STQARRIJA MILL-MINISTERU GĦALL-INTERN U S-SIGURTÀ 40 uffiċjal tal-Protezzjoni Ċivili se jassistu fl-operazzjonijiet tat-tifi tan-nirien fil-Portugall

Id-Dipartiment tal-Protezzjoni Ċivili (CPD) se jibgħat żewġ timijiet ta’ uffiċjali tat-tifi tan-nar fil-Portugall bejn illum u l-31 ta’ Awwissu 2026 sabiex jassistu fl-isforzi kontinwi tat-tifi tan-nirien fil-foresti.

B’kollox, 40 uffiċjal se jieħdu sehem f’din il-missjoni internazzjonali li qed issir permezz tal-Mekkaniżmu tal-Unjoni Ewropea għall-Protezzjoni Ċivili.

Dan il-mekkaniżmu jippermetti lill-Istati Membri jikkoordinaw l-assistenza b’mod rapidu u effiċjenti waqt emerġenzi, filwaqt li jsaħħaħ il-kapaċità kollettiva tal-Ewropa biex tirrispondi għal diżastri naturali.

Iż-żewġ timijiet Maltin se jaħdmu mill-qrib mas-servizzi tat-tifi tan-nar Portugiżi biex isaħħu l-kapaċitajiet operattivi tagħhom u jagħtu kontribut dirett fl-operazzjonijiet ta’ kontroll u tifi tan-nirien fil-foresti.

Waqt li ħabbar dan, il-Ministru għall-Intern u s-Sigurtà Glenn Bedingfield qal li din il-missjoni hija xhieda tal-professjonalità u l-kapaċità tad-Dipartiment tal-Protezzjoni Ċivili Malti.

“L-uffiċjali tat-tifi tan-nar tagħna huma magħrufa għall-impenn, il-ħila u d-dedikazzjoni tagħhom. Il-fatt li Malta qed terġa’ tintalab tagħti s-sehem tagħha f’operazzjoni internazzjonali ta’ din ix-xorta juri l-fiduċja li pajjiżi oħra għandhom fil-kapaċitajiet tad-Dipartiment tal-Protezzjoni Ċivili. Filwaqt li qed ngħinu lill-Portugall f’mument diffiċli, qed inkomplu nuru li Malta hija sieħba responsabbli u affidabbli fil-qafas tal-Unjoni Ewropea u dejjem lesta turi solidarjetà ma’ pajjiżi li jkunu għaddejjin minn emerġenzi”, qal il-Ministru Bedingfield.

Din l-inizjattiva ta’ pre-positioning hija essenzjali biex jiġi żgurat rispons immedjat matul il-perjodu meta r-riskju tan-nirien fil-foresti jkun l-ogħla. L-għan tagħha huwa li tgħin fil-protezzjoni tal-komunitajiet, tal-infrastruttura u tal-ambjent naturali billi ssaħħaħ il-kapaċità ta’ rispons qabel ma jinqalgħu emerġenzi fuq skala kbira.

Id-Dipartiment tal-Protezzjoni Ċivili għandu esperjenza estensiva f’missjonijiet internazzjonali taħt il-qafas tal-Unjoni Ewropea għall-Protezzjoni Ċivili. Fl-aħħar snin, timijiet Maltin ġew skjerati biex jassistu fl-operazzjonijiet tat-tifi tan-nirien fil-foresti fil-Greċja, fit-Turkija u fil-Libja, u b’hekk ikkonfermaw l-impenn ta’ Malta lejn is-solidarjetà reġjonali u l-kooperazzjoni f’sitwazzjonijiet ta’ emerġenza.

Minkejja dan, id-Dipartiment tal-Protezzjoni Ċivili se jkompli jżomm livell għoli ta’ tħejjija fil-pajjiż permezz tan-network tiegħu ta’ għaxar stazzjonijiet tan-nar u żewġ units marittimi, sabiex ikun jista’ jwieġeb minnufih għal kull emerġenza lokali.

Dan l-impenn ikompli jenfasizza d-dedikazzjoni ta’ Malta lejn il-kooperazzjoni multilaterali fil-ġestjoni tar-riskju tad-diżastri u l-kontribut tagħha, permezz tal-għarfien, l-esperjenza u r-riżorsi tagħha, għat-tisħiħ tar-rispons Ewropew għall-emerġenzi.