STQARRIJA MILL-MINISTERU GĦALL-ĠUSTIZZJA, IR-RIĊERKA U L-INNOVAZZJONI Ir-riformi fil-qasam tal-ġustizzja rikonoxxuti fir-Rapport Annwali dwar is-Saltna tad-Dritt

Ir-Rapport Annwali tal-Kummissjoni Ewropea dwar is-Saltna tad-Dritt jenfasizza l-progress sinifikanti li għamlet Malta matul l-aħħar sena fiż-żamma tas-saltna tad-dritt, permezz tat-tisħiħ tas-settur tal-ġustizzja, il-ġlieda kontra l-korruzzjoni, il-ħarsien tal-libertà tal-midja u t-tisħiħ tal-istandards istituzzjonali kif ukoll iċ-checks and balances.

Ir-rapport jinnota li l-Gvern kompla jagħti prijorità lill-ġustizzja, riflessa wkoll b’żieda ta’ 11% fil-baġit tas-settur għall-2026. Dan l-investiment qed isostni proġetti infrastrutturali, ir-reklutaġġ, it-taħriġ u l-implimentazzjoni tal-istrateġija ta’ trasformazzjoni diġitali. Il-Kummissjoni tirreferi wkoll għall-ftuħ tal-binja l-ġdida tal-Qrati fil-Belt Valletta għall-maġistrati inkwirenti, il-Qorti Kummerċjali u l-Qorti tal-Familja, kif ukoll is-sala addizzjonali fil-Qorti li issa tippermetti li jsiru żewġ ġurijiet fl-istess ħin.

Ir-rapport jirrikonoxxi l-progress ta’ Malta lejn sistema ġudizzjarja aktar speċjalizzata, b’mod partikolari bit-twaqqif tal-Qorti Kummerċjali li hija kompletament dedikata għal dan is-settur, u r-riforma tal-Qorti tal-Familja, it-tnejn adottati f’Marzu 2026 wara konsultazzjoni pubblika. Dawn ir-riformi jiffurmaw parti mill-impenn usa’ tal-Gvern biex iwassal sistema ġudizzjarja aktar effettiva u aċċessibbli. Ir-rapport jinnota wkoll li l-pjattaforma online għall-għajnuna legali issa hija operattiva u appoġġata minn żieda fir-riżorsi allokati lill-Aġenzija għall-Għajnuna Legali.

F’dik li hija responsabbiltà tal-ġudikatura, il-Kummissjoni tinnota b’mod pożittiv il-ħatra tal-Kummissarju l-ġdid għall-Istandards tal-Ġudikatura, li jipprovdi mekkaniżmu strutturat għall-ilmenti dwar membri tal-ġudikatura.

Mill-perspettiva tal-ġlieda kontra l-korruzzjoni, il-Kummissjoni tirrikonoxxi l-implimentazzjoni kontinwa tal-Istrateġija Nazzjonali ta’ Malta Kontra l-Frodi u l-Korruzzjoni, filwaqt li tinnota li l-maġġoranza tal-miżuri ġew implimentati u li għaddej ix-xogħol dwar strateġija suċċessiva. Tinnota wkoll iż-żieda fir-riżorsi allokati lill-Korp tal-Pulizija u lill-Uffiċċju tal-Avukat Ġenerali, li appoġġjaw investigazzjonijiet u prosekuzzjonijiet ġodda f’każijiet relatati mal-korruzzjoni.

Ir-rapport jirrikonoxxi wkoll diversi inizjattivi mmirati biex isaħħu t-trasparenza u r-responsabbiltà, fosthom it-tnedija ta’ portal diġitali għall-iżvelar ta’ informazzjoni fl-interess pubbliku (whistleblowing), l-introduzzjoni ta’ sistema integrata ta’ e-management għat-talbiet għall-aċċess għad-dokumenti, u salvagwardji addizzjonali relatati mal-protezzjoni tal-midja u l-governanza. Barra minn hekk, jenfasizza l-adozzjoni ta’ leġiżlazzjoni li tagħti setgħat ġodda lir-regolatur tal-midja u ssaħħaħ aspetti tal-governanza indipendenti tal-midja tas-servizz pubbliku.

Il-Ministru għall-Ġustizzja, ir-Riċerka u l-Innovazzjoni, Clifton Grima laqa’ b’sodisfazzjon il-konklużjonijiet tar-rapport, filwaqt li stqarr li dawn jirriflettu l-progress sostanzjali li kiseb il-Gvern matul l-aħħar snin. Huwa enfasizza li t-tisħiħ tas-Saltna tad-Dritt f’Malta jibqa’ prijorità u li l-Gvern se jkompli jmexxi ’l quddiem aġenda ambizzjuża ta’ riformi permezz ta’ investiment, tisħiħ istituzzjonali u l-impenn kostruttiv ma’ msieħba Ewropej u internazzjonali.

Il-Ministru Grima tenna li l-Gvern jibqa’ impenjat li jibni fuq il-progress miksub billi jkompli jinvesti fl-istituzzjonijiet, iwettaq aktar riformi u jiżgura li s-sistema ġudizzjarja f’Malta taqdi liċ-ċittadini b’effiċjenza, ġustizzja u fiduċja.