victor Xuereb, kif sejjaħlu l-ex President Dr. Ugo Mifsud Bonnici, huwa "t-Traduttur Imgħallem" tal-Malti li għandna. Fr. Xuereb ittraduċa mill-Grieg l-Odissea u l-Illijade ta’ Omeru u mil-Latin, l-Enejde ta’ Virġilju. Issa qed jaħdem fuq il-pubblikazzjoni tat-traduzzjoni ta’ erba’ kotba ta’ l-Odi ta’ Orazju li nittamaw li ma jdumux ma jaraw id-dawl. Permezz ta’ l-Enejde, Fr. Xuereb rebaħ il-Premju Letterarju għat-traduzzjonijiet.

Virġilju mhux lakemm taqilbu f’versi Maltin. Fr. Xuereb irnexxielu jkun fidil lejn l-oriġinal filwaqt li żamm ir-ritmu u l-melodija tal-poeta Latin. Mill-pinna tiegħu joħorġu kemm il-gravita u maesta’ ta’ Virġilju, kif ukoll il-ħeffa u r-rikezza tal-kelma Maltija meta mħaddma bis-sengħa.

Virġilju għanna l-istorja ta’ Ruma Imperjali fuq mudell ta’ l-Odissea u l-Illijade ta’ Omeru. Imma l-Enejde tiegħu hija aktar sofistikata mill-kapulavuri Griegi. Fl-Enejde Virġilju joħloq epika nazzjonali li mhux biss turi d-destin ta’ Ruma, imma wkoll is-sbuħija naturali ta’ l-Italja kollha u tad-drawwiet reliġjużi u soċjali tar-Rumani.

Lill-Imperatur Awgustu għollieh mas-smewwiet imma ma kien qatt lagħqi f’tifħiru. L-epika ta’ Virġilju mhix miktuba biex jgħannuha r-rapsodisti fuq kitarra fuq flixkun inbid kif kienu jagħmlu l-għannejja fi żmien Omeru. Hija l-opra ta’ professur biex tiġi ddeklamata fi skiet perfett f’teatru jew sala kbira biex tiġi apprezzata minn udjenza magħżula li taf tiggosta l-leħma u r-ritmu u l-mużikalita’ tal-kelma.

Il-Ministru Louis Galea feraħ lil Fr. Victor Xuereb għall-biċċa xogħol kbira li qed jagħmel permezz tat-traduzzjonijiet tiegħu. Hu qal li ħafna mill-adulti u ż-żgħażagħ illum ma kellhomx iċ-ċans japprezzaw dawn il-kapulavuri minħabba li kienu miktuba bil-lingwa Griega jew bil-Latin. Issa li dawn ix-xogħlijiet huma bil-Malti aktar nies jistgħu jiggustaw il-kapulavuri ta’ Omeru u Virġilju li issa saru ġawhra tal-lettaratura Maltija wkoll li biha għandna nkunu kburin.

Share this Press Release Icon socials Icon socials Icon socials Icon socials

Other Press Releases:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

More Press Releases Right arrow