PROGRAMM KONTINWU TA’ TINDIF U TISBIĦ
Il-Ministru għar-Riżorsi u l-Infrastruttura Francis Zammit Dimech qal li l-Ministeru li kien imexxi kien qed jaħdem bħala xprun favur it-tisbiħ fil-pajjiż. Hu qal dan meta, flimkien mas-Segretarju Parlamentari George Pullicino, żar il-‘picnic area’ f’Ħal Far u xogħol ta’ tisbiħ u tindif li qed isir fl-inħawi ta’ Għar Ħasan.
Il-Ministru qal li dan ma kienx qed jitwettaq biss permezz tal-proġetti ta’ tisbiħ tal-promenades tal-lokalitajiet popolari tagħna ħdejn il-baħar iżda anke billi qed jissebbħu inħawi fiċ-ċentri ta’ l-ibliet u l-irħula u anke ’l barra mil-lokalitajiet mibnija. Hu fakkar ukoll li t-tisbiħ jitwettaq ukoll billi jitnaddaf materjal li jintefa’ minn nies irresponsabbli fil-kampanja u fil-widien.
Francis Zammit Dimech qal li ż-żewġ siti li kienu qed iżuru llum kienu eżempju ta’ ħidma ta’ tisbiħ ’il bogħod minn lokalitajiet mibnija iżda li jservu bħala post fejn il-Maltin iqattgħu l-ħin liberu tagħhom. Hu qal ukoll li wieħed minn dawn is-siti kien qed jitnaddaf b’mod regolari minn persuni bi bżonnijiet speċjali li ma jridux karità mill-Gvern iżda jinsistu li jaħdmu biex jaqilgħu l-ħobża ta’ kuljum.
Il-Ministru għar-Riżorsi u l-Infrastruttura qal li f’Ħal Far, fejn hemm picnic area li hi frekwentata ħafna f’dawn il-jiem tas-sena, ħaddiema mis-Sezzjoni għall-Parks u Konservazzjoni tal-Pajsaġġ sewwew ħitan u naddfu l-inħawi minn skart goff. Hu qal li membri ta’ l-Eden Co-operative Society Limited qed inaddfu b’mod regolari dawn l-inħawi. Francis Zammit Dimech appella lil dawk kollha li jiffrekwentaw dawn l-inħawi biex ma jagħmlux ħsara billi jaqilgħu ġebel mill-ħitan u jipparkjaw vetturi fl-inħawi maħsuba bħala picnic area.
Francis Zammit Dimech tkellem dwar ix-xogħol li qed isir fl-inħawi ta’ Għar Ħasan. Hu fakkar li minn dawn l-inħawi kienu diġà tneħħew 580 tunnellata, jew madwar 40 trakk skart. Hu qal li bħalissa ħaddiema mis-Sezzjoni għall-Parks u Konservazzjoni tal-Pajsaġġ kienu qed jibnu ħitan tas-sejjieħ u joħolqu spazji anke b’bankijiet tal-ġebel fejn familji sħaħ ikunu jistgħu iqattgħu l-ħin liberu u jgawdu l-veduti sbieħ f’dawn l-inħawi. Il-Ministru Zammit Dimech qal li ħaddiema mid-Dipartiment għall-Imaniġġjar ta’ l-Iskart kienu qegħdin inaddfu l-inħawi li jwasslu sa’ Għar Ħasan, u anke l-istess għar.
Il-Ministru għar-Riżorsi u l-Infrastruttura qal li d-Dipartiment tal-Manifattura u Servizzi fi ħdan il-Ministeru kien se jieħu ħsieb li jinbidel il-ħadid li jwassal għall-għar. Hu qal li sakemm dan il-ħadid jitlesta fi żmien ftit tal-ġimgħat oħra kien saru t-tiswijiet neċessarji biex jitneħħa il-periklu li kien hemm. Francis Zammit Dimech qal li ħaddiema mis-Sezzjoni kontra t-Tniġġiż miż-Żejt kienu qed inaddfu l-blat minn kitba biż-żebgħa li saret fuqu.
Il-Ministru Francis Zammit Dimech qal li permezz ta’ din il-ħidma l-Gvern kien qed igħin b’mod konkret lill-Kunsilli Lokali biex iżommu fi stat tajjeb siti bħal dawn. Hu appella biex darba jitlestew proġetti bħal dawn isir minn kollox biex ma jiġux vandalizzati u biex ma jintremiex skart li jisfreġja dan l-ambjent sabiħ.
Il-Ministru Francis Zammit Dimech fakkar li f’dawn l-aħħar erba’ snin il-Unit għal Servizz u Tisbiħ waħdu neħħa aktar minn 32,000 tunnellata’ jew madwar 2,200 trakk skart. Dan il-materjal kien qed jintrama’ minn nies irresponsabbli li m’humiex jużaw il-faċilitajiet li qed iqiegħed għad-diżpożizzjoni tagħhom il-Gvern biex jiddisponu mill-iskart li jkollhom.
Francis Zammit Dimech qal li minn nofs din is-sena t-Taqsima għal-Parks u Konservazzjoni tal-Pajsaġġ kienet bdiet ħidma biex tneħħi tankijiet minn għelieqi li barra milli qegħdin hemm kontra l-liġi kienu jkerrħu lill-ambjent. Hu qal li sal-ġimgħa l-oħra kienu tneħħew 6,750 tank. Qal li dawn kienu qed jitgħaffġu u jinġarru minn ħaddiema tad-
Dipartiment tal-Manifattura u Servizzi.
Il-Ministru għar-Riżorsi u l-Infrastruttura tenna li pajjiżna ikun nadif kemm kull wieħed u waħda minnha jżommu nadif. Hu qal li l-Gvern jagħti sehmu biex inaddaf u jsebbaħ iżda jrid ikun il-poplu li jħares l-indafa. Francis Zammit Dimech filwaqt li rringrazzja lil kulmin qed jaħdem biex pajjiżna jissebbaħ u jinżamm nadif appella għal aktar sens ċiviku li għandu jixprunana biex mhux biss nikkundannaw lil min iħammeġ iżda biex anke nagħtu sehmna għal pajjiż ambjentalment isbaħ.
Other Press Releases:
PR261929
PRESS RELEASE BY THE NATIONAL AUDIT OFFICE National Audit Office Malta hos...
PR261928