STQARRIJA MILL-MINISTERU GĦALL-INFRASTRUTTURA, L-IPPJANAR U X-XOGĦOL Pjazza ġdida bi spazju miftuħ għal kulħadd minflok vetturi f’Ħ’Attard

Il-Ministru għall-Infrastruttura, l-Ippjanar u x-Xogħol Jonathan Attard uffiċjalment inawgura l-Pjazza Tommaso Dingli.

Dan il-proġett imwettaq minn Infrastructure Malta jifforma parti mill-inizjattiva Vjal Kulħadd, li tkompli tagħti prijorità lin-nies permezz ta' investimenti fi spazji pubbliċi aktar aċċessibbli, ħodor u sostenibbli.

Waqt l-inawgurazzjoni, il-Ministru saħaq li dan il-proġett jirrifletti l-viżjoni tal-Gvern li jpoġġi lill-komunità, lill-ambjent u lill-kwalità tal-ħajja fiċ-ċentru ta' kull investiment fl-infrastruttura.

“Meta ninvestu fl-infrastruttura, ma nkunux qed nibnu biss toroq, bankini jew spazji pubbliċi, iżda komunitajiet aktar b'saħħithom, aktar magħqudin u aktar reżiljenti. Dawn huma investimenti li jtejbu l-ħajja ta' kuljum tan-nies u jħallu wirt pożittiv għall-ġenerazzjonijiet li ġejjin,” qal il-Ministru.

Dr Attard spjega li l-Pjazza Tommaso Dingli hija parti minn sensiela ta' proġetti li qed jitwettqu taħt l-iskema Vjal Kulħadd, li qed tittrasforma spazji urbani biex jagħtu prijorità liċ-ċittadini fuq il-vetturi. F'dan il-kuntest semma wkoll l-inawgurazzjoni riċenti ta’ pjazza ġdida fl-Imsida u l-bidu ta' proġett ġdid qrib il-Junior College, fejn triq li sa ftit jiem ilu kienet miftuħa għat-traffiku, se tinbidel f'żona pedonali u rikreattiva.

Dan il-proġett f’Ħ’Attard jinkludi madwar 1,500 metru kwadru ta' spazju aħdar pubbliku b'50 siġra ġdida, li se jipprovdu aktar dell naturali, itejbu l-kwalità tal-arja, inaqqsu l-effett tas-sħana urbana u jkomplu jsaħħu l-bijodiversità fiċ-ċentru tal-lokalità.

Fost l-elementi innovattivi tal-proġett hemm sistema ta' ġbir u ħażna tal-ilma tax-xita f'ġibjun taħt l-art, sabiex dan l-ilma jerġa' jintuża għat-tisqija u għat-tindif tal-pjazza. Il-Ministru spjega li dan huwa eżempju konkret tal-impenn tal-Gvern favur l-użu sostenibbli tar-riżorsi.

Il-Ministru rringrazzja lis-Sindku u lill-Kunsill Lokali ta' Ħ'Attard, lill-Kap Eżekuttiv u lit-tim ta' Infrastructure Malta, kif ukoll lill-periti, l-inġiniera, il-kuntratturi u l-ħaddiema kollha li taw is-sehem tagħhom fit-twettiq tal-proġett. Huwa rringrazzja wkoll lir-residenti tal-paċenzja u l-kooperazzjoni tagħhom matul il-perjodu tax-xogħlijiet.

“Bħala Gvern se nkomplu ninvestu fi proġetti li jagħmlu differenza konkreta fil-ħajja tan-nies u li jkomplu joħolqu komunitajiet aktar sostenibbli, inklużivi u ta' kwalità. Fiduċjuż li Pjazza Tommaso Dingli se ssir il-qalba soċjali ta' Ħ'Attard u spazju fejn il-komunità tista' tkompli tiltaqa', tibni relazzjonijiet u toħloq memorji ġodda”, tenna l-Ministru.

Il-Kap Eżekuttiv ta' Infrastructure Malta, Steve Ellul, qal li din il-pjazza hija aktar minn proġett infrastrutturali, “hija spazju pubbliku ġdid maħluq biex iservi ta' punt ta' laqgħa għall-komunità. Permezz tal-programm Vjal Kulħadd, qed nibdlu l-mod kif inħarsu lejn l-ispazji pubbliċi, billi noħolqu ambjenti aktar siguri, aktar sbieħ u aktar aċċessibbli fejn in-nies ikunu jistgħu jiltaqgħu u jgawdu l-lokalità tagħhom. Għalina, infrastruttura moderna tfisser kwalità ta' ħajja aħjar u investiment dirett fil-komunitajiet tagħna, u se nkomplu nwasslu aktar proġetti li jagħtu lura l-ispazju lin-nies u jkomplu jtejbu l-kwalità tal-ħajja fil-lokalitajiet tagħna."

Minn naħa tiegħu s-Sindku tal-lokal is-Sur Stefan Cordina qal li dan il-proġett ġie varat minn infrastructure Malta wara li l-kunsill kien applika għal din l-iskema u huwa sodisfazzjoni kbir li  ngħatat din l-opportunità.

L-inawgurazzjoni kienet segwita b’serata għall-familja kollha inkluż spettaklu ta’ mużika, logħob interattiv, artiġjanat u wirjiet oħra.