Left arrow Go Back

Għajnuna finanzjarja għal min ikabbar il-patata

PR1371
Date Icon 07/10/2002

Dawk il-bdiewa li jkabbru l-patata, kemm għas-suq lokali kif ukoll għall-esportazzjoni, se jibdew jirċievu għajnuna finanzjarja mill-Gvern b’seħħ minn din is-sena. L-għajnuna li se tibda titħallas se tammonta għal Lm10 kull tomna raba’ miżrugħa u l-ewwel ħlas se jkun għall-patata li tkabbret għar-rebbiegħa ta’ din is-sena. Fil-gżejjer Maltin hu stmat li madwar 16,000 tomna raba’ jintużaw għat-tkabir tal-patata.

Dan ħabbru l-Ministru għall-Agrikultura u Sajd Ninu Zammit meta l-bierah kellem lil bdiewa u membri oħra tal-pubbliku li attendew għal laqgħa dwar it-tkabbir u l-ippriservar taż-żebbuġ. Il-laqgħa, organizzata mit-Taqsima tas-Servizzi Agrikoli u Żvilupp Rurali, saret fil-masġar taż-żebbuġ tas-Sur David Debono f’San Anard, limiti ta’ Ħaż-Żabbar.

Il-Ministru Zammit qal li l-għajnuna li se tingħata fuq il-produzzjoni tal-patata hi pakkett speċjali ta’ Lm70 miljun li tħejja għas-settur agrikolu bl-iskop li l-bdiewa u r-raħħala jibqa’ jkollhom dħul xieraq u ġust u biex ikunu wkoll megħjuna jirristrutturaw l-operat tagħhom.

Hu żied li s-settur tat-tkabbir tal-patata f’pajjiżna hu meqjus bħala wieħed strateġiku minħabba l-importanza tal-patata esportata u l-popolarità li tgawdi l-patata fost il-konsumatur Malti. Hu fakkar li f’pajjiżna jitkabbru madwar 30,000 tunnellata patata fis-sena, li kważi 7,000 tunnellata minnhom ikunu esportati.

Il-Ministru Zammit qal li biex il-bdiewa jkunu jistgħu jibdew jirċievu din l-għajnuna għandhom jimlew formola apposta li tista’ tinkiseb minn xi wieħed mill-uffiċċji ta’ l-Extension Service, mill-Pitkalija f’Malta, mill-Pitkalija f’Għawdex jew mill-Ministeru għal Għawdex.

Hu semma wkoll li qed jitħejja pakkett ta’ marketing aid biex jinkoraġġixxi titjib fil-preżentazzjoni tal-patata fis-suq lokali.

Il-Ministru Zammit irrifera wkoll għall-ħidma li qed tkompli ssir biex is-settur tal-biedja f’pajjiżna jissaħħaħ u jkun sostenibbli billi, fost l-oħrajn, ikun hemm ukoll diversifikazzjoni fil-produzzjoni agrikola. Hu wera s-sodisfazzjoni tiegħu li l-isforzi li qed isiru mill-Gvern biex tingħata spinta lit-tkabbir tad-dwieli għall-produzzjoni ta’ l-inbid u taż-żebbuġ kemm għall-ikel kif ukoll għall-produzzjoni taż-żejt qed iħallu r-riżultati mixtieqa.

Hu fakkar li ż-żebbuġa hi ideali kemm għall-klima kif ukoll għall-ħamrija lokali filwaqt li l-perċentaġġ ta’ aċtu taż-żebbuġa mkabbra f’Malta hu anqas minn dak ta’ żebbuġ imkabbar f’pajjiżi oħra fil-Mediterran. Żied li n-numru ta’ siġar taż-żebbuġ f’pajjiżna f’dawn l-aħħar erba’ snin żdied sostanzjalment tant li l-importazzjoni tas-siġar taż-żebbuġ żdiedet minn 3,378 fl-1997 għal 20,149 is-sena l-oħra. Din is-sena diġà kienu impurtati 12,362 siġra.

Il-Ministru Zammit qal li minbarra li ħafna minn dawn is-siġar ikunu impurtati mill-Gvern biex ikunu jistgħu jinbiegħu lill-bdiewa bi prezz sussidjat, bdew ukoll jitkabru eluf ta’ siġar fil-mixtla tal-Gvern f’San Vinċenz de Paul. Għall-istaġun tat-tħawwil li jmiss se jkunu laħqu għat-tħawwil aktar minn 4,000 siġra li tlaqqmu lokalment, filwaqt li hemm madwar 3,000 siġra oħra li jilħqu għat-tħawwil f’Jannar ta’ l-2004. Din is-sena nżergħu wkoll madwar erba’ kilos ta’ żerriegħa taż-żebbuġ bl-iskop li jkun hemm madwar 4,000 pjanta oħra għat-tilqim.

Dan kollu juri, kompla l-Ministru Zammit, li l-Gvern qed jagħmel l-almu tiegħu kollu biex jara li din l-industrija terġa’ titwaqqaf fuq saqajha. Fl-istess waqt wera s-sodisfazzjon tiegħu li aktar individwi jew ditti qed jorganizzaw ruħhom għall-ippressar taż-żebbuġ u qal li dan juri li qed tikber il-fiduċja fil-futur ta’ din l-industrija f’pajjiżna.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

More Press Releases Right arrow