STQARRIJA MILL-MINISTERU GĦALL-INTERN U S-SIGURTÀ Il-Ministru Glenn Bedingfield itenni s-solidarjetà ta’ Malta ma’ Spanja u jappella għal rispons Ewropew aktar b’saħħtu kontra l-immigrazzjoni irregolari

Il-Ministru għall-Intern u s-Sigurtà Glenn Bedingfield ipparteċipa f’laqgħa straordinarja online tal-Kunsill tal-Ministri għall-Affarijiet Interni tal-Unjoni Ewropea, li saret nhar it-Tlieta 4 ta’ Awwissu 2026, biex jiġu diskussi l-iżviluppi reċenti marbuta mal-pressjoni migratorja f’Ceuta, il-belt awtonoma Spanjola fuq il-kosta tat-Tramuntana tal-Afrika.

Matul il-laqgħa, il-Ministru Bedingfield esprima s-solidarjetà sħiħa ta’ Malta ma’ Spanja u faħħar ir-rispons immedjat u deċiżiv tal-awtoritajiet Spanjoli, f’kooperazzjoni mill-qrib mal-Marokk, sabiex tiġi rrestawrata l-ordni u jerġa’ jiġi stabbilit il-kontroll tas-sitwazzjoni. Huwa laqa’ wkoll l-implimentazzjoni rapida tar-ritorni volontarji għall-maġġoranza tal-persuni li daħlu f’Ceuta b’mod irregolari, kif ukoll il-miżuri li ttieħdu biex jissaħħu l-ġestjoni u s-sigurtà tal-fruntieri.

Il-Ministru osserva li l-avvenimenti f’Ceuta jikkonfermaw kemm il-pressjonijiet migratorji jistgħu jiżviluppaw u jinbidlu fi żmien qasir. Għalhekk, sostna li l-Unjoni Ewropea trid tibqa’ viġilanti, preparata u kapaċi tirreaġixxi b’mod rapidu u effettiv għal sitwazzjonijiet bħal dawn. Enfasizza li l-prijorità immedjata għandha tkun li Spanja żżomm kontroll sħiħ tal-fruntiera esterna tagħha, bl-appoġġ tal-aġenziji u l-istrumenti kollha disponibbli tal-Unjoni Ewropea.

Il-Ministru Bedingfield sostna li l-Unjoni Ewropea diġà għandha l-qafas legali, l-għodod operazzjonali u l-aġenziji meħtieġa biex tindirizza l-isfidi migratorji. Qal li aktar milli jinħolqu strumenti ġodda, għandu jsir użu aktar rapidu, koordinat u effettiv tal-mekkaniżmi eżistenti sabiex l-Istati Membri li jkunu qed jiffaċċjaw pressjoni fuq il-fruntieri esterni jingħataw l-appoġġ meħtieġ mingħajr dewmien.

Huwa appella wkoll għal politika Ewropea komprensiva u bbilanċjata dwar il-migrazzjoni, li tkun soda kontra l-migrazzjoni irregolari u fl-istess waqt tindirizza b’mod effettiv il-kawżi ewlenin tagħha. Dan, qal il-Ministru, jirrikjedi protezzjoni aktar b’saħħitha tal-fruntieri esterni tal-Unjoni, aktar azzjoni kontra t-traffikanti tal-bnedmin u n-netwerks kriminali, sistemi ta’ ritorn aktar effettivi u kooperazzjoni aktar mill-qrib mal-pajjiżi tal-oriġini u tat-tranżitu. Huwa enfasizza li dawn is-sħubijiet huma kruċjali biex jiġu evitati t-tluq irregolari, jitnaqqsu l-pressjonijiet migratorji u jiġu ffaċilitati r-ritorni.

Filwaqt li tenna li l-migrazzjoni irregolari hija sfida Ewropea li tirrikjedi responsabbiltà kollettiva, il-Ministru Bedingfield appella għal aktar solidarjetà, kooperazzjoni prattika u tqassim ġust tar-responsabbiltajiet bejn l-Istati Membri. Huwa sostna wkoll li l-Unjoni Ewropea għandha tkompli tavvanza soluzzjonijiet innovattivi, inkluż ir-return hubs, filwaqt li ssaħħaħ l-effettività tas-sistema Ewropea tar-ritorn.

Il-Ministru tenna wkoll il-prinċipju li kull Stat Membru għandu jżomm id-dritt u l-awtorità li jiddeċiedi min jista’ jidħol u jibqa’ fit-territorju tiegħu, dejjem skont il-liġi nazzjonali u dik tal-Unjoni Ewropea.

“Issa huwa ż-żmien li l-Unjoni Ewropea turi għaqda u determinazzjoni. Flimkien irridu nappoġġjaw lill-Istati Membri li qed jiffaċċjaw pressjoni migratorja, nissalvagwardjaw l-integrità tal-fruntieri esterni tal-Unjoni Ewropea u nuru li kapaċi nirrispondu b’mod effettiv għall-isfidi tal-migrazzjoni, filwaqt li nindirizzaw il-kawżi ewlenin tagħhom. Din hija r-responsabbiltà tagħna lejn iċ-ċittadini Ewropej u lejn is-sigurtà tal-Unjoni kollha,” temm jgħid il-Ministru Glenn Bedingfield.