MESSAĠĠ TAL-MILIED U L-EWWEL TAS-SENA MILL-PRIM MINISTRU, L-ONOREVOLI EDDIE FENECH ADAMI
Insellmilkom.
Għal darb’oħra għandi okkażjoni nidħol fid-djar tagħkom permezz tat-televiżjoni f’dan iż-żmien ta’ festi, il-festi tal-Milied - żmien ta’ ferħ u hena għall-familji kollha tagħna. U rrid l-ewwel ħaġa f’ismi, bħala l-Prim Ministru, u f’isem il-Gvern kollu, nawguralkom ukoll u nixtiqilkom minn qalbi ferħ u hena tul dawn il-ġranet tal-Milied, u j’Alla jirnexxielna lkoll, dawn is-sentimenti ta’ ferħ u hena, inġorruhom magħna fis-sena l-ġdida.
Irridu naħseb ilkoll nifhmu sewwa x’ifisser il-Milied. Il-Milied hija ġrajja ta’ aktar minn 2,000 sena ilu meta twieled Kristu, meta bdiet l-era Kristjana li biddlet u sawret l-istorja kollha u tkompli tbiddel u ssawwar l-istorja kollha li għad trid issir. Il-Milied ifisser illi nirikonoxxu x’inhu l-bniedem, nirrikonoxxu d-dinjità tal-bniedem. Illum ilkoll nitkellmu fuq id-drittijiet tal-bniedem. U meta ngħidu d-drittijiet tal-bniedem qed nirikonoxxu d-dinjità ta’ kull wieħed u waħda minnha, u d-dmir tagħna wkoll illi nuru s-sentimenti ta’ solidarjetà illi aħna lkoll jimpurtana minn għajrna. Naraw illi kullimkien, jekk jista’ jkun, u f’kull rokna tad-dinja dan il-messaġġ Nisrani jasal, jasal b’saħħa u b’mod konkret. Għalhekk f’pajjiżna rridu lkoll naħsbu f’dawk l-iktar li għandhom bżonn, f’dawk li hemm bżomm inwiżżnuhom il-ħin kollu u rridu nagħmluh b’mod illi l-ispirtu ta’ hena u ferħ fil-familji tagħna jkompli jitkattar.
Naturalment faċli tgħid bil-kliem, u aħna l-politiċi, aħna li intom tafdawna biex immexxu l-pajjiż, għandna d-dmir aktar minn kulħadd illi ngħixu u naraw kif inwettqu dan il-messaġġ tal-Milied ta’ kuljum, f’dak kollu li jiġi deċiż fl-interess tal-poplu kollu tagħna. Irridu aħna niftakru li l-Milied jiġi mhux biss fil-25 ta’ Diċembru, imma jekk jista’ jkun irridu ngħixu dan l-ispirtu tal-Milied tul is-sena kollha. Aħna, m’hemmx dubju, illi minn hu fil-politika qiegħed hemm biex iservi, qiegħed hemm għax għandu mandat mill-poplu biex għaż-żmien li tgħid il-Kostituzzjoni, aktarx ta’ ħames snin, huwa jara kif jista’ jiżgura illi l-pajjiż dejjem jimxi aħjar. Aħna rridu dan niżgurawh u irridu però mbagħad niftakru li qegħdin hemm biex inservu - biex inservu biss.
Is-sena li waslet biex tispiċċa kienet sena ngħid, mhux faċli. Kienet sena fejn l-ekonomija nistgħu ngħidu tal-pajjiżi kollha għaddiet minn żminijiet diffiċli. Bil-ħila tal-poplu tagħna, aħna l-Maltin irrnexxielna nirbħu d-diffikultajiet u ma rajniex illi l-pajjiż mar lura, anzi mar ’il quddiem. Xtaqnieh li jmur ’il quddiem aktar, milli effettivament mar. Imma, nerġa’ ngħid, il-ħila u d-determinazzjoni tal-poplu tagħna għamlet mod illi nistgħu ngħidu “iva l-ġid kompla jitkattar f’pajjiżna” u, ukoll ippruvajna, u naħseb b’miżura sewwa rnexxielna naraw illi l-ġid mhux biss jitkattar imma jitqassam b’ġustizzja. B’ġustizzja bejn kulħadd. Ġustizzja wkoll hija kelma illi hija marbuta intimament mal-messaġġ tal-Milied, u rridu aħna niżguraw illi kontinwament kuljum titwettaq il-ġustizzja fost il-poplu tagħna.
Wasalna fi tmiem is-sena. Kif għidt ma kinitx sena faċli, kienet sena diffiċli, però li fiha wettaqna wkoll dak illi konna qegħdin naħdmu għalih. Jiena, kif tafu, il-ġimgħa l-oħra, fit-13 ta’ Diċembru, ma kontx hawn Malta biex niċċelebra kif nagħmlu s-soltu Jum ir-Repubblika, data importanti fl-istorja ta’ Malta indipendenti. Kont qiegħed f’Copenhagen fejn għal sigħat sħaħ konna qegħdin niffinalizzaw in-negozjati ma’ l-Unjoni Ewropea. Negozjati illi jiena kelli l-mandat mill-poplu tagħna mogħti lili fl-elezzjoni ta’ l-1998 biex nagħmilhom, dawn in-negozjati. U fit-13 ta’ Diċembru dawn in-negozjati għalqu, fil-fehma tiegħi, għalqu b’suċċess, u issa wasal iż-żmien illi jiena wara li tajtuni l-mandat, nerġa’ ngħaddi dan il-mandat lilkom, lill-poplu Malti. Aħna niftaħru li aħna pajjiż demokratiku. Id-demokrazija tfisser li l-poplu hu sovran dejjem. Sovran meta jagħżel il-Gvern tiegħu u sovran meta jridu jittieħdu deċiżjonijiet importanti.
Jiena wassalt għall-għeluq tan-negozjati ma’ l-Unjoni Ewropea. Issa d-deċiżjoni mhix se tibqa’ aktar f’idi u f’idejn sħabi tal-Gvern imma aħna, kif inhu d-dmir tagħna, se nerġgħu ngħaddu dan il-mandat lilkom, lill-poplu tagħna biex intom tiddeċiedu liberament x’jidhrilkom li huwa l-aħjar għal Malta. Issa ilna nitkellmu snin fuq l-Unjoni Ewropea. Huwa qbil bejn kulħadd, mhux biss f’Malta. Fl-Ewropa kollha nista’ ngħid, kulħadd jaf xi tfisser l-Unjoni Ewropea. L-Unjoni Ewropea tfisser paċi u sliem, l-Unjoni Ewropea tfisser progress soċjali u ġustizzja soċjali, l-Unjoni Ewropea tfisser il-ħarsien tad-drittijiet ta’ kull bniedem, tad-dinjità ta’ kull bniedem. L-Unjoni Ewropea tfisser solidarjetà bejn il-popli ta’ l-Unjoni Ewropea. L-Unjoni Ewropea tfisser illi jkun hemm livell ta’ għajxien dejjem aħjar għall-popli kollha. Naturalment mhux kulħadd jaħsibha bl-istess mod kif tipparteċipa fl-Unjoni Ewropea. M’għandniex aħna niskantaw li jkun hemm opinjonijiet differenti ta’ kif nipparteċipaw fl-Unjoni Ewropea. Naturalment id-deċiżjoni trid tkun issa illi nafu x’innegozjajna f’idejn il-poplu tagħna u jagħżel hu x’irid għall-ġejjieni tagħna.
Is-sena d-dieħla.... is-sena d-dieħla se tkun sena straordinarja għall-poplu tagħna. Il-poplu se jiġi mitlub għal tliet darbiet biex jesprimi l-fehma tiegħu. Fi tnejn minnhom il-mod normali, rikorrenti: Fit-8 ta’ Marzu se jkun hemm l-Elezzjoni għall-Kunsilli Lokali, f’terz, wieħed minn tlieta, tal-bliet u l-irħula tagħna. Dritt demokratiku li l-poplu tagħna jagħżel il-gvernijiet lokali. Is-sena d-dieħla se jkun hemm ukoll l-Elezzjoni Ġenerali, dritt sovran tal-poplu tagħna illi jagħżel it-tmexxija li jrid għall-ħames snin ta’ wara.
Però b’mod eċċezzjonali, is-sena d-dieħla se jkun hemm Referendum. Kif għidt huwa l-akbar manifestazzjoni, l-ikbar dritt, l-ikbar dmir, li għandu l-poplu li f’okkażjonijiet straordinarji jerġa’ jieħu r-riedni f’idejh u jiddeċiedi hu x’irid. J’Alla l-poplu Malti jkun għaqli u jagħżel dak li fil-fehma sovrana tiegħu huwa l-aħjar għal pajjiżna. U aħna l-politiċi li qegħdin hemm biex inservu, irridu bilfors imbaxxu rasna u ngħidu iva għal dak li jiddeċiedi l-poplu.
Nieħu pjaċir, qiegħed inkellimkom għal darb’oħra, kif diġà għidt, fl-aħħar tas-sena. Kulħadd jagħmel il-kontijiet tiegħu, jara kif mar - jara x’seta’ mar aħjar. M’għandix dubju li nsibu ħafna affarijiet fejn stajna morna aħjar, ħadd minna m’hu perfett, kulħadd jagħmel l-iżbalji, kulħadd jista’ jagħmel aħjar, u jiena nitlobkom tahdruna meta xi drabi jista’ jkun illi nqasniekom. Jiena ħaġa waħda ngħid, almenu għalija nnifsi, illi ippruvajt dejjem nagħti mill-aħjar illi nista’. Is-sena d-dieħla, j’Alla tkun sena illi fiha jkompli jitkattar il-ġid f’pajjiżna. Tkun sena fejn inkomplu nibnu fuq l-ispirtu tas-solidarjetà bejnietna.
Nixtiqilkom ilkoll hena fil-ġranet tal-Milied, u j’Alla s-sena d-dieħla tkun sena ta’ riżq u barka għal kulħadd.
Insellmilkom.
Other Press Releases:
PR261931
STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozz...
PR261930en