STQARRIJA MILL-MINISTERU GĦALL-INTERN U S-SIGURTÀ Il-Ministru jagħti ġieħ lill-Korp tal-Pulizija ta’ Malta f’Jum il-Pulizija

Il-Ministru għall-Intern u s-Sigurtà, Glenn Bedingfield, fakkar Jum il-Pulizija ta’ din is-sena billi ta ġieħ lid-dedikazzjoni, il-professjonalità u l-kuraġġ tal-Korp tal-Pulizija ta’ Malta, filwaqt li tenna l-impenn tal-Gvern li jkompli jinvesti f’pulizija moderna, fil-benesseri tal-uffiċjali u fir-riżorsi meħtieġa biex il-Korp ikun jista’ jindirizza l-isfidi tas-sigurtà li qed jevolvu kontinwament.

Waqt iċ-ċerimonja ta’ Jum il-Pulizija, il-Ministru qal li din l-okkażjoni hija opportunità biex il-pajjiż jirrikonoxxi n-nisa u l-irġiel li jiddedikaw ħajjithom biex jipproteġu lill-oħrajn u jaqdu lill-komunità.

Il-Ministru rringrazzja lill-Eminenza Tiegħu l-Kardinal Mario Grech talli ċċelebra l-Quddiesa Solenni bħala parti mill-kommemorazzjonijiet ta’ Jum il-Pulizija, filwaqt li nnota li r-riflessjoni tiegħu enfasizzat l-importanza tal-kompassjoni, l-integrità u l-umanità fil-ħidma tal-pulizija.

Il-Ministru qal li l-Korp tal-Pulizija ta’ Malta jibqa’ fil-qalba tal-komunitajiet tagħna, billi jagħti serħan il-moħħ u appoġġ lill-pubbliku permezz tar-rispons għall-emerġenzi, iż-żamma tal-ordni pubbliku, l-investigazzjoni tar-reati u l-assistenza lill-vittmi.

Huwa nnota li l-pulizija llum qed tiffaċċja sfidi akbar minn qatt qabel, hekk kif iċ-ċiberkriminalità, ir-reati finanzjarji, l-abbuż online, in-networks tal-kriminalità organizzata u l-użu ħażin tal-intelliġenza artifiċjali qed joħolqu theddid dejjem aktar kumpless. Huwa saħaq li l-kriminali qed jadattaw kontinwament u għalhekk huwa essenzjali li l-aġenziji tal-infurzar tal-liġi jibqgħu mgħammra biex jirrispondu b’mod effettiv.

Il-Ministru Bedingfield tenna l-impenn tal-Gvern li jkompli jipprovdi lill-Korp tal-Pulizija b’infrastruttura moderna, kapaċitajiet operattivi avvanzati u taħriġ speċjalizzat biex isaħħaħ il-ħila tiegħu li jindirizza l-isfidi tas-sigurtà tal-lum u ta’ għada.

Huwa enfasizza wkoll l-importanza li jitkompla jingħata appoġġ għall-benesseri tal-uffiċjali tal-pulizija, filwaqt li sostna li, minkejja l-importanza tal-investiment fit-teknoloġija u fir-riżorsi, l-akbar saħħa tal-Korp tibqa’ l-professjonalità, l-integrità u d-dedikazzjoni tal-membri tiegħu.

Il-Ministru qal li Jum il-Pulizija jfakkarna wkoll li s-sigurtà, l-ordni pubbliku u s-saltna tad-dritt qatt m’għandhom jittieħdu for granted, filwaqt li żied li ordni pubbliku b’saħħtu jikkontribwixxi direttament għal kwalità ta’ ħajja aħjar għal kulħadd.

Huwa rrikonoxxa wkoll il-kontribut tas-sħab internazzjonali ta’ Malta, filwaqt li nnota li l-kooperazzjoni fil-qasam tas-sigurtà transfruntiera u l-infurzar tal-liġi hija dejjem aktar importanti biex jiġu indirizzati theddid li jaqbeż il-fruntieri nazzjonali.

Fi tmiem l-indirizz tiegħu, il-Ministru Bedingfield irringrazzja lill-membri kollha tal-Korp tal-Pulizija ta’ Malta għall-impenn tagħhom lejn is-servizz pubbliku u għar-rwol kruċjali li għandhom biex iżommu lil Malta sigura. Huwa ħeġġeġ lill-uffiċjali jkomplu jaqdu lil pajjiżhom b’unur, professjonalità u kburija.