Left arrow Go Back

SKEMA GĦALL-GRADWATI U INTRAPRIŻI GĦAWDXIN

PR0276
Date Icon 24/02/2005

Il-Ministeru għal Għawdex bħalissa qed jilqa’ applikazzjonijiet minn gradwati residenti f’Għawdex u minn intrapriżi bbażati f’Għawdex li huma nteressati jipparteċipaw fi skema, magħrufa aħjar bħala l-“Iskema tal-Gradwati”.  

Din hija skema speċifika għal Għawdex u tifforma parti mill-proġett “ETC Għawdex - Korsijiet u Skemi” li ser isir permezz tal-Fondi Strutturali għal Malta għall-perijodu 2004-2006, permezz ta’ ko-finanzjament mill-Fond Soċjali Ewropew.    

X’inhu l-għan ta’ din l-iskema?  

L-għan prinċipali huwa li tipprovdi opportunitajiet ta’ xogħol lill-gradwati f’Għawdex u tassisti fl-iżvilupp tal-komunita’ kummerċjali f’Għawdex.  

Il-benefiċċji huma:

      ·        Opportunitajiet ta’ xogħol f’Għawdex għall-gradwati residenti f’Għawdex

·        Riżorsi umani b’livell akkademiku terzjarju għall-benefiċċju ta’ intrapriżi Għawdxin

·        Riżorsi umani Għawdxin ta’ livell akkademiku terzjarju jibqgħu f’Għawdex  

X’tinvolvi din l-iskema?  

Intrapriżi kummerċjali bbażati f’Għawdex, imsejħa “Kumpaniji li Jħaddmu” ser jiġu mgħejjuna biex jimpjegaw gradwati f’Għawdex stess. Din l-iskema hija għal 4 snin.  

Matul dan iż-żmien, il-Kumpanija li Tħaddem tagħżel, timpjega u tħallas gradwat/a jew aktar, minn lista ta’ applikanti eliġibbli għal din l-iskema. Is-salarju tal-gradwat jiġi miftiehem bejn il-gradwat u l-Kumpanija li Tħaddem. Taħt din l-iskema, il-Kumpanija li Tħaddem tirċievi parti mis-salarju tal-gradwat/a li jammonta għal Lm39.53 fil-ġimgħa, għall-ewwel sentejn, li jibdew fl-1 t’April 2005.  

Il-Kumpanija li Tħaddem tkun marbuta li timpjega u tħallas is-salarju lill-gradwat/a għal perijodu minimu ta’ erba’ snin. Il-gradwat/a j/tintrabat li j/tibqa’ fl-impjieg mal-Kumpanija li Tħaddem għal perijodu minimu ta’ erba’ snin.    

Kif jista’ wieħed jipparteċipa?  

Il-parteċipazzjoni ssir biss jekk intrapriżi u gradwati japplikaw billi jiktbu lill-ETC f’Għawdex. L-intrapriżi li jixtiequ jipparteċipaw iridu jibgħatu ittra bir-rikjesta tagħhom bil-posta jew permezz ta’ email fl-indirizz: marcelb@etc.org.mt. Il-gradwati jridu jibgħatu covering letter, CV dettaljat, kopja taċ-ċertifikati nkluż id-degree ta' l-Universita', u kopja tal-kondotta tal-Pulizija. Dawn għandhom jaslu għand is-Sur Marcel Bonnici fl-Uffiċċju tal-Korporazzjoni ta’ l-Impjiegi u Taħriġ (ETC), Triq l-Imġarr, Xewkija, Għawdex.  

L-applikazzjonijiet li jaslu minn intrapriżi u gradwati nteressati jgħaddu minn proċess preliminari ta’ evalwazzjoni biex jiġi żgurat li huma eliġibbli.  

Kumpaniji li Jħaddmu li jkunu eliġibbli jkunu mitluba biex jagħżlu gradwat/a jew gradwati u wara l-gradwat/a jew gradwati magħżul/a jiġu mpjegati mal-Kumpanija li Tħaddem f’Għawdex, bil-kundizzjonijiet imsemmija fuq.  

Min jista’ japplika?  

·     Intrapriżi ta’ daqs żgħir u medju li huma bbażati f’Għawdex

·     Gradwati residenti f’Għawdex li jinsabu mingħajr impjieg u li għandhom degree Universitarju fid-data ta’ l-għeluq ta’ din is-sejħa għall-applikazzjonijiet, li huma ta’ karattru morali tajjeb u li jkunu jafu tajjeb il-Malti u l-Ingliż.  

Sa meta tista’ japplika?  

L-applikazzjonijiet jintlaqgħu sa mhux iktar tard minn nhar il-Ġimgħa 4 ta’ Marzu 2005. Applikazzjonijiet li jaslu tard ma jiġux ikkunsidrati.    

Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA  Ċertifikazzjoni internazzjonali tal-ogħla livell għad-dipartiment tar-radjoterapija fiċ-Ċentru tal-Onkoloġija Sir Anthony Mamo

PR261947

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Ċ...

STQARRIJA MILL-MINISTERU GĦALL-EDUKAZZJONI U L-ISPORT  Aktar minn 1,800 student jiggradwaw mill-Università ta’ Malta

PR261946

STQARRIJA MILL-MINISTERU GĦALL-EDUKAZZJONI U L-ISPORT Aktar minn 1,800 stu...

More Press Releases Right arrow