STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL U MILL-MINISTERU GĦALL-FONDI EWROPEJ, ID-DJALOGU SOĊJALI U L-PROTEZZJONI TAL-KONSUMATUR

Terġa’ tiftaħ l-iskema ta’ investiment abbord bastimenti tas-sajd biex tkompli ssaħħaħ is-settur

Il-Gvern qed ikompli jsaħħaħ l-investiment fis-settur tas-sajd permezz tat-tnedija ta’ sejħa ġdida taħt l-iskema Investments on Board Fishing Vessels Scheme, iffinanzjata mill-Fond Ewropew għall-Affarijiet Marittimi, is-Sajd u l-Akwakultura (EMFAF). Din l-iskema għandha l-għan li tgħin lis-sajjieda Maltin u Għawdxin jimmodernizzaw il-bastimenti tagħhom, itejbu s-sigurtà abbord, iżidu l-effiċjenza fl-użu tal-enerġija u jkomplu jagħmlu s-settur aktar sostenibbli u kompetittiv.

Il-Ministru għall-Agrikoltura, is-Sajd u l-Provvista tal-Ikel Anton Refalo qal li l-Gvern se jkompli jkun viċin is-sajjieda u jappoġġjahom b’investimenti konkreti li jwieġbu għall-ħtiġijiet tagħhom.

“Din l-iskema hija investiment dirett fil-futur tas-sajd Malti u Għawdxi. Permezz tagħha qed nagħtu lis-sajjieda l-opportunità li jkomplu jimmodernizzaw il-bastimenti tagħhom, itejbu l-kundizzjonijiet tax-xogħol u jżidu l-effiċjenza tal-operat tagħhom. Se nibqgħu naħdmu biex is-settur jibqa’ sostenibbli, reżiljenti u kompetittiv, filwaqt li nkomplu nħarsu l-għajxien tal-familji li jiddependu minnu,” sostna l-Ministru Anton Refalo.

Il-Ministru għall-Fondi Ewropej Keith Azzopardi Tanti qal li l-fondi Ewropej huma għodda kruċjali biex isostnu s-setturi tradizzjonali tagħna u jbiddlu l-isfidi f'opportunitajiet. 

“Il-fondi tal-EMFAF huma xhieda tal-impenn tagħna li nwasslu l-għajnuna Ewropea direttament fejn hemm bżonn. Billi nallokaw dawn ir-riżorsi għat-titjib u t-teknoloġija abbord il-bastimenti, qed niżguraw li l-fondi tal-UE jissarrfu f’impjiegi aktar siguri u f’settur tas-sajd aktar modern u reżiljenti f'Malta u f’Għawdex,” tenna l-Ministru Keith Azzopardi Tanti. 

Is-sejħa hija miftuħa għal sajjieda li għandhom liċenzja MFA jew MFB u tappoġġja investimenti li jkomplu jsaħħu l-modernizzazzjoni, is-sostenibbiltà u l-kompetittività tal-flotta tas-sajd Maltija u Għawdxija.

L-applikazzjonijiet se jkunu miftuħa sat-30 ta' Settembru 2026, filwaqt li aktar informazzjoni dwar il-kriterji ta’ eliġibbiltà u l-proċess tal-applikazzjoni hija disponibbli fuq www.fondi.eu.