Left arrow Mur Lura

STQARRIJA MILL-MINISTERU GĦALL-ENERĠIJA, L-AMBJENT U R-RIĠENERAZZJONI TAL-PORT IL-KBIR L-ERA tniedi pubblikazzjoni kommemorattiva: Għaxar snin ta’ ħidma favur il-ħarsien tal-ambjent naturali ta’ Malta

PR261935
Date Icon 16/11/2026

L-Awtorità għall-Ambjent u r-Riżorsi (ERA), b’kollaborazzjoni mal-Università ta’ Malta, nediet il-pubblikazzjoni ‘Custodia Terrae: A Decade of Safeguarding Malta’s Natural Future’, fl-okkażjoni tal-għaxar anniversarju mit-twaqqif tagħha. Din il-pubblikazzjoni tfakkar dan it-tragward importanti u tagħti ħarsa lejn għaxar snin ta’ ħidma favur il-governanza ambjentali f’Malta.


Il-pubblikazzjoni tiġbor fiha kontribuzzjonijiet minn esperti tal-ERA u akkademiċi, u tagħti ħarsa lejn l-iżvilupp tal-Awtorità mit-twaqqif tagħha fl-2016. Il-pubblikazzjoni tħares ukoll lejn l-isfidi u l-opportunitajiet ambjentali li mistennija jsawru s-snin li ġejjin. It-tnax-il kapitlu jkopru diversi oqsma, fosthom il-politika u l-governanza ambjentali, il-ħarsien tal-ambjent marittimu u tal-kosta, it-teknoloġija ġeospazjali, l-involviment tal-pubbliku, ir-regolamentazzjoni u l-infurzar ambjentali, l-immaniġġjar tal-pajsaġġ u l-ippjanar ambjentali fit-tul.


Il-Ministru għall-Ambjent Miriam Dalli saħqet fuq l-irwol importanti tal-ERA fit-tisħiħ tal-ħarsien ambjentali f’Malta, filwaqt li enfasizzat il-ħtieġa ta’ impenn kontinwu, innovazzjoni u ħidma flimkien biex il-wirt naturali tal-pajjiż jibqa’ jiġi mħares għall-ġenerazzjonijiet futuri.


“Matul dawn l-aħħar għaxar snin, l-ERA kellha rwol importanti fit-tisħiħ tal-governanza ambjentali f’Malta u biex tiżgura li l-ħarsien tal-ambjent jibqa’ fil-qalba ta’ dak li nagħmlu. Din il-pubblikazzjoni tiġbor fiha l-għarfien, l-esperjenza u l-impenn miksuba matul dawn is-snin, filwaqt li tfakkarna li l-ħarsien tal-ambjent naturali tagħna huwa responsabbiltà kontinwa. Hekk kif inħarsu ’l quddiem, irridu nkomplu ninvestu f’ħarsien ambjentali aktar b’saħħtu, naddottaw soluzzjonijiet innovattivi u naħdmu flimkien biex inħarsu l-wirt naturali ta’ Malta għall-ġenerazzjonijiet futuri,” qalet il-Ministru Dalli.


Matul it-tnedija ġiet enfasizzata wkoll il-kollaborazzjoni bejn l-ERA u l-Università ta’ Malta. Prof. Simone Borg tat ħarsa lejn il-pubblikazzjoni u spjegat kif Custodia Terrae tgħaqqad flimkien l-esperjenza miksuba fil-prattika u l-għarfien akkademiku. Hija saħqet fuq kif il-governanza ambjentali tinvolvi diversi oqsma, fosthom ix-xjenza, il-liġi, il-politika u t-teknoloġija. Enfasizzat ukoll l-importanza li tiġi dokumentata l-esperjenza miksuba mill-istituzzjonijiet, biex din isservi ta’ bażi għal aktar studju, riċerka u żvilupp ta’ policies differenti. Hija spjegat li l-pubblikazzjoni għandha rilevanza li tmur lil hinn mill-għaxar anniversarju tal-ERA u tista’ sservi bħala referenza għal dawk li qed jistudjaw jew jaħdmu fil-qasam ambjentali.


Waqt l-attività, studenti mill-Fakultà tal-Liġi, mill-Fakultà tax-Xjenza u mill-Istitut tal-Earth Systems spjegaw l-oqsma ta’ studju tagħhom u kif dawn huma marbuta mal-ħidma u r-responsabbiltajiet tal-ERA. Il-kontribut tagħhom wera kif dixxiplini akkademiċi differenti jistgħu jgħinu fil-ħarsien u l-immaniġġjar tal-ambjent, filwaqt li ġew enfasizzati wkoll l-opportunitajiet li toffri l-ERA liż-żgħażagħ biex jagħtu sehem dirett f’dan il-qasam.


It-titlu Custodia Terrae, li jfisser il-ħarsien tal-art, jirrifletti messaġġ ewlieni li l-ħarsien tal-ambjent huwa responsabbiltà kontinwa ta’ kulħadd. It-tnedija ma kinitx biss okkażjoni biex jitfakkru l-ewwel għaxar snin tal-ERA, iżda wkoll opportunità ta’ riflessjoni lejn il-ħidma li saret u ħarsa lejn l-għaxar snin li ġejjin.


“Custodia Terrae tirrifletti l-ħidma li wettqet l-ERA matul l-ewwel għaxar snin tagħha, iżda tfakkarna wkoll li l-ħarsien tal-ambjent huwa responsabbiltà kontinwa. Hekk kif jinbidlu l-isfidi ambjentali, l-ERA trid tkompli tadatta għalihom u tibni fuq l-esperjenza miksuba matul dawn l-ewwel għaxar snin, biex tkompli tħares l-ambjent ta’ Malta għall-ġenerazzjonijiet li ġejjin,” qal iċ-Chairperson tal-ERA Vincent Cassar.


Il-Professur Saviour Formosa, il-moħħ wara din il-pubblikazzjoni, temm l-attività billi rringrazzja lill-awturi u lill-edituri għall-kontribut tagħhom. Huwa saħaq ukoll li “F’qasam dinamiku bħalma huwa dak tal-ambjent, huwa importanti li l-għarfien miksub permezz tax-xogħol u l-esperjenza jinqasam, sabiex dan ikun jista’ jgħaddi lill-ġenerazzjoni li jmiss ta’ esperti u lill-pubbliku inġenerali.”


Il-pubblikazzjoni tinstab hawn: https://era.org.mt/wp-content/uploads/2026/11/Custodia-Terrae-A-Decade-of-Safeguarding-Maltas-Natural-Future.pdf


STQARRIJA MILL-MINISTERU GĦALL-ENERĠIJA, L-AMBJENT U R-RIĠENERAZZJONI TAL-PORT IL-KBIR  L-ERA tniedi pubblikazzjoni kommemorattiva: Għaxar snin ta’ ħidma favur il-ħarsien tal-ambjent naturali ta’ Malta
STQARRIJA MILL-MINISTERU GĦALL-ENERĠIJA, L-AMBJENT U R-RIĠENERAZZJONI TAL-PORT IL-KBIR  L-ERA tniedi pubblikazzjoni kommemorattiva: Għaxar snin ta’ ħidma favur il-ħarsien tal-ambjent naturali ta’ Malta
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR ENERGY, THE ENVIRONMENT AND THE REGENERATION OF THE GRAND HARBOUR  ERA launches anniversary publication: A decade of protecting Malta’s natural future

PR261935en

PRESS RELEASE BY THE MINISTRY FOR ENERGY, THE ENVIRONMENT AND THE REGENERAT...

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  First 12 semiconductor start-ups complete Silicon Catalyst’s incubation programme, with some now setting up operations in Malta

PR261934en

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

Aktar Stqarrijiet Right arrow