IS-SEGRETARJU PARLAMENTARI EDWIN VASSALLO JILTAQA’ MAL-PRESIDENT IL-ĠDID TAL-GRTU
Is-Segretarju Parlamentari għan-Negozji Zgħar u s-Self Employed, Edwin Vassallo kellu laqgħa li fiha ltaqa’ mas-Sur Paul Abela għall-ewwel darba fil-kariga tiegħu bħala l-President il-ġdid tal-GRTU. Għal din il-laqgħa kien hemm preżenti wkoll is-Sur Vince Farrugia, li huwa d-Direttur Ġenerali tal-GRTU.
F’din il-laqgħa, is-Segretarju Parlamentari Vassallo ta kopja tal-Programm ta’ Ħidma tas-sena li għaddiet li kien iġib l-isem “Biex Malta tikber fl-Unjoni Ewropea, flimkien irridu niffaċilitaw in-Negozju”. Fid-diskors tieghu, is-Segretarju Parlamentari Vassallo għamel enfasi fuq il-kelma “Niffaċilitaw”, u dan għaliex skond l-Onor. Vassallo, “kemm-il darba rridu l-ekonomija tikber, allura kulħadd irid jifhem id-dmir li kull wieħed għandu li jiffaċilita n-negozju. Ma jistax ikollna t-tkabbir ekonomiku li neħtieġu kemm-il darba ma niffaċilitawx il-kummerċ. F’pajjiżna l-akbar investiment li kellna kien min-negozji żgħar tagħna li wassal biex is-sena l-oħra ħoloq 1,033 impjieg. Kull settur żgħir iħaddem ħafna nies u meta wiehed ipoggi flimkien dawn is-setturi kollha, li wahedhom jidhru li huma żgħir, u jara n-numru ta’ ħaddiema li jħaddmu flimkien, jara li n-negozji żgħar jammontaw għal kwantita’ kbira ta’ ħaddiema.”
Is-Segretarju Parlamentari Edwin Vassallo ta wkoll kopja tal-Programm ta’ Ħidma propost mis-Segretarjat għas-sena li ġejja. Dan il-Pjan ta’ Hidma ser ikollu bħala objettiv: “Bl-Iżvilupp ta’ l-Imprenditorija f’Pajjiżna Insostnu n-Negozju u Noħolqu Impjiegi Ġodda”.
Minn kliem is-Segretarju Parlamentari Vassallo, ħareġ ċar li huwa jemmen li meta l-Gvern ser ikun qiegħed jaħdem biex jiffaċilita l-kummerċ, il-Gvern ikun tabilħaqq qed jaħdem biex joħloq l-impjiegi ġodda, u allura wieħed jara kif bil-ħidma kontinwa tieghu, il-Gvern qed jibni kultura imprenditorjali maħsuba biex timplimenta politika li kontinwament tiffaċilita l-kummerċ.
Is-Segretarju Parlamentari tkellem ukoll dwar il-ħtieġa ta’ ħidma b’sinerġija minn dawk kollha li qed joffru servizz lejn min qiegħed fin-negozju, u dan biex ikunu individwalizzati issues li jkunu jeħtieġu ħidma aktar intensa, biex dawn l-issues ikunu solvuti. “Jeħtieġ li nipprioritizzaw, naħmdu aktar flimkien b’risq l-iżvilupp tal-ħidma imprenditorjali f’pajjiżna. Sar ħafna, iżda baqa’ ħafna xi jsir.” Hawn is-Segretarju Parlamentari awgura ħidma tajba u fejjieda lis-Sur Paul Abela, u wiegħed li bħala Segretarju Parlamentari, huwa lest li jiltaqa’, jitkellem u jitgħallem mingħand kull min huwa lest li jservi u jkun ta’ għajnuna.
Min-naħa tiegħu, is-Sur Paul Abela wera l-apprezzament tiegħu għall-ħidma tal-Gvern permezz tas-Segretarjat immexxi mis-Segretarju Parlamentari Edwin Vassallo u wiegħed li ser jitkellem ma’ sħabu fil-Kunsill tal-GRTU biex jinstab metodu fejn kemm il-GRTU u s-Segretarju Parlamentari Vassallo jkunu qed jaħdmu qrib ta’ xulxin għas-soluzzjoni ta’ problemi li jiltaqgħu magħhom is-self employed u n-negozji żgħar f’pajjiżna.
Other Press Releases:
PR261947
STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Ċ...
PR261946