Left arrow Go Back

141 ĦADDIEM F’ESPERJENZA TA’ XOGHOL FL-UNJONI EWROPEA

PR744
Date Icon 19/06/2003

Għat-tielet sena konsekuttiva, numru ta’ ħaddiema Maltin matul is-sena d-dieħla ser jieħdu esperjenza ta’ xogħol f’xi pajjiż Ewropew. Din l-esperjenza tvarja minn ġimgħa għal 52 ġimgħa. Matul din l-esperjenza barra minn Malta dawn il-ħaddiema (li jinkludu apprendisti, ħaddiema, għalliema jew instructors) ikunu mgħejjuna finanzjarjament mill-Unjoni Ewropea permezz tal-programm Leonardo da Vinci. 

L-UE qed tikkontribwixxi 190,837 Euros jew kważi Lm80,000 għal dawn il-proġetti.  

Matul dawn it-tliet snin li Malta ilha tieħu sehem f’dan il-programm tal-UE kien hemm 449 ħaddiem Malti li ħadu sehem fih. 

Dalgħodu fil-Kavallier ta’ San Gakbu ġew iffirmati l-kuntratti tal-proġetti tal-mobilita’ taħt il-programm Leonardo da Vinci. Il-proġetti ġew evalwati u magħżula mill-kumitat koordinattiv wara sejħa pubblika għall-applikazzjonijiet. Il-biċċa l-kbira tal-proposti imressqa gew approvati.  

Il-laqgħa giet indirizzata mill-Ministru ta’ l-Edukazzjoni Louis Galea u uffiċjali tat-Taqsima tal-Programmi ta’ l-Unjoni Ewropea (E.U.P.U.) fi ħdan id-Diviżjoni ta’ l-Edukazzjoni. 

Fid-diskors tieghu l-Ministru Louis Galea tkellem dwar l-iżviluppi li qed iseħħu fil-qasam ta’ l-edukazzjoni u t-taħrig vokazzjonali. Huwa fisser li l-Gvern qed jinvesti b’mod sostanzjali fil-kulleġġ vokazzjonali MCAST biex joħloq aktar opportunitajiet ta’ kwalifiċi rikonoxxuti f’livelli differenti u fl-oqsma li għalihom l-ekonomija Maltija qed ikollha domanda. Il-Ministru ta’ l-Edukazzjoni qal li jeħtieg isru aktar sforzi biex l-industrija u l-edukazzjoni jaħdmu aktar mill-qrib biex jiġi assigurat li l-pajjiż ikollu l-ħaddiema li teħtieg l-ekonomija li qed tiffaċċja sfida kbira ta’ kompetittivita’. 

Il-141 ħaddiem li ser jibbenifikaw mill-programm Leonardo da Vinci ġejjin minn kważi l-oqsma kollha tal-ħajja tax-xogħol. Dawn il-ħaddiema ġejjin minn : 

-         Maltapost

-         Kummissjoni Nazzjonali Persuni b’ Diżabilità

-         Il-Korporazzjoni Xogħol u Taħriġ

-         Sedqa

-         Diversi Istituti ta’ l-MCAST (Elettronika, Bini, ICT, Arti u Disinn)

-         Università ta’ Malta

-         Awtorita’ tat-Trasport

-         Għaqda Persuni Neqsin mis-Smigħ

-         FITA - Fondazzjoni għall-Aċċessibilità ta’ l-IT

-         Dipartiment tat-Turiżmu

-         Sptar San Luqa Dipartiment tal-Patoloġija

-         L-Awtorità ta’ l-Ippjanar u l-Ambjent

-         Sapport

-         Università - Istitut Kura tas-Saħħa

-         Università - Ċentru Malti tar-Restawr

-         General Accessories Ltd.

-         Agius Stone Works

-         Concordia 

Din il-lista tixhed il-firxa wiesa’ ta’ benefiċjarji mill-qasam soċjali, turistiku, manifattura, saħħa, komunikazzjoni sar-restawr. Dawn il-benefiċjarji jinkludu social workers, studenti infermiera, occupational therapists, xufiera tal-karozzi tal-linja, tekniċi elettroniċi u mekkaniċi, disinjaturi u ħaddiema professjonali fil-qasam ta’ l-ambjent. L-esperjenza li jakkwistaw dawn il-haddiema tiswa kemm lill-individwi kif ukoll lill-pajjiz għax jekk dawn itejbu l-kwalità tax-xogħol tagħhom, allura l-pajjiz ukoll jibbenefika. 

Dawn il-haddiema Maltin se jmorru jieħdu din l-esperjenza ta’ xogħol f’diversi pajjiżi Ewropej, fosthom - l-Ingilterra, id-Danimarka, Spanja, l-Irlanda, L-Olanda, l-Awstrija, il-Belġju, Franza u l-Italja. 

Ta’ min jgħid li dawn il-141 ħaddiem mhumiex l-uniċi benefiċjarji mill-programm Leonardo da Vinci tal-UE. Matul din is-sena, 4 min-nies oħra ser jieħdu sehem fi study visits f’xi pajjiż Ewropew organizzat miċ-CEDEFOP (European Centre for the Development of Vocational Training). F’dawn iż-żjarat ta’ studju, l-Maltin jiltaqgħu ma’ nies oħra mdaħħla fl-istess xogħol tagħhom u barra li jaraw x’inhu jsir barra minn Malta, jaqsmu l-esperjenzi tagħhom. 

Servizz ieħor tal-programm Leonardo da Vinci li minnu qed jibbenefikaw il-Maltin hu s-servizz tal-Euroguidance. Permezz tal-Euroguidance ħaddiema u studenti Maltin li jixtiequ tagħrif dwar opportunitajiet ta’ studju u xogħol fil-pajjizi Ewropej ikunu jistgħu jiksbu dan it-tagħrif mill-Euroguidance. Dan is-servizz ilu jopera sa mill-bidu ta’ Marzu 2003 u, s’issa, kien hemm 81 talba minn Maltin għal dan is-servizz. 

Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA  Inawgurat bust ta’ Ġorġ tal-Mużew fl-Isptar Mater Dei b’tifkira tal-ħidma tiegħu fost dawk vulnerabbli

PR261936

STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA I...

PRESS RELEASE BY THE MINISTRY FOR ENERGY, THE ENVIRONMENT AND THE REGENERATION OF THE GRAND HARBOUR  ERA launches anniversary publication: A decade of protecting Malta’s natural future

PR261935en

PRESS RELEASE BY THE MINISTRY FOR ENERGY, THE ENVIRONMENT AND THE REGENERAT...

More Press Releases Right arrow