STQARRIJA MILL-MINISTERU GĦALL-ENERĠIJA, L-AMBJENT U R-RIĠENERAZZJONI TAL-PORT IL-KBIR U MILL-MINISTERU GĦALL-FONDI EWROPEJ, ID-DJALOGU SOĊJALI U L-PROTEZZJONI TAL-KONSUMATUR

Jibda x-xogħol tat-tħaffir taħt l-art sabiex it-tieni interconnector tal-elettriku jgħaddi mill-art għal taħt il-baħar

•Bdew ix-xogħlijiet tal-horizontal directional drilling (HDD) f’Malta, sabiex jinħoloq passaġġ taħt l-art fil-forma ta’ mina li se tgħaqqad il-parti minn fejn se jitpoġġa l-cable fuq l-art ma’ taħt il-baħar

•Aktar tard din is-sena se jsir l-istess proċess fi Sqallija, filwaqt li x-xogħlijiet relatati mal-parti fuq l-art u taħt il-baħar qed jiġu kkoordinati 

Bdew ix-xogħlijiet taħt il-baħar tat-tieni interconnector, hekk kif il-kumpanija Norveġiża Nexans bdiet twettaq ix-xogħlijiet tal-horizontal directional drilling (HDD) f’pajjiżna. 

Din il-fażi importanti se toħloq il-konnessjoni taħt l-art fil-forma ta’ mina biex tgħaqqad il-parti fuq l-art ma’ dik ta’ taħt il-baħar tal-proġett, biex il-cable jkun jista’ jgħaddi mill-art għal taħt il-baħar mingħajr ma jħalli impatt fuq il-kosta.

“Dan il-proġett jinvolvi l-manifattura ta’ cable speċjalizzat u jinvolvi firxa wiesgħa ta’ xogħlijiet u attivitajiet kumplessi ta’ inġinerija, ippjanar metikoluż u koordinazzjoni kontinwa bejn diversi entitajiet. Dan kollu huwa kruċjali għat-twettiq tal-proġett fit-totalità tiegħu sabiex nibqgħu naħdmu fuq din l-infrastruttura ta’ importanza nazzjonali,” qalet il-Ministru għall-Enerġija Miriam Dalli. 

“Il-bini tat-tieni Interconnector, proġett ta’ madwar €300 miljun mill-ERDF, huwa meqjus bħala wieħed importanti ħafna, ta’ impatt strateġiku fuq il-gżejjer Maltin li  se jagħti sigurtà fejn tidħol il-provvista tal-enerġija, kif ukoll se jżomm il-prezzijiet tal-enerġija stabbli, biex il-familji u n-negozji Maltin jibqgħu jgawdu minn kontijiet affordabbli,” saħaq il-Ministru għall-Fondi Ewropej Keith Azzopardi Tanti.

Il-horizontal directional drilling (HDD) hija teknoloġija speċjalizzata li tippermetti li jsir tħaffir ikkontrollat taħt l-art f’dak il-każ minn tarf fuq l-art sa tarf ieħor taħt il-baħar. Dan il-metodu jelimina l-ħtieġa ta’ skavar u trinek fiż-żona tax-xatt tal-kosta u jiżgura li l-cable jgħaddi b’mod sigur u protett bejn l-art u l-baħar.

Aktar tard din is-sena, l-istess proċess se jitwettaq ukoll fi Sqallija. Dawn l-iżviluppi eventwalment se jiffurmaw il-punt ta’ konnessjoni tal-parti ta’ fuq l-art ma’ dik ta’ taħt il-baħar u se jippermettu li xogħlijiet marbuta maż-żewġ kuntratti tal-proġett jingħaqdu flimkien. Dawn ix-xogħlijiet qed jiġu kkoordinati b’reqqa minn Interconnect Malta flimkien mal-konsulenti tekniċi tagħha, Rina Consulting S.p.A., b’kollaborazzjoni sħiħa bejn il-partijiet kollha involuti.

Proċess bħal dan jirrikjedi ħidma estensiva ta’ ppjanar, disinn ta’ inġinerija u tħejjija teknika. Il-kundizzjonijiet ġeoloġiċi jiġu kkonfermati waqt il-proċess tat-tħaffir. Karatteristiċi naturali bħat-tipoloġija u xquq fil-blat jew bidliet fil-formazzjoni ġeoloġika jistgħu joħolqu sfidi tekniċi li jeħtieġu monitoraġġ kontinwu u livell għoli ta’ kompetenza.

Ladarba jitlestew ix-xogħlijiet tal-HDD kemm f’Malta kif ukoll fi Sqallija, ikun jista’ jibda t-tqegħid tal-cable taħt il-baħar, li huwa ppjanat li jibda minn Malta fid-direzzjoni lejn l-Italja. Fiż-żewġt itruf, il-cable ta’ taħt il-baħar imbagħad jingħaqad mal-cable fuq l-art permezz ta’ transition joint li jitwettaq minn tekniċi speċjalizzati.

“Wieħed mill-aktar aspetti notevoli ta’ dan il-proġett huwa li, minkejja d-daqs u l-kumplessità tiegħu, l-infrastruttura li qed tinbena se tibqa’ kważi kollha ma tidhirx. It-teknoloġija tal-lum tippermetti li jitwettqu proġetti infrastrutturali fuq skala kbira b’impatt minimu fuq il-pajsaġġ u l-ambjent. Madankollu, dan jirrikjedi studji estensivi, koordinazzjoni effettiva, ippjanar dettaljat u implimentazzjoni bir-reqqa,” spjega l-Maniġer ta’ Interconnect Malta, il-Perit Reuben Sammut.

Meta jitlesta, il-proġett tat-tieni konnessjoni tal-elettriku bejn Malta u Sqallija se jirdoppja l-kapaċità ta’ Malta li tkun konnessa man-netwerk Ewropew tal-elettriku. Fl-istess ħin, se jsaħħaħ is-sigurtà tal-provvista tal-elettriku u jiffaċilita integrazzjoni akbar tal-enerġija rinnovabbli fis-sistema elettrika tal-pajjiż.

Dan l-investiment ta’ €300 miljun ġie approvat għall-finanzjament mill-ERDF taħt il-prijorità “Promozzjoni tat-tranżizzjoni enerġetika nadifa u ġusta”, u jikkontribwixxi direttament għal sistemi enerġetiċi intelliġenti u stabbli. Il-proġett ġie rikonoxxut bħala “Operazzjoni ta’ Importanza Strateġika” fil-Programm 2021–2027. L-ammont tal-finanzjament Ewropew allokat hu ta’ €261 miljun.