Left arrow Go Back

Proġett li qed jelimina 15 fil-mija tal-fosos

PR1299
Date Icon 25/09/2002

Waqt li kien qed izur xoghlijiet li saru fuq mina tad-drenagg fil-Qortin ta’ Ghajn Zejtuna fil-Mellieha, il-Ministru għar-Riżorsi u l-Infrastruttura Francis Zammit Dimech qal li s-sistema tad-drenaġġ hi llum estiża għal kull rokna ta’ Malta u Għawdex. Hu qal iżda li jibqa’ lokalitajiet żgħar fejn is-sistema ma tkunx tista’ tasal minħabba raġunijiet tekniċi. Waħda minn dawn il-lokalitajiet kienet il-Qortin ta’ Għajn Żejtuna fil-Mellieħa.

Francis Zammit Dimech qal li għal snin sħaħ ir-residenti ta’ din il-lokalita’ kienu moqdija b’fosos individwali li jitbattlu ta’ kull ġimgħa minn bowsers tal-privat u tal-Gvern. Dan joħloq inkonvenjent lir-residenti tal-lokalita’.

Il-Ministru għar-Riżorsi u l-Infrastruttura qal li tul is-snin ir-residenti ta’ l-inħawi għamlu kemm il-talba biex jitwasslilhom id-drenaġġ. Hu qal li kien f’dawn l-aħħar erba’ snin li l-Gvern laqa’ din it-talba. Francis Zammit Dimech qal li ma kienx faċli li dawn l-inħawi jitqabbdu mas-sistema tad-drenaġġ minħabba t-topografija ta’ l-art. Id-Dipartiment tad-Drenaġġ kellu quddiemu żewġ alternattivi

  • L-ewwel alternattiva hi li permezz ta’ pompi d-drenaġġ jitwassal sa Triq il-Kbira fil-Mellieħa;
  • It-tieni alternattiva hi permezz ta’ mina, li taqsam parti kbira mill-Qortin, u collector main li jwasslu kważi sat-Tunnara fil-parti t’isfel tal-bajja tal-Mellieħa.

Il-Ministru Francis Zammit Dimech qal li meta saru l-istimi nstab li t-tieni alternattiva kienet l-aktar waħda vantaġġjuża. Għalhekk id-Dipartiment tad-Drenaġġ ħadem fuq sistema maqsuma f’żewġ fażijiet bl-ewwel fażi tinkludi t-tħaffir ta’ mina twila 280m metru bit-tieni fażi tinkorpora parti żgħira minn Triq Newton, Triq G. Galilei u Triq J. Kepler li hi maħsuba li titkompla fil-bidu tas-sena d-dieħla.

Il-Ministru għar-Riżorsi u l-Infrastruttura qal li fl-ewwel fażi tal-proġett saru ħames shafts li minbarra li jservu għall-manutenzjoni ta’ l-istess mina, iservu wkoll biex is-sistema tal-wiċċ li magħhom jaqbdu d-djar taqa’ fuq il-main li hemm fil-mini. Hu qal li minn din il-mina kbira wiesgħa madwar żewġ metri u nofs b’2.75 metri għolja, id-drenaġġ jibqa’ għaddej għal ġo main ieħor twil 1.03 kilometri b’250 mm diametru li jaqsam il-Wied ta’ Santa Marija Estate u jwassal sat-Tunnara.

Francis Zammit Dimech qal li b’kollox f’dan il-proġett ġew imqiegħda tliet kilometri ta’ mains. Din il-fażi tlestiet u r-residenti ta’ parti minn Triq I. Newton, parti minn Triq Galilei, Triq Coperniċi, Triq W. Russell, Triq il-Qortin u Triq il-Birwina issa jistgħu jagħmlu arranġamenti biex iqabbdu mas-sistema tad-drenaġġ. Hu qal li baqa’ xi xogħol fi Triq Edmond Halley li mistenni jispiċċa x-xahar id-dieħel biex anke ir-residenti ta’ din it-triq ikunu jistgħu jqabbdu mas-sistema tad-drenaġġ.

Il-Ministru Francis Zammit Dimech qal li dan il-proġett sewa madwar Lm150,000 u permezz tiegħu n-numru ta’ fosos – li jammonta għal 950 f’Malta kollha – se jonqsu bi 15 fil-mija.

Il-Ministru għar-Riżorsi u l-Infrastruttura qal li matul dawn l-aħħar erba’ snin tqiegħdu 216-il estensjoni tad-drenaġġ ma’ Malta u Għawdex b’tul ta’ 22 kilometru. Hu qal li fl-istess waqt id-Dipartiment tad-Drenaġġ kompla bil-pjani tiegħu li jtejjeb u jsaħħaħ il-Pumping Stations mhux biss billi jipprovdi l-aktar tagħmir modern iżda anke biex ikun hemm ġeneraturi f’każ ta’ qtugħ fis-sistema ta’ l-elettriku. Hu fakkar li fost il-Pumping Stations li komplew jiġu modernizzati u upgraded hemm dawk Tax-Xama f’San Pawl il-Baħar, f’Ta’ Qali, f’Buġibba u l-Qajjenza, b’Buġa.

Il-Ministru Francis Zammit Dimech qal li permezz tal-ħidma kontinwa li qed issir fis-sistema tad-drenaġġ l-ibħra madwar Malta u Għawdex qed jinżammu aktar indaf. Hu fakkar li din is-sena kienet l-aħjar sena għall-kwalita’ ta’ l-ilma baħar. Francis Zammit Dimech irringrazzja lill-ħaddiema kollha tad-Dipartiment tad-Drenaġġ għall-ħidma tagħhom biex is-sistema tad-drenaġġ tinżamm f’kundizzjoni tajba l-ħin kollu.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE NATIONAL AUDIT OFFICE  National Audit Office Malta hosts bilateral meeting with the Spanish Court of Audit

PR261929

PRESS RELEASE BY THE NATIONAL AUDIT OFFICE National Audit Office Malta hos...

STQARRIJA MILL-UFFIĊĊJU TAL-PRIM MINISTRU  “Sodisfatt bil-qbil bejn il-mexxejja tal-UE għax Malta ilha mill-bidu nett timbotta favur soluzzjoni għall-paċi” – Il-Prim Ministru Robert Abela

PR261926

STQARRIJA MILL-UFFIĊĊJU TAL-PRIM MINISTRU “Sodisfatt bil-qbil bejn il-mexx...

More Press Releases Right arrow