STQARRIJA MILL-UFFIĊĊJU TAD-DEPUTAT PRIM MINISTRU U MINISTERU GĦAS-SAĦĦA Aċċess aħjar għas-servizzi online għall-pazjenti fl-Isptar Monte Karmeli

Inawgurat iċ-Ċentru CLiC, b’tagħmir diġitali aktar sigur, taħt superviżjoni 

Id-Deputat Prim Ministru u Ministru għas-Saħħa Ian Borg fetaħ iċ-ċentru CLiC, b’faċilitajiet ġodda teknoloġiċi sabiex il-pazjenti tal-Isptar Monte Karmeli ikollhom aċċess aktar sigur għall-Internet u servizzi essenzjali oħra online.

Il-Proġett CLiC, Connected Living & Inclusion Centre, twettaq mill-ħaddiema tal-Isptar Monte Karmeli, b’inizzjattiva li nibtet minn proposta tal-President Emeritus Marie Louise Coleiro Preca, u b’kollaborazzjoni bejn in-National Mental Health Services u l-Malta Trust Foundation, il-fondazzjoni mmexxija mill-istess President Emeritus. L-aġenzija MITA wkoll kellha sehem kruċjali f’dan il-proġett,  hekk kif ipprovdiet il-kompjuters u tagħmir ieħor li se jużaw il-pazjenti għal aċċess diġitali u konnettività aktar komda u sigura.

Permezz ta’ dan iċ-ċentru, il-pazjenti f’dan l-isptar, issa għandhom aċċess aħjar, taħt superviżjoni adekwata, għat-teknoloġiji diġitali,  sabiex ikunu jistgħu jikkomunikaw mal-familjari, jieħdu ħsieb ħtiġijiet amministrattivi personali online, u jiżviluppaw il-ħiliet diġitali tagħhom. Fl-istess ħin, CLiC joffri wkoll spazju dedikat lill-kliniċisti u lill-Occupational Therapists għal taħriġ li jsaħħaħ l-awtonomija u jħejji lill-pazjenti sabiex jerġgħu jintegraw ruħhom fil-komunità.

Waqt il-ftuħ taċ-ċentru, id-Deputat Prim Ministru tenna l-impenn tal-Gvern li jkompli jinvesti biex itejjeb il-kwalità tal-ħajja tal-pazjenti, anke bi proġetti li jkomplu jsaħħu s-servizzi tas-saħħa mentali.

“Dan l-ispazju li qabel kien jeħtieġ riġenerazzjoni issa sar ċentru li jagħti opportunitajiet ġodda lil dawk kollha li se jużawh fiż-żmien li ġej. Inizjattivi bħal dawn, mibnija fuq il-kollaborazzjoni, jagħmlu differenza tanġibbli u jkomplu jagħtu kwalità ta’ ħajja aħjar,” qal Dr Borg.

Il-President Emeritus Marie Louise Coleiro Preca qalet li “dan iċ-ċentru huwa ta’ sodisfazzjon kbir għalina għaliex fih ir-residenti ta’ Monte Karmeli se jkunu jistgħu jikkomunikaw aħjar, jiltaqgħu flimkien u jitħarrġu.”

Dan il-proġett ikompli jibni fuq diversi investimenti oħra fl-Isptar Monte Karmeli, fosthom il-ftuħ ta’ żewġ swali ġodda f’dawn l-aħħar ġimgħat, minflok tnejn oħra aktar qodma li issa se jiġu rinovati wkoll. Inizzjattivi bħaċ-ċentru CLiC huma xhieda tal-viżjoni tal-Gvern li jkompli jaħdem għal servizzi tas-saħħa mentali aħjar, b’faċilitajiet u servizzi aktar avvanzati, inklużivi u ffukati fuq il-benesseri tal-pazjenti, filwaqt li jkompli jinvesti f’inizjattivi li jippromwovu d-dinjità, l-awtonomija u l-inklużjoni soċjali.