Left arrow Mur Lura

STQARRIJA MILL-MINISTERU GĦALL-INTERN U S-SIGURTÀ Il-Ministru Bedingfield jisħaq fuq l-importanza tal-prevenzjoni u l-kollaborazzjoni biex tissaħħaħ is-sigurtà kontra n-nirien

PR261981
Date Icon 20/11/2026

Il-Ministru għall-Intern u s-Sigurtà, Glenn Bedingfield saħaq fuq l-importanza li s-sigurtà kontra n-nirien ma tkunx limitata għar-rispons f’każ ta’ emerġenza, iżda li tingħata prijorità lill-prevenzjoni, l-ippjanar u l-immaniġġjar aħjar tar-riskji.

 

Il-Ministru qal dan waqt li kien qed jindirizza konferenza organizzata mill-Insurance Association Malta, li ġabret flimkien diversi setturi sabiex jiddiskutu l-importanza tal-immaniġġjar tar-riskji u t-tħejjija aħjar għall-inċidenti.

 

“Is-sigurtà kontra n-nirien hija responsabbiltà komuni. In-nar ma jagħmilx distinzjoni bejn min għandu assigurazzjoni u min m’għandux. Għalhekk irridu naħdmu flimkien biex nipprevjenu l-inċidenti qabel ma jseħħu u nnaqqsu r-riskji kemm jista’ jkun,” qal il-Ministru Bedingfield.

 

Huwa spjega li nirien serji jistgħu jmorru lil hinn mill-ħsara immedjata lil proprjetà, billi jaffettwaw il-ħajja tal-familji, l-operat tan-negozji, l-għajxien tan-nies u r-riżorsi tas-servizzi tal-emerġenza.

 

Il-Ministru enfasizza li l-prevenzjoni mhijiex biss rekwiżit tekniku, iżda investiment fil-kontinwità ekonomika u fir-reżiljenza tal-komunitajiet tagħna. Għaldaqstant, l-ispiża ta’ ppjanar tajjeb u sistemi adegwati ta’ sigurtà għandha dejjem titqies fid-dawl tal-konsegwenzi umani u finanzjarji ferm akbar li jista’ jkollu inċident.

 

Huwa rrikonoxxa wkoll il-ħidma importanti tad-Dipartiment tal-Protezzjoni Ċivili, li tmur lil hinn mir-rispons għall-emerġenzi u tinkludi t-tħejjija, il-prevenzjoni, it-taħriġ, l-għarfien pubbliku u l-kollaborazzjoni ma’ entitajiet oħra.

 

“L-esperjenza diretta tal-uffiċjali tal-Protezzjoni Ċivili hija essenzjali biex nifhmu kif jiżviluppaw in-nirien, kif jistgħu jinfirxu u kemm huma importanti l-aċċess u s-sistemi ta’ protezzjoni f’binja waqt emerġenza,” qal il-Ministru.

 

Huwa enfasizza li miżuri adegwati ta’ protezzjoni kontra n-nirien mhux biss jipproteġu lil dawk li jgħixu jew jaħdmu f’binja, iżda wkoll lill-pumpiera u lill-ħaddiema tal-emerġenza li jirriskjaw ħajjithom biex isalvaw lil ħaddieħor.

 

Il-Ministru saħaq li kull min għandu sehem fil-bini u l-manutenzjoni tal-proprjetà għandu jagħraf ir-responsabbiltà tiegħu biex is-sigurtà tkun prijorità f’kull stadju, mid-disinn inizjali sal-użu u l-manutenzjoni kontinwa.

 

Huwa appella għal aktar kollaborazzjoni bejn il-Gvern, is-servizzi tal-emerġenza, is-settur tal-kostruzzjoni u l-industrija tal-assigurazzjoni, filwaqt li rrikonoxxa r-rwol importanti li din tal-aħħar tista’ taqdi biex tħeġġeġ investiment f’miżuri preventivi u ġestjoni responsabbli tar-riskji.

 

“Ma rridux nibqgħu nqisu s-sigurtà kontra n-nirien bħala piż jew sempliċiment rekwiżit li jrid jiġi ssodisfatt. Irridu nagħrfuha għal dak li verament hija: investiment fundamentali fil-protezzjoni tal-ħajja umana, fis-sigurtà tal-proprjetà u fir-reżiljenza ta’ pajjiżna,” temm jgħid il-Ministru Bedingfield.

STQARRIJA MILL-MINISTERU GĦALL-INTERN U S-SIGURTÀ  Il-Ministru Bedingfield jisħaq fuq l-importanza tal-prevenzjoni u l-kollaborazzjoni biex tissaħħaħ is-sigurtà kontra n-nirien
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR HOME AFFAIRS AND SECURITY  Minister Bedingfield stresses the importance of prevention and cooperation in strengthening fire safety

PR261981en

PRESS RELEASE BY THE MINISTRY FOR HOME AFFAIRS AND SECURITY Minister Bedin...

STQARRIJA MILL-MINISTERU GĦALL-UGWALJANZA U D-DRITTIJIET ĊIVILI  Iffirmat ftehim biex jissaħħu r-riċerka u l-politiki dwar l-ugwaljanza u l-intelliġenza artifiċjali

PR261980

STQARRIJA MILL-MINISTERU GĦALL-UGWALJANZA U D-DRITTIJIET ĊIVILI Iffirmat f...

Aktar Stqarrijiet Right arrow