Ir-riċiklaġġ kruċjali fl-istrateġija ta’ Proġett Skart
Meta kien qed iżur l-Impjant tal-Kompostaġġ f’Sant’Antnin u l-faċilitajiet f’Kordin fejn qed jittieħdu inizjattivi għar-riċiklaġġ ta’ l-iskart, il-Ministru għar-Riżorsi u l-Infrastruttura, l-Onor. Dr. Francis Zammit Dimech qal li kull strateġija għall-immaniġġjar ta’ l-iskart solidu tinbena fuq ordni ta’ prioritajiet ta’ għażla. Qal li din l-ordni, li żviluppat fl-aħħar 20 sena, timxi fuq ħames prattiċi: tnaqqis ta’ l-iskart, użu mill-ġdid, riċiklaġġ, irkupru u disponiment.
Francis Zammit Dimech qal li bħala parti minn Proġett Skart il-Gvern qiegħed bħalissa jibni l-infrastruttura meħtieġa biex ikollna sistema tajba għall-immaniġġjar ta’ l-iskart solidu. Hu qal li kienu qed isiru t-tħejjijiet kollha biex tinbena engineered landfill, biex ikun hemm Waste Transfer Station f’Għawdex, biex ikun hemm profil xjentifiku ta’ x’hemm fil-miżbliet qabel dawn jingħalqu u jiġu riabilitati, biex ikun modernizzat l-Impjant tal-Kompostaġġ f’Sant’Antnin u diversi miżuri u azzjonijiet oħra.
Il-Ministru għar-Riżorsi u l-Infrastruttura qal li ftit tal-jiem ilu, twaqqfet il-Waste Management Services Limited bl-iskop li torganizza, tissorvelja u tikkontrolla faċilitajiet għall-immaniġġjar ta’ l-iskart u servizzi relatati. Għal din il-kumpannija u għal Proġett Skart qed ikunu vvutati għas-sena d-diehla Lm1,100,000 għal investiment kapitali u Lm450,000 għal spejjeż rikorrenti.
Il-Ministru Francis Zammit Dimech qal li sadanittant il-Gvern kien qed jieħu miżuri biex jiġu riċiklati diversi tipi ta’ skart. Hu qal li nhar il-Erbgħa kien l-Imġarr fejn qed jinġabru tankijiet li għal għexieren ta’ snin kienu mitluqa fl-għelieqi. Hu qal li dawn it-tankijiet kienu qed jitgħaffġu u jinbiegħu bħala scrap biex jiġu riċiklati. Francis Zammit Dimech qal li inizjattivi oħra qed jittieħdu dwar ir-riċiklaġġ tal-karta, kartun, plastik u ħġieġ. Francis Zammit Dimech qal li mill-analiżi ta’ l-iskart tad-djar li sar mill-ħaddiema ta’ l-Impjant ta’ Sant’Antnin għall-Uffiċċju Nazzjonali ta’ l-Istatistika, jirriżulta li madwar 1.8 fil-mija tal-piż ta’ l-iskart tad-djar huwa magħmul mill-fliexken tal-plastik li jiġu wżati għax-xorb minerali. Jirriżulta li madwar 3,000 tunnellata ta’ dan it-tip ta’ skart jiġi ġġenerat f’Malta kull sena.
Il-Ministru għar-Riżorsi u l-Infrastruttura qal li biex jgħin jintlaħqu l-miri ta’ Proġett Skart, inħarġet sejħa għall-offerti biex jiġu riċiklati dawn il-fliexken u kontenituri oħra tal-plastic. Il-fliexken li qed jinġabru minn Bring in Sites, mis-separazzjoni ta’ l-iskart tad-djar fis-Swieqi u minn lokalitajiet oħra qegħdin jiġu ttrattati u mibjugħa lil dawn il-kuntratturi li rebħu l-offerta. Dawn il-fliexken qed jiġu mballati u wara jinħażnu fl-Impjant ta’ Sant’Antnin biex jiġu esportati għar-riċiklaġġ. Hu qal li wieħed irid japprezza li trakk mimli fliexken jifforma madwar ballawaħda ta’ fliexken tal-plastik.
Francis Zammit Dimech qal li mis-sistema ta’ ġbir ta’ skart separat fis-Swieqi, qiegħed jinġabar aktar minn 80 fil-mija ta’ dan it-tip ta’ skart li jiġi ġġenerat f’din il-lokalita’. Hu qal li dan jawgura tajjeb biex is-sistema tas-separazzjoni ta’ l-iskart fid-djar tiġi żviluppata, flimkien ma’ dik ta’ l-infrastruttura, skond kif ġie stabilit fl-Istrateġija għall-Immaniġġjar ta’ l-Iskart.
Meta tkellem dwar skart iġġenerat mill-apparat elettroniku Francis Zammit Dimech qal li parti sostanzjali mill-iskart iġġenerat mill-apparat elettroniku għandu valur u jippermetti li jista’ jiġi rriċiklat. Fost dawn, l-aktar komuni huma l-computers, telephone sets u cables li jintużaw f’dawn is-sistemi. Biex tiġi evitata kontaminazzjoni li tista’ tinħoloq mir-rimi ta’ dan l-iskart fil-Magħtab, inħarġet sejħa għall-offerti għar-riċiklaġġ ta’ dan l-apparat elettroniku li m’għadux aktar utli biex jintuża.
Il-Ministru Francis Zammit Dimech qal li Proġett Skart ħareġ ċirkulari lid-Dipartimenti u entitajiet tal-Gvern kollha biex dan it-tip ta’ skart jibda jintbgħat fl-Impjant ta’ Sant’Antnin flok ma jibqa’ jintrema fil-Magħtab. L-istess messaġġ ġie mgħoddi lill-kuntratturi privati li huma attivi f’din l-industrija. Hu qal li ried jieħu din l-okkażjoni biex jirringrazzja lil diversi entitajiet fosthom lill-Ministeru tal-Finanzi, lill-Ministeru tal-Politika Soċjali, l-MITTS, l-Air Malta u l-Bank Ċentrali li qed jikkoperaw f’din il-ħidma.
Il-Ministru għar-Riżorsi u l-Infrastruttura qal dan l-apparat li nġabar qiegħed jiġi magħżul, ippakkjat u mqiegħed f’container biex jiġi esportat għat-trattament f’impjant li jispeċjalizza f’din l-attivita’.
Il-Ministru Francis Zammit Dimech tkellem ukoll dwar il-proċedura attwali li biha jiġu skrappjati l-vetturi f’Malta. Hu qal li din tista’ tirriżulta f’kontaminazzjoni lill-ambjent. Fil-futur qarib, il-vetturi jridu l-ewwel jiġu mnaddfa mil-likwidi li jkun fihom li prinċiparjament jikkonsistu fi żjut u aċtu tal-batteriji. Biex jgħin fl-introduzzjoni ta’ din is-sistema, id-Dipartiment tal-Manifattura u Servizzi fi ħdan il-Ministeru għar-Riżorsi u l-Infrastruttura ħa l-inkarigu biex numru konsiderevoli ta’ vetturi li jinsabu fil-pussess tal-Pulizija, jiġu ttrattati b’dan il-mod qabel jittieħdu ġo l-iscrap yard. Iż-żjut qegħdin jiġu miġbura u jintbgħatu fl-impjant tat-trattament ta’ dan it-tip ta’ żjut użati filwaqt li l-aċtu li jinġabar qiegħed jiġi newtralizzat permess ta’ taħlita alkalina.
Il-Ministru Zammit Dimech qal li biex jiġi assigurat iċ-ċaqliq ta’ dawn il-vetturi, qiegħed jinħareġ dak li huwa magħruf bħala Certificate of Destruction fejn tiġi ċċertifikata l-awtorizzazzjoni biex il-vettura tinqered u jassigura li l-informazzjoni kollha tal-vettura tkun waslet lid-Dipartiment tal-Liċenzji u Testjar tal-vetturi. Din is-sistema tippermetti ukoll biex il-pjanci tar-reġistrazzjoni kif ukoll dawk tal-makni u ta’ chassis jigu rkuprati u mgħoddija lill-awtorita’ kompetenti.
Francis Zammit Dimech qal li wara dan il-proċess ta’ tindif, id-Dipartiment jgħaddi l-vetturi lill-kuntrattur li offra l-aħjar offerta għar-riċiklaġġ tal-materjal li jkun fihom dawn il-vetturi.
Meta kompla jitkellem dwar inizjattivi li diġa’ ttieħdu, il-Ministru Zammit Dimech qal li matul din is-sena
- inġabru 13,900 kg ta’ batteriji,
- ġew introdotti inizjattivi ġodda għall-ġbir ta’ metal u ħġieġ f’Marsaxlokk, Qui Si Sana, Ta’ Qali u Kennedy Grove, estiżi fis-sajf ukoll għal Għajn Tuffieħa, l-Għadira, M’Xlokk u Birżebbuġa. Minn dawn il-faċilitajiet (recycling bins) inġabru 830 tunnellata ta’ karta, 43 tunnellata ta’ kartun u 11-il tunnellata ta’ ħġieġ.
- Madwar 450 tunnellata oħra ta’ ħġieġ inġabru u ġew ikkraxxjati u maħżuna biex jiġu esportati.
Francis Zammit Dimech qal li t-triq biex nsaħħu inizjattivi għal riċiklaġġ ta’ materjal li jkun intrama’ hi waħda iebsa iżda kien ċert li bil-kooperazzjoni ta’ kulħadd naslu, kif wasalna f’ħafna inizjattivi oħra li diġa’ ttieħdu.
Other Press Releases:
PR261931
STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Żewġ abbozz...
PR261930en