STQARRIJA MILL-MINISTERU GĦALL-GVERN LOKALI U X-XOGĦLIJIET PUBBLIĊI Elementi Sajfin 2026 jerġa’ jġib il-komunità flimkien fix-Xgħajra

L-attività annwali Elementi Sajfin 2026, organizzata mill-Kunsill Lokali tax-Xgħajra, se terġa’ tlaqqa’ flimkien residenti, familji u turisti għal serata mimlija mużika, żfin, arti u talent lokali nhar is-Sibt, 18 ta’ Lulju 2026, fil-Milord, ix-Xgħajra.

Din l-attività qed tittella’ wkoll grazzi għall-appoġġ finanzjarju mogħti permezz ta’ skema maħruġa mid-Diviżjoni tal-Gvern Lokali, li permezz tagħha l-Kunsilli Lokali qed jibbenefikaw minn fondi biex jorganizzaw inizjattivi kulturali u soċjali li jkomplu jsaħħu l-ħajja fil-lokalitajiet tagħhom.

Id-dettalji tħabbru mill-Ministru għall-Gvern Lokali u x-Xogħlijiet Pubbliċi Alison Zerafa Civelli flimkien mas-Sindku tal-Kunsill Lokali tax-Xgħajra, Neil Attard. Matul dawn l-aħħar ħames snin, Elementi Sajfin kompla jikber u jattira udjenza wiesgħa ta’ familji, residenti u turisti, b’programm li joffri esperjenza unika mal-baħar. 

L-attività saret appuntament annwali importanti fil-kalendarju kulturali tal-lokalità, fejn il-pubbliku jingħata l-opportunità li jiltaqa’ f’ambjent miftuħ u jgawdi minn esperjenza li tgħaqqad id-divertiment, il-kreattività u t-talent lokali.

Il-Ministru Alison Zerafa Civelli qalet li attivitajiet bħal Elementi Sajfin juru l-importanza tal-ħidma tal-Kunsilli Lokali fil-ħolqien ta’ spazji fejn il-komunitajiet jistgħu jiltaqgħu, jaqsmu esperjenzi u jgawdu minn inizjattivi ta’ kwalità fil-lokalitajiet tagħhom. Hija saħqet li l-Gvern jibqa’ kommess li jkompli jsaħħaħ ir-rwol tal-Kunsilli Lokali bħala l-eqreb livell ta’ gvern għaċ-ċittadin, billi jagħtihom l-appoġġ meħtieġ biex iwettqu inizjattivi li jtejbu l-kwalità tal-ħajja fil-komunitajiet.

“Elementi Sajfin huwa eżempju ċar ta’ kif il-Kunsilli Lokali qed ikomplu jkunu mutur importanti fil-ħajja tal-komunitajiet tagħna. Permezz ta’ inizjattivi bħal din, mhux biss qed noħolqu spazji ta’ divertiment u laqgħat għall-familji, iżda qed nagħtu wkoll valur lit-talent lokali, lill-kultura u lill-identità tal-lokalitajiet tagħna,” temmet tgħid il-Ministru Zerafa Civelli.

Is-Sindku tal-Kunsill Lokali tax-Xgħajra, Neil Attard, spjega li Elementi Sajfin huwa riżultat tal-ħidma kontinwa tal-Kunsill Lokali biex joffri attivitajiet li jġibu lill-komunità flimkien u jippromwovu t-talent u l-kreattività. Spjega li l-edizzjoni ta’ din is-sena se tinkludi wirjiet ta’ mużika live, żfin, kif ukoll attivitajiet oħra adattati għall-familja. Minbarra l-programm artistiku, il-pubbliku se jkun jista’ jgawdi wkoll minn wirja tal-karozzi li se tlaqqa’ flimkien kollezzjoni ta’ vetturi, flimkien ma’ ikel u xorb f’atmosfera unika mal-baħar.

Elementi Sajfin 2026 se ssir bejn is-6:30pm u l-11:00pm fil-Milord, ix-Xgħajra, u d-dħul għall-attività huwa bla ħlas.