Left arrow Go Back

L-ISBAH ĊANS GĦAL GARANZIJA TA’ SIGURTA`

PR1399
Date Icon 10/10/2002

“L-għażliet politiċi li ser nagħmlu s-sena d-dieħla ser jagħmlu, jew iżarmaw, il-fażi li jmiss ta’ l-iżvilupp ta’ pajjizna. Aħna konvinti li l-ġenju, l-intelliġenza, l-ħiliet u l-potenzjal tal-Maltin jeħtieġu l-isfida ta’ l-ispazju akbar ta’ l-Unjoni Ewropea biex jifjorixxu sal-milja tagħhom. M’hemmx dubju li dan jissarraf f’xogħol, prosperita` u sliem għal uliedna u l-familji tagħhom."

Dan sostnieh l-Onor. Louis Galea, Ministru ta’ l-Edukazzjoni, meta llejla inawgura Seminar ta’ tlitt ijiem fil-Crowne Plaza Hotel, Sliema, bit-tema "European Integration, Xenophobia, Active Citizenship and Adult Learning". Għas-Seminar qed jattendu il-Koordinaturi tal-Programm tal-UE Grundtvig minn diversi pajjizi Ewropej.

Il-Ministru Galea fisser li l-Gvern Malti qed joffri viżjoni ċara u konkreta li issa tinsab pass biss il-bogħod milli titwettaq. Ir-riżultati konkreti pożittivi tad-direzzjoni u leadership li offra l-Gvern f’dawn l-aħħar erbgħa snin huma diġa` sinjal ċar tal-frott akbar li l-Maltin jaħsdu meta jagħżlu li jieħdu posthom bi dritt fit-tmexxija u l-iżvilupp ta’ l-Unjoni Ewropea. Louis Galea qal li Malta għandha bżonn u tapprezza kull għajnuna finanzjarja.

Iżda l-istorja ekonomika u soċjali ta’ Malta fl-aħħar ħamsin sena uriet li l-progress u l-prosperita` vera seħħew bis-saħħa ta’ l-inizjattiva u r-riżorsi tal-Maltin li b’kuraġġ u fiduċja ħatfu kull sfida u opportunita` li ġiet quddiemhom. Il-Ministru Galea qal li hu jemmen li darba inkunu fl-Unjoni Ewropea l-Maltin ser ikunu fost l-aktar kapaċi biex jaħdmu l-għalqa l-ġdida bi bżulija u għaqal. Ta’ dan huma ser ikunu rispettati u ammirati mill-Ewropej kollha.

"Jekk il-Maltin u l-Ghawdxin urew diġa` din il-kapaċita` meta kellhom jitbiegħdu fl-Awstralja, l-Amerika, l-Kanada u postijiet oħra, żgur mhux ser jonqsu li jirnexxu fuq skala akbar minn ġo darhom stess meta jkunu ċittadini attivi ta’ l-Unjoni Ewropea,” kompla Louis Galea.

Il-Ministru Louis Galea qal li s-sehem ta’ Malta s’issa fil-Programmi Edukattivi Ewropej juri l-kapaċita` tal-Maltin li jisfruttaw favurhom l-isfidi u l-opportunitajiet li jiltaqgħu magħhom. “F’dawn il-programmi il-Maltin bdew b’ċertu prudenza u beżgħanin li fil-finanzi se jmorru minn taħt. Il-fatti urew li fis-sentejn li issa ilna nieħdu sehem spiċċajna f’pożizzjoni ta’ leadership f’diversi proġetti u qlibna l-bilanċ finanzjarju bil-bosta favur tagħna.

Dan hu eżempju żgħir tal-benefiċċji li l-Maltin jiksbu mhux tant bl-għajnuna finanzjarja diretta li tista` tingħata, daqskemm bil-parteċipazzjoni diretta u dinamika fis-suq enormi ta’ l-Unjoni Ewropea.

Hekk kif ġara fl-istorja tal-Maltin s’issa, il-fidi tagħna għandna inpoġġuha l-ewwel u qabel kollox f’dak kollu li jiddependi minna direttament. Is-sħubija tagħna fl-Unjoni Ewropea ma tfisserx induru l-Ewropa bil-kopp nittalbu l-karita`. Tfisser li aħna inkunu fis-suq bi dritt u bla ħadd ma jista` jfixkilna milli b’mod ħawtiel niġġeneraw prosperita` għal uliedna u l-familji tagħna. B’hekk inkunu ksibna l-aqwa valur miżjud li qatt nistgħu nimmaginaw f’kull qasam tal-ħajja tagħna," sostna l-Ministru Galea.

Il-Ministru Louis Galea fisser li Malta hi ħerqana biex tara t-tkabbir ta’ l-Unjoni Ewropea jseħħ. "Malta temmen li dan ser iġib aktar paċi u sigurta` għal popli Ewropej kollha. Iżda Malta b’mod partikolari għandha interess vitali li sa fl-aħħar tankra is-sigurta` tagħha bl-aktar mod sod, ċar u li jirrendi. Malta m’għandiex biex taffaċċja it-theddid u l-perikoli għall-paċi u l-prosperita` tagħha waħedha. Il-mewġa ta’ immigranti illegali diġa` hi sinjal tad-diffikultajiet li jkollna biex nilqgħu għal sitwazzjonijiet diffiċli. U dan hu biss aspett wieħed tal-komplessita` tax-xenarju li Malta trid taffaċċja f’nofs ta’ baħar bejn tlitt kontinenti. Gvernijiet Maltin differenti ilhom għal dawn l-aħħar ħamsin sena jippruvaw jagħtu lill-poplu Malti garanzija kredibbli ta’ sigurta`. Huwa ċar li għandna l-isbaħ ċans li din il-garanzija insibuha bħala membri tal-Unjoni Ewropea.

Il-Ministru Louis Galea kompla jgħid li Malta trid ukoll tara l-pajjiżi ta’ l-Ewropa Ċentrali u tal-Lvant membri ta’ l-Unjoni Ewropea biex b’hekk anke dawn jiksbu il-garanzija ta’ paċi, sigurta` u prosperita`. “Meta l-Unjoni Ewropea tikber b’għaxar membri oħra, b’popolazzjoni ta’ miljuni, ser jirbaħ kulhadd – dawk li diga` huma membri, il-membri ġodda, u l-bqija tad-dinja. L-Unjoni Ewropea ser tiżviluppa f’wieħed mill-akbar swieq dinjin mibni mhux sempliċiment fuq il-valur tal-flus daqskemm fuq il-valuri tad-dinjita` tal-bniedem li jeħtieġ il-liberta`, id-demokrazija u s-solidarjeta` biex jiffjorixxi u jipprospera."

Louis Galea qal li dawn huma l-kondizzjonijiet essenzjali biex jiġi assigurat li ħadd ma jiġi emarġinat, u biex jixejjnu r-razziżmu u x-xenofobija. Il-Ministru spjega kif Malta qed tirriforma s-sistema edukattiv tagħha skond Kurrikulu Nazzjonali ġdid. “ Issa qed isir xogħol ukoll biex nadottaw strateġija ta’ Tagħlim Tul il-Ħajja. B’hekk Malta jkollha strateġija konsistenti ta’ sistema edukattiv fejn iż-żewġ fażijiet, dik ta’ bejn tlieta u sittax il-sena koperta mill-Kurrikulu Nazzjonali, u dik ta’ l-edukazzjoni tul il-bqija tal-ħajja, jkunu mibnija fuq prinċipji u valuri umani li jagħmlu mill-Maltin cittadini attivi f’kull progress ekonomiku, soċjali u kulturali," sostna Dr Galea.

Il-Ministru Louis Galea faħħar is-sehem ta’ Malta fil-programm GRUNDTVIG b’diversi proġetti li jinkwadraw ruhhom fit-tematika ta’ inizjattivi kontra l-emarginazzjoni permezz ta’ edukazzjoni għall-adulti u ċittadinanza attiva. Dr Galea qal li l-Maltin fasslu u qed iwettqu ma’ sħabhom Ewropej proġetti diversi, fosthom dawk dwar is-Sostennibilita` Ambjentali, il-Proċess Interkulturali, l-Ugwaljanza tas-Sessi, l-Illiteriżmu u l-Involviment tal-Ġenituri, l-Edukazzjoni għall-Ħabsin. “Malta temmen li l-iżviluppi ta’ l-għodda edukattiva tat-tagħlim tul il-ħajja għandha titwassal b’urġenza f’kull grupp soċjali tal-kontinent Ewropew. B’hekk l-emarginazzjoni tiġi attakkata b’mod determinat kemm jista` jkun fl-għeruq tagħha.

Dawn huma l-iżviluppi li jgħinu l-bniedem jikseb il-ħiliet bażiċi biex ikun ċittadin attiv sew fis-suq tax-xogħol, bil-flessibilita` u l-mobilita` li jġib miegħu, kif ukoll fl-oqsma soċjali u kulturali. B’hekk kull individwu jaħdem biex jinseġ xibka ta’ identita` u solidarjeta` fejn il-familja, l-iskola u l-post tax-xogħol ikunu aġenti b’saħħithom u umani għall-akbar tgawdija tal-ħajja." Louis Galea temm jgħid li dawn għandhom ikunu elementi importanti fit-twettiq tal-ġustizzja soċjali.

Fis-sessjoni inawgurali tkellmu wkoll is-sur Ronnie Micallef, Direttur tal-British Council f’Malta u Dr Joseph Mifsud, iċ-Chairperson tas-Socrates f’Malta. Is-Seminar ser jiġi indirizzat minn Sue Waddington tan-NIACE u minn Prof. Alistair Ross taċ-CICE, it-tnejn mir-Renju Unit.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

More Press Releases Right arrow