STQARRIJA MILL-MINISTERU GĦALL-AFFARIJIET BARRANIN U EWROPEJ Malta twissi dwar l-impatt tal-eskalazzjoni fil-Golf Għarbi fuq it-tbaħħir u l-kummerċ fil-Mediterran

Il-Ministru għall-Affarijiet Barranin u Ewropej Chris Fearne esprima t-tħassib ta' Malta dwar l-eskalazzjoni tal-kunflitt fil-Lvant Nofsani, li issa qed testendi wkoll lejn il-Golf Għarbi, u l-konsegwenzi li din tista' tħalli fuq is-sigurtà marittima, il-kummerċ internazzjonali u l-ekonomija ta' Malta u ta' pajjiżi Mediterranji oħra.

Waqt il-parteċipazzjoni tiegħu fil-Kunsill tal-Affarijiet Barranin fil-Lussemburgu, il-Ministru Fearne saħaq li t-tfixkil fit-tbaħħir fl-Istrett ta' Hormuz, flimkien mat-theddid għar-rotot kummerċjali fil-Baħar l-Aħmar u l-Kanal ta' Suez, huwa ta' tħassib serju għall-pajjiżi tan-Nofsinhar tal-Ewropa.

“Parti kbira mill-kummerċ li jasal mill-Asja lejn il-Mediterran tgħaddi mill-Kanal ta' Suez. Kull tfixkil f'dawn ir-rotot jista' jkollu konsegwenzi diretti fuq il-kummerċ u l-ekonomija ta' pajjiżna. Għalhekk, huwa fl-interess ta' Malta li dawn ir-rotot jibqgħu miftuħa u siguri," qal il-Ministru Fearne.

F'dan il-kuntest, Malta esprimiet l-appoġġ tagħha għas-sejħa tar-Rappreżentant Għoli tal-Unjoni Ewropea biex tissaħħaħ il-protezzjoni navali tal-bastimenti kummerċjali fil-Baħar l-Aħmar. Il-Ministru saħaq li n-newtralità ta' Malta ma twaqqafhiex milli tħares l-interessi marittimi u ekonomiċi tagħha, filwaqt li tkompli tappoġġja l-isforzi diplomatiċi biex tonqos it-tensjoni fir-reġjun.

Dwar il-Palestina, il-Ministru Fearne tenna l-appoġġ ta' Malta għal soluzzjoni ta' żewġ stati u esprima tħassib serju dwar il-vjolenza mill-insedjaturi, l-espansjoni tal-insedjamenti fix-Xatt tal-Punent u n-nuqqas ta' progress fil-Pjan għall-Paċi f'Gaża. Huwa saħaq ukoll fuq l-importanza tal-proċess demokratiku Palestinjan u appella biex l-elezzjonijiet isiru kemm jista' jkun malajr, mingħajr posponimenti bla bżonn li jkomplu jdewmu t-tiġdid demokratiku u r-rappreżentanza tal-poplu Palestinjan.

B'rabta mal-Ukrajna, il-Ministru laqa' d-diskussjonijiet dwar waqfien possibbli mill-ġlied, partikolarment hekk kif riesqa x-xitwa.

Matul il-laqgħat fil-Lussemburgu, il-Ministru Fearne tenna wkoll l-importanza tas-solidarjetà u l-ugwaljanza bejn l-Istati Membri tal-Unjoni Ewropea, filwaqt li afferma l-appoġġ ta' Malta għat-tkabbir tal-Unjoni, inkluż l-integrazzjoni Ewropea tal-Montenegro u l-Albanija.