RAPPORT DWAR L-EFFIĊJENZA TAL-KUNSILLI LOKALI

Id-Dipartiment tal-Kunsilli Lokali ppubblika u qed iqassam l-ewwel Rapport għas-sena 2001 dwar l-Effiċjenza tal-ħidma tal-Kunsilli Lokali li jkopri l-perjodu Diċembru 2000 - Marzu 2001.

Il-Ministru tal-Ġustizzja u Gvern Lokali poġġa r-Rapport fuq il-Mejda tal-Kamra tar-Rappreżentanti l-bieraħ, l-24 ta' Lulju 2001.

F'dan ir-Rapport ġie kkonfermat it-tibdil li seħħ fil-preżentazzjoni taċ-charts li kien ġie ntrodott għall-ewwel darba fir-Rapport preċedenti, waqt li kompliet il-ħidma biex titjieb l-analiżi tal-kundizzjoni tat-toroq kemm fiż-żoni residenzjali kif ukoll f' dawk rurali taż-żewġ gżejjer.

Fir-rapport li qed jitqassam wieħed jista' janalizza fid-dettal ir-riżultati ta' l-ispezzjonijiet li saru bejn Diċembru 2000 - Marzu 2001, kif ukoll iqabbel kemm mar-riżultati li kienu jkopru l-perjodu Frar - April 2000, kif ukoll mal-marka medja attwali tal-Kunsilli Lokali f' Malta jew f' Għawdex, jiddependi l-każ.

Id-Dipartiment tal-Kunsilli Lokali jerġa' jtenni li l-iskop ewlieni ta' dan ir-Rapport huwa li jgħin lill-Kunsilli Lokali jtejbu d-dehra ambjentali u infrastrutturali tal-lokal tagħhom, u huwa dejjem għad-dispożizzjoni tagħhom biex jidħol fid-dettal magħhom sabiex l-għanijiet imsemmija jintlaħqu.