“MHUX MINNU LI GVERN NAZZJONALISTA KIEN SE JHAFFER GHAZ-ZEJT F’GHAWDEX” - IS-SUR JOE MIZZI, MINISTRU FL-UFFICCJU TAL-PRIM MINISTRU

Is-Sur Joe Mizzi, Ministru bla Portafoll fl-Ufficcju tal-Prim Ministru, f’kumment lill-gurnalisti, qal li mhux minnu li Gvern Nazzjonalista kien se jhaffer ghaz-zejt f’Ghawdex.  Il-Ministru Mizzi qal li din hija gidba u li huwa jista’ jissostanzja dan b’dokumenti.

Il-Ministru Mizzi qal li l-Ministru ta’ l-Affarijiet Barranin Guido de Marco, fl-24 ta’ Settembru 1996, kien esprima li jistghu jigu mminati l-interessi Taljani jekk isir dan it-thaffir tal-bir taz-zejt.  Il-Ministru ta’ l-Affarijiet Barranin ta’ dak iz-zmien kien qal ukoll li dan it-thaffir kien imur kontra l-ispirtu tal-protokoll finanzjarju Taljan.

Il-Ministru  Mizzi qal li dan ifisser li kien diga` hemm indikazzjoni negattiva dwar it-thaffir ghaz-zejt f’Ghawdex.

Is-Sur Mizzi zied jghid li huwa jista’ jikkonferma li l-ewwel indikazzjonijiet ghat-thaffir tal-bir kienu fl-20 ta’ Frar 1997.  Dan sar permezz tal-Ministeru ghall-Affarijiet Barranin u ta’ l-Ambjent ma’ l-Awtoritajiet Taljani.  Fit-13 ta’ Marzu 1997, bdew it-tahdidiet hawn Malta f’Kastilja ma’ l-Awtoritajiet Taljani.

Kien hawnhekk, qal il-Ministru Joe Mizzi, li bdew id-diskussjonijiet dwar it-thaffir tal-bir u li dan ghandu jigi ffinanzjat mill-protokoll Taljan.

Huwa qal li kien prezenti fil-laqgha tat-13 ta’ Marzu 1997.  Qal li kien hemm xi problemi wara dak iz-zmien, imma dawn  issolvew ukoll, biex finalment il-Gvern wasal fi ftehim li t-thaffir ghaz-zejt isir realment.

Il-Ministru Joe Mizzi qal li dan kollu lest li jissostanzjah bid-dokumenti meta jkun il-mument opportun.