STQARRIJA MILL-MINISTERU GĦALL-INFRASTRUTTURA, L-IPPJANAR U X-XOGĦOL Aktar minn 100 proġett infrastrutturali f’diversi stadji ta’ twettiq

Pjan strateġiku għal twassil ta' investimenti infrastrutturali effiċjenti u fil-ħin

Il-Ministru għall-Infrastruttura, l-Ippjanar u x-Xogħol Jonathan Attard, flimkien mas-Segretarju Permanenti fi ħdan il-Ministeru Ronald Mizzi, żaru l-uffiċini ta' Infrastructure Malta fejn ġew milqugħa mill-Kap Eżekuttiv Steve Ellul u l-Kap Operattiv il-Perit Janice Borg.

Bħala parti mill-aġġornament li ngħataw waqt iż-żjara, ġie spjegat li Infrastructure Malta bħalissa għandha aktar minn 100 proġett infrastrutturali f'diversi stadji ta' twettiq, minn xogħol ta' ppjanar u disinn sa proġetti li jinsabu fil-fażi ta' implimentazzjoni jew li qed joqorbu lejn it-tlestija.

Dawn il-proġetti jkopru firxa wiesgħa ta' oqsma u interventi madwar Malta u Għawdex, inklużi xogħlijiet fuq it-toroq u l-konnettività, proġetti maġġuri infrastrutturali, spazji pubbliċi, infrastruttura marittima u interventi oħra li jwieġbu għall-ħtiġijiet tal-pajjiż li qed jevolvu.

Il-Ministru Attard saħaq li, “L-impenn tiegħi f'dawn id-dekasteri huwa wieħed li jkompli b'aktar investiment fir-riżorsa umana biex inkomplu noffru l-għodda li hemm bżonn biex inkunu nistgħu ntejbu s-servizzi offruti liċ-ċittadini. Infrastructure Malta ċertament għandha rwol kruċjali u ċentrali f'dak li għandu x'jaqsam mal-programm ta' ħidma tal-gvern li jipprospetta varji proġetti infrastrutturali intiżi li jkomplu jtejbu l-kwalità tal-ħajja tan-nies tagħna u jirrispondi mhux biss għal neċessitajiet tal-lum imma anki dawk futuri".

Il-volum u d-diversità tal-proġetti jirriflettu l-iskala tal-ħidma li qed titwettaq minn Infrastructure Malta u l-ħtieġa għal koordinazzjoni kontinwa bejn it-timijiet tekniċi, operattivi u amministrattivi biex l-investiment pubbliku jitwassal b'mod effiċjenti, sostenibbli u fil-ħin.

Matul id-diskussjonijiet ġie enfasizzat ukoll li l-entità qed tkompli ssaħħaħ il-kapaċità tagħha biex timmaniġġja dan il-pipeline ta' proġetti, b'aktar ippjanar strateġiku, koordinazzjoni interna, monitoraġġ tal-progress u governanza tal-proġetti. Dan għandu jwassal għal proċess aktar effiċjenti, minn meta jiġi identifikat il-bżonn għal intervent infrastrutturali sal-kunsinna tiegħu lill-komunitajiet.

Il-Ministru Attard laqa' din il-ħidma u enfasizza l-importanza li l-investiment infrastrutturali jkompli jiġi ppjanat b'viżjoni fit-tul, filwaqt li jiġu massimizzati r-riżorsi disponibbli u jitnaqqsu d-dewmien u l-inkonvenjenzi għall-pubbliku.

Min-naħa tiegħu, il-Kap Eżekuttiv Steve Ellul ta rendikont tal-ħidma li qed issir mill-entità u rringrazzja lill-impjegati għall-professjonalità tagħhom, filwaqt li tenna l-impenn ta' Infrastructure Malta li tkompli twettaq il-missjoni tagħha permezz ta' ppjanar strateġiku, governanza tajba u eċċellenza operattiva biex il-pajjiż jimxi għall-pass li jmiss f'dan il-qasam.

Matul iż-żjara, il-Ministru u s-Segretarju Permanenti ltaqgħu mal-impjegati u l-kapijiet ta' diversi taqsimiet li jiffurmaw parti mill-operat ta' Infrastructure Malta. Huma żaru fost oħrajn it-taqsimiet tal-Procurement, tar-Riżorsi Umani, tal-Awditjar Intern, tal-Proġetti Esterni, tal-Informatika, tax-xogħlijiet fuq it-toroq, tas-sorveljanza tal-artijiet u dik kwantitattiva, tal-Marittimu, tal-Esproprjazzjonijiet, tal-Proġetti Maġġuri, tar-relazzjonijiet maċ-ċittadini, tal-koordinament & manutenzjoni, tal-Finanzi, tal-Komunikazzjoni u dik Legali.