STQARRIJA MILL-UFFIĊĊJU TAL-PRESIDENT The Malta Motorsport Federation Festival Għall-Istrina fl-20 ta’ Settembru

Fl-20 ta’ Settembru, fil-Ħal Far Motor Way, se jsir The Malta Motorsport Federation Festival Għall-istrina, fuq idea ta’ The Malta Motorsport Federation. 

Organizzat mill-istess Federazzjoni flimkien mal-Malta Community Chest Fund (MCCF), li se tibbenefika mid-dħul, din l-inizjattiva ġdida se tiġbor flimkien mijiet ta’ karozzi lussużi, sportivi u klassiċi, kif ukoll muturi u trakkijiet f’post wieħed għal dik li mistennija tkun waħda mill-ikbar attivitajiet tax-xorta tagħha f’Malta. 

L-attività tnediet fil-Ħal Far Race Way, fejn se ssir l-attività, waqt konferenza tal-aħbarijiet indirizzata mill-Eċċellenza Tagħha Myriam Spiteri Debono, President ta’ Malta, u Duncan Micallef, President tal-Malta Motorsport Federation. 

Il-President fissret kif dan il-festival nibet mix-xewqa li tingħaqad il-passjoni ta’ eluf ta’ dilettanti lokali tal-motorsport ma’ għan nobbli b’risq il-Malta Community Chest Fund.

L-Eċċellenza Tagħha aċċennat il-ħidma li ilha għaddejja għal diversi xhur biex din l-attività tinkorpora fiha diversi elementi u jkun żgurat li dawk kollha li jattendu jgawdu ġurnata sħiħa ta’ divertiment għall-familja kollha.

Fuq kollox, il-President Myriam Spiteri Debono enfasizzat li din l-attività qed issir biex jinġabru fondi għall-Malta Community Chest Fund, biex tkompli taqdi l-missjoni tagħha li tgħin lil dawk kollha li jirrikorru għandha għal-għajnuna.

Min-naħa tiegħu Duncan Micallef spjega kif matul The Motorsport Federation Festival Għall-istrina it-trakka tal-kwart ta’ mil se tinbidel b’wirja statika ta’ ammont kbir ta’ karozzi, waqt li fl-istess ħin se jkunu għaddejjin ukoll spettakli tal-karozzi, fosthom wirja ta’ drag racing organizzata mill-Malta Drag Racing Association.

Il-Festival se jkun mifrux matul il-ġurnata kollha, u dawk li jattendu jistgħu jagħmlu użu wkoll minn car simulators, go karting u attivitajiet għall-familja li jinkludu ikel, xorb u divertiment. Diversi importaturi lokali tal-karozzi wkoll ikkonfermaw il-parteċipazzjoni tagħhom, billi jesebixxu l-vetturi.

Il-biljetti huma disponibbli diġà fuq is-sit showshappening.com, għal €10 għall-adulti u €5 għat-tfal.

Sidien ta’ vetturi, kemm dawk li huma membri ta’ klabbs kif ukoll dawk li mhumiex u li jixtiequ jkunu parti minn din l-attività billi jesebixxu jistgħu jagħmlu dan billi jiksbu biljett apposta minn fuq is-sit showshappening.com.

The Motorsport Federation Festival Għall-istrina  hu possibbli grazzi għall-għajnuna ta’ Transport Malta, LESA, il-Korp tal-Pulizija u d-Dipartiment tal-Protezzjoni Ċivili li qed jassistu fl-organizzazzjoni ta’ din l-attività. Din l-attività hi appoġġjata wkoll mis-Social Causes Fund, Enemed, Visit Malta, Malta Drag Racing Association u l-Malta Motorsport Federation.