STQARRIJA MILL-MINISTERU GĦALL-FONDI EWROPEJ, ID-DJALOGU SOĊJALI U L-PROTEZZJONI TAL-KONSUMATUR Servizzi Ewropej f’Malta torganizza taħriġ li jgħin lill-intrapriżi japplikaw għall-fondi Ewropej

Servizzi Ewropej f'Malta organizzat sessjoni ta' taħriġ għall-intrapriżi bil-għan li tgħin lin-negozji jiżviluppaw l-ideat tagħhom fi proġetti konkreti u jsaħħu l-ħiliet meħtieġa biex japplikaw għall-opportunitajiet ta' fondi Ewropej.

Is-sessjoni laqqgħet rappreżentanti ta' kumpaniji u persuni self-employed għal taħriġ interattiv dwar l-iżvilupp ta' proġetti u l-kitba ta' applikazzjonijiet għall-finanzjament Ewropew.

L-attività kienet indirizzata mill-Ministru għall-Fondi Ewropej, id-Djalogu Soċjali u l-Protezzjoni tal-Konsumatur, Keith Azzopardi Tanti, kif ukoll mill-Kap tal-EU Funding Support Unit, fi ħdan Servizzi Ewropej f'Malta, Dr Darren Grasso.

Fl-intervent tiegħu, il-Ministru Keith Azzopardi Tanti saħaq fuq l-importanza tal-fondi Ewropej biex dawn in-negozji u ħaddiema jkunu jistgħu jibqgħu jikbru, u biex l-ideat tagħhom jinbidlu fi proġetti konkreti li jgħinu biex jinħolqu opportunitajiet ġodda u jissaħħaħ il-ġid ta' pajjiżna. Faħħar ukoll lil Servizzi Ewropej f'Malta għal din l-inizjattiva li qed tressaq dawn l-opportunitajiet eqreb lejn l-intrapriżi u tgħinhom jifhmu aħjar kif jistgħu jagħmlu użu mill-fondi Ewropej.

“Kommessi li nkomplu nressqu dan l-appoġġ eqreb lejn in-negozji, sabiex aktar intrapriżi jkollhom il-kunfidenza u l-kapaċità li jieħdu l-opportunitajiet li joffru l-fondi Ewropej," kompla l-Ministru.

Min-naħa tiegħu, il-Kap tal-EU Funding Support Unit ta' Servizzi Ewropej f'Malta, Dr Darren Grasso, spjega kif l-aġenzija toffri assistenza lil diversi entitajiet, fosthom kumpaniji ta' kull daqs u persuni li huma self-employed. Din l-assistenza tinkludi informazzjoni dwar l-opportunitajiet ta' fondi Ewropej, għajnuna fit-tħejjija u l-mili tal-applikazzjonijiet, kif ukoll gwida lill-benefiċjarji li jkollhom bżonn assistenza waqt l-implimentazzjoni tal-proġetti tagħhom.

Huwa rrefera wkoll għall-programm ta' taħriġ li Servizzi Ewropej f'Malta ilha toffri għal numru ta' snin lil benefiċjarji differenti fosthom, intrapriżi, għaqdiet volontarji, kunsilli lokali, u entitajiet pubbliċi. Matul dawn l-aħħar ħames snin, l-aġenzija organizzat aktar minn 60 sessjoni ta' taħriġ, li għalihom attendew aktar minn 1,500 parteċipant. Dawn is-sessjonijiet jiffukaw primarjament fuq l-iżvilupp u l-kitba ta' proġetti, kif ukoll fuq il-prinċipji ewlenin li għandhom jiġu kkunsidrati waqt l-implimentazzjoni tal-proġetti.

Matul is-sessjoni, il-parteċipanti ngħataw informazzjoni dwar opportunitajiet ta' finanzjament għall-intrapriżi, fosthom il-programm Business Enhance. It-taħriġ kopra wkoll kif jiġu identifikati l-ħtiġijiet ta' proġett, kif jiġu stabbiliti objettivi ċari, kif jkunu ppjanati l-attivitajiet u r-riżultati mistennija, u kif jiġu mħejjija d-dokumenti meħtieġa għall-applikazzjoni.

Permezz ta' eżerċizzji prattiċi li saru fi gruppi u li kienu bbażati fuq sejħa simulata għall-finanzjament, il-parteċipanti kellhom l-opportunità japplikaw l-għarfien miksub u jifhmu aħjar il-passi meħtieġa biex iħejju applikazzjoni.

Permezz ta' dawn l-inizjattivi, Servizzi Ewropej f'Malta tkompli taħdem biex aktar intrapriżi jkollhom l-għarfien u l-appoġġ meħtieġa biex jagħmlu użu mill-opportunitajiet ta' finanzjament li toffri l-Unjoni Ewropea.

Għal aktar informazzjoni dwar il-fondi Ewropej u s-servizzi ta' assistenza offruti mill-aġenzija, wieħed jista' jżur https://sem.gov.mt/.