STQARRIJA MILL-MINISTERU GĦALL-ENERĠIJA, L-AMBJENT U R-RIĠENERAZZJONI TAL-PORT IL-KBIR Malta tikseb riżultati importanti fil-proposta riveduta tal-ETS tal-Unjoni Ewropea wara ħidma kontinwa tal-Gvern

Il-Gvern jilqa’ protezzjoni aktar b’saħħitha għall-Malta Freeport, protezzjoni kontinwa għall-konnettività bl-ajru u rikonoxximent tar-realtajiet tal-istati gżejjer

Il-Gvern huwa sodisfatt bil-proposta riveduta tal-Kummissjoni Ewropea dwar l-Emissions Trading System (ETS), li tinkorpora għadd ta’ prijoritajiet ewlenin li resqet Malta. Fosthom hemm protezzjoni aktar b’saħħitha għal Malta Freeport, protezzjoni kontinwa għall-konnettività bl-ajru ta’ pajjiżna u ż-żamma ta’ appoġġ dedikat għall-istati membri li huma gżejjer.

Il-proposta għar-reviżjoni tirrifletti diversi rakkomandazzjonijiet li l-Gvern ilu jressaq b’mod konsistenti tul dawn l-aħħar snin, sa minn meta daħlet fis-seħħ is-sistema attwali. Dawn ir-rakkomandazzjonijiet jagħrfu r-realtajiet partikolari tal-istati gżejjer li l-ekonomija tagħhom tiddependi ħafna fuq it-trasport bil-baħar u bl-ajru.

L-ETS hija s-sistema tal-Unjoni Ewropea li tpoġġi prezz fuq l-emissjonijiet tal-karbonju fis-setturi tal-marittimu, tal-avjazzjoni u oħrajn. Filwaqt li l-għan tagħha huwa li tnaqqas l-emissjonijiet madwar l-Ewropa, huwa importanti li l-implimentazzjoni tagħha ma toħloqx żvantaġġ għall-istati membri li huma gżejjer sempliċiment minħabba r-realtà ġeografika tagħhom.

Dawn ir-riżultati huma frott ħidma kontinwa tal-Gvern fuq livell Ewropew, sostnuta minn konsultazzjoni regolari mas-settur privat Malti. Il-Gvern ħadem mill-qrib man-negozji, mar-rappreżentanti tal-industrija u mal-operaturi biex jifhem l-isfidi li jiffaċċjaw kuljum u jiżgura li l-pożizzjoni ta’ Malta tkun ibbażata fuq fatti, esperjenza prattika u r-realtajiet ekonomiċi ta’ pajjiżna.

Bis-saħħa ta’ din il-ħidma, Malta tilqa’ b’sodisfazzjon għadd ta’ titjib importanti li l-Kummissjoni Ewropea qed tipproponi għas-sistema attwali.

Skont il-proposta riveduta, operazzjonijiet ta’ transhipment li jinvolvu merkanzija li tasal minn portijiet barra l-Unjoni Ewropea u li mhijiex destinata għas-suq Ewropew mhux se jibqgħu soġġetti għall-ħlasijiet tal-ETS. Dan huwa riżultat importanti għal Malta Freeport, li jkompli jsaħħaħ il-kompetittività tiegħu fil-konfront ta’ ċentri oħra ta’ transhipment barra mill-Unjoni Ewropea.

Il-klawżola dwar il-portijiet fil-viċin ġiet estiża wkoll biex tkopri l-portijiet kollha kompetituri fl-Afrika ta’ Fuq. Dan jagħlaq lakuna li kienet tħeġġeġ lill-operaturi marittimi jagħmlu waqfa f’port barra mill-Unjoni Ewropea biss biex inaqqsu l-ispejjeż relatati mal-ETS qabel jidħlu f’port Ewropew.

Il-Gvern jilqa’ wkoll il-proposta li tinżamm allokazzjoni dedikata mid-dħul tal-ETS għal Malta, Ċipru u l-Greċja sal-2038.

Fis-settur tal-avjazzjoni, is-sospensjoni temporanja tal-ħlas sħiħ tal-ETS fuq titjiriet li jitilqu minn Malta se tibqa’ fis-seħħ sal-2032. Dan se jgħin biex tiġi protetta l-konnettività ta’ pajjiżna filwaqt li jiġu limitati spejjeż addizzjonali għal-linji tal-ajru, għan-negozji u għall-passiġġieri.

Il-Ministru għall-Enerġija, l-Ambjent u r-Riġenerazzjoni tal-Port il-Kbir Miriam Dalli laqgħet il-proposta riveduta u qalet li din turi kif Malta tista’ tikseb riżultati konkreti meta tgħaqqad l-ambizzjoni klimatika ma’ ħarsien b’saħħtu tal-interess nazzjonali. “L-azzjoni favur il-klima trid tkun waħda ġusta. L-istati gżejjer ma jistgħux jispiċċaw iġorru piż sproporzjonat sempliċiment minħabba l-ġeografija tagħhom. Matul il-ħidma intensiva li Malta wettqet mal-Kummissjoni Ewropea qabel tressqet din il-proposta, sostnejna b’mod konsistenti li l-ambizzjoni klimatika tal-Ewropa trid timxi id f’id mal-kompetittività, il-konnettività u l-ġustizzja. Ninsab sodisfatta li r-realtajiet ta’ Malta huma riflessi f’din ir-reviżjoni, li ġġib magħha titjib konkret biex tipproteġi l-kompetittività tas-setturi strateġiċi tagħna tat-tbaħħir u tal-avjazzjoni.”

“Inħarsu ’l quddiem għan-negozjati fil-Kunsill, fejn il-Gvern se jkompli jaħdem b’mod kostruttiv biex jinkiseb aktar appoġġ immirat għan-negozji u għaċ-ċittadini tagħna. L-impenn tagħna favur l-azzjoni klimatika jibqa’ sod, iżda t-tranżizzjoni trid tkun waħda realistika, ġusta u li ma tħalli l-ebda stat gżira lura,” żiedet il-Ministru Dalli. 

Il-Gvern iżomm il-pożizzjoni tiegħu li mekkaniżmi li jgħaddu direttament l-ispejjeż relatati mal-ETS fuq in-negozji u l-konsumaturi għandhom ikomplu jqisu ċ-ċirkostanzi partikolari tal-istati membri li huma gżejjer. Bħala pajjiż gżira li m’għandux mezzi alternattivi għat-trasport ta’ persuni u merkanzija, Malta se tkompli taħdem favur soluzzjonijiet li jipproteġu l-konnettività, isaħħu l-kompetittività tal-ekonomija u jgħinu biex l-ispejjeż jibqgħu raġonevoli, filwaqt li jkomplu jikkontribwixxu għall-miri klimatiċi tal-Ewropa.