Left arrow Go Back

INŻEWWĠU L-KULTURA MAT-TURIŻMU

PR1449
Date Icon 23/09/2004

Il-Ministru għat-Turiżmu u Kultura Francis Zammit Dimech qal li kien ta’ pjaċir għalih iniedi festival dwar l-Bliet Storiċi ta’ Malta li kien se jinżamm bejn  is-7 u s-17 ta’ Ottubru fil-belt Valletta , l-Imdina, it-tlett ibliet u Victoria f’Għawdex.  

Francis Zammit Dimech qal li fl-istrateġija tal-Gvern li jippromwovi lil Malta bħala esperjenza fost it-turisti, il-bliet storiċi ta’ pajjiżna jieħdu sinifikat partikolari. Hu qal li f’dawn il-bliet bdiet l-istorja ta’ pajjiżna. Hu qal li l-bliet ta’ l-Imdina u l-Birgu kienu l-benniena taċ-ċivilta’ Maltija, bil-Birgu ‘l-bieb’ ta’ Malta min-naħa tal-baħar u l-Imdina l-belt f’nofs Malta , imdawwra bis-swar, li l-Maltin kienu jiġru lejha għall-protezzjoni meta kienu jiġu attakkati minn kursari tal-baħar u fi żmien ta’ gwerra.

Il-Ministru Zammit Dimech qal li l-ibliet storiċi ta’ pajjiżna huma wkoll il-bliet mdawwra bis-swar. Hu qal li t-tlett ibliet tal-Birgu, Bormla u l-Isla minbarra li huma mdawwra bis-swar reġgħu ddawwru minn linja oħra ta’ fortifikazzjonijiet li ddur dawra mejt magħhom u għalhekk kienet tagħmilhom fiż-żgur fi żmien ta’ gwerra u ċentru ta’ negozju u abitazzjoni fi żmien ta’ paċi. Hu qal li l-linja ta’ fortifikazzjoni tal-Kottonera kienet l-itwal waħda tax-xorta tagħha fid-dinja. Hu qal li dawn il-bliet kienu wkoll ċentru kulturali u ta’ arti.

Francis Zammit Dimech qal li l-belt Valletta nbniet wara l-Assedju l-Kbir ta’ l-1565. Hu qal li biex inbniet din il-belt inġiebu Malta l-aqwa arkitetti li kien hemm fl-Ewropa u darba nbniet inġiebu l-aqwa artisti biex żejjnu l-Kon-Katidral ta’ San Ġwann, il-bereġ, il-palazzi u d-djar l-oħra tal-belt. Hu qal li l-Belt Valletta fiha fost l-isbaħ u l-aqwa linji ta’ difiża b’żewġ kavallieri, dak ta’ San Ġakbu u San Ġwann jħarsu fuq id-dħul ewlieni tal-belt biex jiddefenduh. Hu qal li wieħed minn dawn il-kavallieri, il-Kavallier ta’ San Ġakbu, f’dawn l-aħħar snin ġie riabilitat u restawrat biex inbidel f’Ċentru għall-Kreattivita’. Hu qal li fil-belt hemm bini ieħor importanti li llum qed jintuża għal skopijiet li ma kenux intiżi meta nbena. Hu qal li fost dawn hemm is-Sagra Infermeria li nbidlet fiċ-Ċentru tal-Mediterran għall-Konferenzi u l-Forti Sant’Jiermu li parti minnu qed jintuza bħala Akkademja tal-Pulizija.

Il-Ministru għat-Turiżmu u Kultura qal li fir-riġenerazzjoni ta’ dawn il-bliet qed jagħtu sehem importanti il-Proġetti għar-Riabilitazzjoni tal-Belt Valletta u l-Floriana, tal-Kottonera u ta’ l-Imdina li twaqqfu minn dan il-Gvern. Hu qal li bis-saħħa ta’ dawn il-proġetti fl-aħħar 15-il sena twettaq xogħol ta’ restawr u riabiltazzjoni fuq bini storiku, knejjes, palazzi u fortifikazzjonijiet fil-belt Valletta , il-Floriana, il-Birgu, Bormla, l-Isla u l-Imdina.

Francis Zammit Dimech qal li fl-istess waqt il-Gvern qed jinsisti li fejn kumpanniji privati jingħataw art għall-iżvilupp li tkun tinkludi bini storiku dawn għandhom jirriabilitaw u jirrestawraw dan il-bini. Hu qal li dan diġa seħħ fil-Birgu fejn l-Caraffa Stores u l-Palazz tal-Kaptan tax-Xwieni ġew restawrati u qed isir użu minnhom biex ma jerġgħux jispiċċaw fl-abbandun u t-telqa li kienu. Hu qal li l-istess qed jiġri fix-Xatt tal-Belt fejn ġew restawrati l-Imħażen ta’ Pinto u Forni biex jagħmlu parti mill-Cruise Liner Passenger Terminal.

Il-Ministru Zammit Dimech qal li fil-ħidma biex nirriġeneraw dawn il-bliet storiċi qed tagħti sehem importanti l-Awtorita’ Maltija għat-Turiżmu li torganizza festivals, re-enactments u attivitajiet oħra tal-massa li jressqu dawn il-bliet lejn il-poplu Malti u lejn it-turisti.

Francis Zammit Dimech qal li t-turiżmu u l-kultura kellhom rabta bejniethom li rridu nsaħħu u nkabbru. Hu qal li din ir-rabta toħroġ b’mod ċar f’dan il-Festival ta’ Bliet Storiċi Maltin fejn qed inżewwġu l-kultura wiesgħa f’dawn il-bliet ma’ niċċa importanti fis-settur turistiku: in-niċċa tal-kultura u l-arti li tattira lejn pajjiżna aktar minn 200,000 turist.

Il-Ministru għat-Turiżmu u Kultura qal li pajjiżna kellu fost l-aqwa bliet iffortifikati fid-dinja. Hu qal li f’dawn il-bliet hemm teżori kbar ta’ storja, kultura u arti li kienu assi importanti fil-ħidma tagħna biex niġbdu aktar turisti lejn Malta . Hu awgura lill-Awtorita’ Maltija għat-Turiżmu kull risq f’din l-inizjattiva ġdida tagħhom.

Share this Press Release Icon socials Icon socials Icon socials Icon socials

Other Press Releases:

STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTRU U L-MINISTERU GĦAS-SAĦĦA  Id-Dipartiment tar-Radjoloġija f’San Vinċenz mistenni jaqbeż l-20,000 eżami fl-2026

PR261943

STQARRIJA MIS-SEGRETARJAT PARLAMENTARI FL-UFFIĊĊJU TAD-DEPUTAT PRIM MINISTR...

PRESS RELEASE BY THE OFFICE OF THE SPEAKER  The Speaker of the House of Representatives highlights Malta’s climate vulnerabilities and the role of parliaments at the IPU Parliamentary Meeting on COP31 in Türkiye

PR261942en

PRESS RELEASE BY THE OFFICE OF THE SPEAKER The Speaker of the House of Rep...

More Press Releases Right arrow